Një ngjarje e rëndë është regjistruar në mesnatë në maternitetin e Kukësit. Raportohet se një nënë 40-vjeçare dhe foshnja e saj kanë humbur jetë gjatë lindjes.
Sipas burimeve policore, ngjarja ka ndodhur sot në mëngjes rreth orës 08.30, ku u njoftua se gjatë lindjes ka gjetur vdekjen Nurije Poçi, rreth 42 vjeçe, banuese në Kukës, së bashku me foshnjën e saj.
Viktima së bashku me foshnjën, ndodhen në morgun e spitalit të Kukësit. Ekspertët mjeko-ligjore të ardhur nga Tirana si dhe grupi hetimor, po punojnë për përcaktimin e shkaqeve të vdekjes.
Familjarët kanë dyshime për çfarë ka ndodhur, ndërsa janë në pritje të kryerjes së ekspertizës mjeko-ligjore. Ata thonë se ngjarja është e dyshimtë prandaj edhe kanë kërkuar hetime të mëtejshme për rastin në fjalë.
Gruaja ishte nënë e gjashtë fëmijeve dhe kishte shkuar në spital për të lindur fëmijën e shtatë, të seksit mashkull.
Nuk dihen ende arsyet e kësaj ngjarje të rëndë. Policia ka nisur hetimet për të zbuluar më tej rreth ngjarjes tragjike.