Kryetari i Prizrenit, Mytaher Haskuka, ka demantuar të gjitha akuzat PDK-së.
Sipas tij, akuzat e fundit të këtij subjekti opozitar, kanë për qëllim manipulimin e opinionit.
“PDK në konferencë për shtyp ndër tjera paska tentuar të manipulojë opinionin publik edhe me shifra. Në konferencë paskan thanë që Komuna e Prizrenit ka shpenzuar 201,902 euro për “udhëtime brenda vendit”, duke na treguar që në vitin 2017 për këtë periudhë kjo shifër paska qenë 34,134 euro”, shkruan Haskuka në Facebook.
“Duhet ditur që këtë vit ne kemi paguar shumë borxhe nga viti i kaluar, në këtë kategori 80,732 euro të paguara sivjet, janë për borxhin e vitit të kaluar, pra pagesë për borxhin e qeverisjes PDK. Shumicën e pagesave për këtë kategori kemi bërë në bazë të kontratave të trashëguara, prandaj edhe këto janë nga qeverisja PDK”.
“Është me rëndësi të tregohet qytetarëve që shumica e shpenzimeve në këtë kategori “udhëtime brenda vendit” janë për transportin e nxënësve dhe të mësimdhënësve brenda territorit të Komunës, pra nuk janë për “luks””.
“Duke paraqitur shpenzimet e Komunës së Prizrenit në shifra kategorike pa shpjegime të detajuara në rastin më të mirë kanë treguar mosdijen e tyre, por nëse e marrim parasysh se kanë qeverisur më shumë se 10 vite atëher kjo tregon vetëm tentim manipulimin me opinionin publik”.
“Deri më tani PDK-ja po bën opozitë për problemet që i ka krijuar vetë me keqqeverisje, shpresoj që nuk na akuzojnë edhe për 3700 raste që komuna e Prizrenit i ka nëpër gjykata “/PrizrenPress.com/