Mediat siriane kanë raportuar se avionët luftarakë izraelitë kanë bombarduar me raketa një qendër ushtarake siriane pranë kryeqytetit, Damask.
Në një deklaratë të ushtrisë siriane u tha se sistemet e mbrojtjes ajrore bllokuan shumicën e raketave, por nuk u dhanë detaje të mëtejshme.
Nga raportimet prej terrenit mësohet se depot e municioneve në Jamraya u goditën. Kjo është edhe vendndodhja e një objekti shkencor, ku Perëndimi dyshon se janë prodhuar armët kimike.
Në raport thuhet se gjatë bombardimeve izraelite janë vrarë dhe 12 civil.
Izraeli, i cili ka pranuar se ka kryer të paktën 100 sulme klandestine në Siri që nga viti 2011, nuk pranoi të komentojë ngjarjen.
Shumë nga sulmet izraelite besohet se kanë pasur për qëllim parandalimin e transferimit të armëve të avancuara në lëvizjen libaneze të Hezbollahut.