Lideri militant në arrati, Izat Ibrahim Al- Duri, që njihej edhe si krahu i djathtë i ish- liderit të Irakut, Sadam Hysein, është vrarë.
Lajmin e kanë konfirmuar zyrtarët irakianë.
Ata thanë se ai vdiq duke luftuar në provincën Salahudin.
Mbështetësit e tij kanë mohuar lajmin.
Sipas BBC, Al- Duri, 72 vjeç, udhëhiqte një grupim kryengritësish, që shërbente edhe si forcë kyçe në rritjen e ndjeshme të Shtetit Islamik.
Ai ishte zëvendësi i Sadam Hysein, që u rrëzua nga pushteti në vitin 2003, pas pushtimit amerikan të Irakut.
Hysein u ekzekutua në vitin 2006.
Al-Duri shihej si një figurë shumë e rëndësishme gjatë regjimit të Hysein dhe për kokën e tij ishte vënë një shumë prej 10 milionë dollarë.
Ai njihej edhe si Mbreti Spathi, për shkak se SHBA kishte përdorur sistemin e letrave të bixhozit për të bërë renditjen e njerëzve më të kërkuar të regjimit.
Mendohet se ai është vrarë së bashku me 9 truproja të tij.