Lideri i NISMËS për Kosovë, Fatmir Limaj, gjatë një interviste për portalin TeSheshi ka folur për qeverisjen e deritashme nga Isa Mustafa. Ai beson se kryeministrit të ri duhet t’i jepet kohë, ndërsa shprehet skeptik se mund ta ndryshojë “modelin qeverisës të PDK-së”. Prishja e Bllokut opozitar, sipas tij, ishte fatkeqësi për Kosovën që e ndihmuan shumë faktorë, veçanërisht Gjykata Kushtetuese e Kosovës. Në pjesën e dytë të intervistës, lideri i NISMËS për Kosovë, Fatmir Limaj, flet për fatkeqësinë që e pret Kosovën nëse miratohet dokumenti për Gjykatën Kushtetuese, ashtu siç është tani. Ai apelon që urgjentisht të korrigjohen listat ku “gjithkush” është bërë invalid lufte, ndërsa thotë se për miellin që po cilësohet si krunde, duhet të flasin institucionet.
Kryeministri i Kosovës, Isa Mustafa, është në mes të dy zgjedhjeve: ta ruaj status quo-n qeverisëse të krijuar nga PDK-ja, që do të thotë, të vazhdojë keqqeverisja, kapja e institucioneve të pavarura dhe korrupsioni, apo ta ndërrojë këtë kurs të qeverisjes me qeverisje më të mirë. Zgjedhja e dytë është tejet e vështirë, për shkak se partner të koalicionit e ka një parti që e ka fundosur shtetin, por duhet t’i jepet kohë.
Kështu mendon lideri i NISMËS për Kosovë, Fatmir Limaj, i cili gjatë një interviste për portalin TeSheshi, ka theksuar se koalicioni qeverisës LDK – PDK përbëhet nga grupe të personave që s’kanë besim në njëri-tjetrin, s’kanë vullnet dhe as energji për të punuar.
“Çfarë ekipe kemi sot në qeverisjen në Kosovë? I kemi dy partner të cilët e kanë një mosbesim të thellë në njëri-tjetrin, e kanë një partneritet jo të natyrshëm, me probleme morale”, thotë Limaj.
“Unë e admirojë zotin Mustafa nëse arrin të bëjë diçka nga kjo (qeverisje ndryshe nga PDK). Unë nuk do ta imagjinoja vetën në një situatë të tillë, sepse, është jashtëzakonisht vështirë nëse është qëllimi për ta ndryshuar vendin”, shprehet ai.
Limaj beson se LDK-ja ka gabuar rëndë kur ka vendosur t’i thotë “po” PDK-së, ngase, sipas tij, të gjitha pritjet e qytetarëve kanë qenë tek partia e dytë, si alternativë për ta ndryshuar qeverisjen.
“Blloku u prish nga egot personale të disa personave”, thotë ai, ndërsa beson se Gjykata Kushtetuese ishte kontrolluar nga pushteti i Hashim Thaçit, prandaj, solli vendime në favor të tij.
Fatmir Limaj beson se do të ketë raste të shumta kur Isa Mustafa do ta ketë të vështirë të tregohet “kryeministër i hekurt”, sepse nuk do të ketë mundësi t’i rrëzojë nga pozitat e caktuara personat e dëshmuar për keqmenaxhim të institucioneve të ndryshme, ngase, kështu do t’i prekë anëtarët e partisë me të cilën bashkëqeverisë.
TeSheshi: Zotëri Limaj, njëri nga miqtë tuaj më të afërt, personi i cili gjatë gjithë legjislaturës së kaluar iu patë mbështetur fuqishëm, madje duke hapur fronte gjithandej, Jakup Krasniqi, dha dorëheqje nga pozita e deputetit, që i bie nga politika aktive. Marrë parasysh faktin se NISMA ishte identifikuar me të dhe juve, a ishte kjo një goditje për Ju dhe partinë? Si e përjetuat në fakt këtë veprim të Krasniqit?
Limaj: Vendimi i zotit Krasniqi për tu larguar nga Kuvendi është plotësisht vendim personal, edhe vijnë disa momente të caktuara në jetë që njeriu ka të drejtë, ka nevojë të marrë vendime personale dhe ne e kemi mbështetur vendimin e zotit Krasniqi dhe siç e thatë ju, natyrisht, mungesa e zotit Krasniqi në Parlamentin e Kosovës është e pazëvendësueshme, edhe për faktin e përvojës së tij, personaliteti i tij, për vetë faktin e peshës dhe krejt angazhimin e tij që e ka pasur në jetën politike dhe shoqërore në Kosovë.
Dhe natyrisht, të qenit e zotit Krasniqi në Parlamentin e Kosovës nuk ka qenë e nevojshme dhe dobishme vetëm për NISMËN, por ka qenë për Parlamentin e Kosovës. Mirëpo, siç e dini, zoti Krasniqi ka pasur një intensitet të madh të angazhimit të tij në dy mandate si kryetar i Parlamentit, dhe angazhimet e tij i ka tejkaluar përtej angazhimit formal si kryetar i Parlamentit dhe ka ardhur një moment kur ai ka kërkuar një pushim momental kisha me thënë, nga Parlamenti dhe ne e kemi mbështetur atë. Dhe zoti Krasniqi ka vendosur që gjithë angazhimi e tij ta drejtojë në angazhimin partiak, në zgjerimin e NISMËS për Kosovë, nga pozita e kryetarit të Këshillit Kombëtar.
Atij sigurish ti ka munguar komunikimi në teren, me struktura, me njerëz edhe këtë është duke e bërë. Krejt energjitë e tij i ka orientuar në forcimin dhe zgjerimin e NISMËS dhe poashtu ai është shumë aktiv, siç e dini edhe ju, në zbërthimin, në dhënien e opinioneve dhe qëndrimeve, qoftë të tij, qoftë në emër të NISMËS për problemet me të cilat ballafaqohet qytetari i Kosovës. Kështu që duhet ta them një gjë, tërheqja e zotit Krasniqi nga pozita e deputetit, është një tërheqje momentale, ndërsa tërheqja intensiteti i zotit Krasniqi në politikën kosovare jo që nuk ka përfunduar, por ajo do të fuqizohet edhe më tepër.
TeSheshi: Partia që ju e drejtoni, siç po shihet, po e mbanë një vijë të veçantë të bërit opozitë. As nuk po bënë opozitë “agresive” as nuk po mbanë qëndrim të butë karshi qeverisë. Nga ky këndvështrim, si po e vlerësoni punën e deritashme të Qeverisë së Kosovës?
Limaj: Ne si NISMË e kemi alternativën tonë politike dhe vizionin tonë politik dhe konceptin tonë. Dhe ne pretendojmë që t’i qëndrojmë që t’i qëndrojmë besnik kësaj alternative dhe këtij konceptit tonë politik, që do të thotë natyrisht ne nga pozita e opozitës do vazhdojmë, do ta ngrisim zërin, nuk do të heshtim ndaj çdo fenomeni negativ, ndaj problemeve që ka shoqëria, do të ngrisim tema dhe do të kritikojmë qeverisjen për çdo veprim ose vendim të gabuar që mund ta merr edhe gjatë qeverisjes. Mirëpo, gjithmonë po flas për tema të cilat vërtetë janë të dëmshme, e të cilat meritojnë të kritikohen. Ky do të jetë zëri i NISMËS dhe me asgjë NISMA nuk do të ndalet për ta ngritur zërin ndaj këtyre fenomeneve. NISMA nuk është në Parlamentin e Kosovës për të bërë zhurmë, NISMA është në Parlament për të korrigjuar qeverisjen, për të ngritur zërin ndaj padrejtësive, pakënaqësive ndaj vendimeve të gabuara të Qeverisë. Dhe kështu ka filluar dhe kështu do të vazhdojë, por jo thjeshtë, mos prisni asnjëherë, NISMA nuk do të jetë ajo që për çdo gjë që bënë qeveria ajo ta ngrisë zërin e saj. Nëse është mirë, do ta ketë mbështetjen e NISMËS.
TeSheshi: Atëherë, si po e vlerësoni qeverisjen e deritashme, edhe pse nuk janë bërë njëqind ditë?
Limaj: Mirë e thatë, ende nuk janë bërë njëqind ditë, por fati i kësaj qeverisje është me probleme morale, është me probleme, mund të them të mentalitetit qeverisës. Kjo qeveri në vetë startin e saj e ka shumë problematikë. Së pari mënyra si është krijuar kjo qeverisje, partnerët që janë në këtë Qeveri, dhe logjika qeverisëse. Lidhja Demokratike e Kosovës është parti e dytë në Kosovë dhe për katër vite ka ndërtuar kauzën e ndryshimit të qeverisjes, për katër vite ka qenë zëri i ndryshimit, zëri i pakënaqësive, zëri i nevojës të krijimit të një mentaliteti tjetër qeverisës. Shumica e qytetarëve të Kosovës kanë shpresuar, me të drejtë, se është partia e dytë ajo e cila ka gjasa për ta ndryshuar qeverisjen. Dhe gjithkund është normale, është partia e dytë ajo që mund ta ndryshojë qeverisjen, dhe në fund kjo nuk ndodhur. Dhe në emër të krejt kësaj çfarë ka ndodhur, fatkeqësisht, kauzën që e ka ndërtuar Lidhja Demokratike e Kosovës për katër vite e ka zhbërë për një minutë, duke mbytur shpresën e gjithë atyre njerëzve, shpresën për ndryshim, dhe duke shkuar drejtë ndërtimit të një koalicioni me partinë e cila ka qenë në pushtet dhe kjo nënkupton vazhdimësi të qeverisjes. Kjo nënkupton e gjithë ajo kauzë që është ndërtuar për katër vite është hedhur për të vazhduar një shkollë, ose një mentalitet qeverisës që ka qenë deri më tani, e që shumica e qytetarëve të Kosovës kanë kërkuar të ndryshohet. Kjo është problemi moral, etik edhe politik i këtij koalicioni qeverisës.
E dyta, për mendimin tim është se ne kemi një vazhdimësi të qeverisjes në kontinuitet me këtë që e thash më herët. Do të jetë shumë vështirë për qeverinë aktuale që të bëjë ndryshime duke marrë parasysh që zoti Mustafa është në qeverisje me partinë e parë që ka marrë më së shumti vota në Kosovë, dhe nuk e ka të lehtë edhe po deshi të bëjë ndryshime të nevojshme, sepse, ne e kemi një parti politike e cila për shtatë vite e ka qeverisur vendin dhe pothuajse në të gjitha institucionet e mundshme në këtë vend e ka futur mentalitetin e vet qeverisës. Nuk ka institucion të ashtuquajtur të pavarur, të niveleve të ndryshme në të cilat nuk është instaluar ky mentalitet qeverisës. Dhe ju nuk mund ta ndryshoni këtë sepse e keni partnerin brenda për brenda aty dhe nuk do të jetë e lehtë të bëhen ndryshimet
TeSheshi: Siç ishte rasti te PTK-ja, ku kryeministri Mustafa u pa që nuk u pajtua me zgjedhjen e drejtorit të ri…
Limaj: Po. Do të ketë edhe shumë raste të tjera. Ju do ta shihni në rrugë e sipër. Do të jetë shumë vështirë të ndryshohet mentaliteti, prandaj, edhe ky është problemi që do të ballafaqohet në të ardhmen kjo qeveri. E treta, është mosbesimi, që poashtu është shumë e rëndësishme. Shikoni, kur ju ndërtoni një qeveri, në një Kosovë të gjitha problemeve që i ka, të natyrave të ndryshme, është kaos në të gjitha drejtimet, minimumi që duhet bërë është që të kemi një qeveri e cila vjen me energji të reja. Një qeveri optimiste, me entuziazëm, me dëshirën për të ndryshuar, një ekip pune i cili ka harmoni brenda vetës, një ekip pune i cili e mbështet njëri-tjetrin, një ekip pune e cila e di çfarë donë, dhe është i gatshëm të merret me ballafaqimin e problemit. Çfarë ekipe kemi sot në qeverisjen në Kosovë? I kemi dy partner të cilët e kanë një mosbesim të thellë në njëri-tjetrin, e kanë një partneritet jo të natyrshëm, të domosdoshëm, siç thash me probleme morale.
TeSheshi: Kjo që po thoni, a u pa te zgjedhja e drejtorit të PTK-së?
Limaj: Do të shihet gjithkund, u pa nga dita e parë, është parë tek puna e Trepçës, është parë tek çështja e Jabllanoviçit, është parë te komunikimi për media, ju e dini nga godina e Qeverisë kur dalin për media për të dhënë qëndrim kryeministri dhe zëvendëskryeministri. Do të shihen edhe shumë e shumë efekte tjera. Do me thënë, në themel të këtij ekipe në vend të qëndrojë harmonia dhe entuziazmi, gatishmëria e vendosmëria për të punuar, në themelin e tyre qëndron mosbesimi i thellë dhe kontestimi dhe poashtu edhe dy mentalitete të ndryshme të qeverisjes. Unë nuk do të doja të isha, as nuk mund ta imagjinojë që dikush të jetë në krye të një ekipi të tillë, aq të polarizuar, aq mosbesues…
TeSheshi: Doni të thoni se nuk do të pranonit të ishit në lëkurën e Isa Mustafës?
Limaj: Unë me të thënë të drejtën, e admirojë zotin Mustafa nëse arrin të bëjë diçka nga kjo. Unë nuk do ta imagjinoja vetën në një situatë të tillë, sepse, është jashtëzakonisht vështirë nëse është qëllimi për ta ndryshuar vendin. Nëse është qëllimi për ta mbajtur status quo-n, po, është lehtë. Nëse është qëllimi që mos të ndryshohet asgjë, por për të kënaqur agjendat ditore dhe agjendat e ekipeve të caktuara duke e ruajtur status quo-n, duke mos marrë asnjë veprim për ndryshimin e mentalitetit qeverisës, atëherë do ta ketë shumë lehtë zoti Mustafa për ta ruajtur status quo-n.
TeSheshi: Dhe ju besoni se do ta ruaj status quo-n apo do ta bëjë të kundërtën, siç po thoni ju?
Limaj: Është vështirë të paragjykojë. Ne duhet t’i japim kohë. Shiko, ne jemi duke folur për treguesit që i kemi. Në bazë të këtyre treguesve që aktualisht i kemi, po ia japim një analizë, një mendim edhe një qëndrim rreth qeverisjes. Çfarë do të ndodhë në të ardhmen nuk dua të paragjykojë. Treguesit e tanishëm tregojnë që do të jetë jashtëzakonisht vështirë. Si do të rrjedhin gjërat, ta shohim. Unë më tepër besojë nga këta tregues se do të vazhdojë një gjendje amullie, letargjie dhe status quo, sesa që do të shohim energji pozitive të fuqishme në ndryshimin e gjërave. Ta shohim, koha do të na tregon.
TeSheshi: Në kohën kur ishte formuar Blloku i opozitës, flitej se ju keni qenë personi kryesor që e patë ideuar atë, pra ideatori. Pse dështoi kjo përpjekje?
Limaj: Shikoni, nuk është lehtë rotacioni. Aq më tepër në një vend sikur në Kosovë, rotacioni qeverisës dhe politik nuk është i lehtë. Duhet të ballafaqohesh me sfida, ju po e shihni edhe procesi zgjedhor është problematik në vendet e rajonit, për faktin se ne nuk kemi një trup elektoral të mirëfilltë në plotkuptimin e fjalës, ku fitojnë idetë, ku ballafaqohen idetë, ku ballafaqohen argumentet. Për neve, fatkeqësi është në Kosovë, sidomos në këto vitet e fundit po shkojmë drejtë një elektorati klientelist, votë klienteliste. Dhe ky është rreziku më i madh që ia ka bërë qeverisja vendit tonë. E ka futur në Kosovë logjikën e botës klienteliste, që do të thotë, shërbej, rriti rrogat, krijo hapësira, punësojë, e të sigurt që do ta japin votën. Punëso, rrit rroga, krijo kushte, jep subvencione, jep donacione, financo komuna të cilat e ke të sigurt që do të votojnë ju. Dhe kjo është votë klienteliste, dhe lehet pak më hapësirë demokratike për të qarkulluar idetë dhe për të përfituar idetë. Prandaj vështirësohet rotacioni. Duke e parë këtë situatë në të cilën ishte në rrezik Kosova, atëherë vijnë në shprehje marrëveshjet politike. Marrëveshjet politike të cilat bëhen për t’i ikur këtij rreziku, për tu mbrojtur nga ky kërcënim, sepse, pushteti kthehet në një regjim. Shiko në Maqedoni çfarë është duke ndodhur. Një pushtet i pakufizuar në një demokraci të brishtë, me institucione të brishta, me një pushtet ku e kap mediet, bizneset, një pushtet ku çdo gjë që frymon e monopolizon, ai është i rrezikshëm më jovetëm për shoqërinë, por edhe për vetë ata të cilët në njërën mënyrë apo tjetrën e ushqejnë dhe kthehet, dhe duke e parë këtë rrezik, në situata të tilla, grupacionet politike, nga përvoja e së kaluarës, nuk e kemi shpikur ne, ndërtojnë koalicione, marrëveshje politike për t’i bërë ballë, sepse asnjëra veç e veç s’mund t’i bëjë ballë asaj situate, prandaj, ne e kemi ngritur një rotacion. Fatkeqësisht, siç thash, rotacionet në shoqëritë tona sikur në Kosovë nuk janë të lehta, janë të ballafaquara me shumë sfida edhe jo gjithherë mund të dalin me sukses, edhe në fund ai bllok për të cilin folët ju, me gjithë atë angazhim erdhi një moment kur nuk arriti ta qojë në fund misionin e tij, për arsye siç i thash edhe më herët, ishte i sulmuar nga të gjitha anët, ishte i sfiduar nga të gjitha anët, dhe në fund, fatkeqësisht, u krijua situata e tillë që thjesht në një moment për ego personale erdhi deri tek mosrealizimi, që për mua ishte përtej egove personale.
TeSheshi: Kur po thoni ego personale, çfarë po doni të thoni, zotëri Limaj?
Limaj: E kam fjalën për ego personale kur njeriu s’mund ta tejkalojë vetveten, në emër të atij procesi.
TeSheshi: E keni fjalën për Isa Mustafën dhe Ramush Haradinajn?
Limaj: Unë e kam fjalën për kolegët e mi, pa folur në emra. Ishte një sfidë të cilën nuk munden ta kalojnë nga vetvetja. Pavarësisht kush e tek, e si. Megjithëse unë shoh diçka përtej saj. Ajo ka dalë në opinion si ego, por unë e shoh në këto rrethana të cilat kanë dërguar në atë drejtim.
TeSheshi: Pikërisht për këtë dua t’iu pyes. Gjatë atyre gjashtë muajve sa ka funksionuar Blloku, i patën dhënë fjalë dhe premtime të mëdha, por një moment LDK shkoi në “gjirin” e PDK-së. A u tradhtuat nga kjo parti, a ndjeheni i tradhtuar?
Limaj: Jo. Unë personalisht jo, unë i kuptoi hapat politik dhe nuk kam pse të ndjehem i tradhtuar. Ajo që mund të them është se një marrëveshje nuk është realizuar dhe është fatkeqësi për Kosovën. Nuk u realizua marrëveshja për rotacion, dhe këtu është dëmtuar dukshëm vendi ynë, sepse, e kishim një shans, është një shans e humbur e ndryshimit, një shans e cila do të jepte shpresë se në Kosovë do të fillojë një proces krejt ndryshe, dhe këtu ka humbur më së shumti Kosova. Zhvillimet e mëpasshme treguan që ka qenë një goditje ku ka prekur shpresën e qytetarëve, duke shpresuar që do të ndryshohet, dhe nuk ndodhi. Ndërsa, në aspektin se kush u tradhtua, së pari njerëzit duhet ta kuptojnë se a i kanë tradhtuar votuesit e tyre. Shiko, ne dolëm në vota për të marrë vota në emër të diçkaje për çka kërkohet vota dhe ju e keni obligim moral t’i qëndroni besnik, në emër të asaj që e keni marrë votën ta zbatoni. Por kjo mbetet që vetë votuesit ta vlerësojnë, t’i vlerësojnë veprimet e secilit grup politik.
TeSheshi: Dihet se gjatë asaj kohe Gjykata Kushtetuese, në një farë mënyre u patë radhitur në favor të PDK-së, gjë që pamundësojë vazhdimin e skenarit të Bllokut. Më herët folët se si qeverisja e kaluar ka futur nën kontroll çdo institucion. A është futur nën kontroll edhe Gjykata Kushtetuese?
Limaj: Ajo që kjo qeverisje e ka kapur shtetin në çdo pore të saj, këtu s’ma më asnjë dilemë vetëm ata që nuk duan ta shohin. Kur thash që rotacioni nuk është i lehtë në shoqërinë në Kosovë, sepse ai sfidohet nga të gjitha anët, edhe një arsye të sfidimit të këtij rotacioni ia ka dhënë Gjykata Kushtetuese me veprimet dhe vendimet e saja. Ju e dini që ne i kemi pranuar ato vendime, por kjo nuk nda ndalon t’i japim mendimet, qëndrimet, opinionet tona rreth Gjykatës Kushtetuese.
TeSheshi: Por thuhet se kryetari i Gjykatës Kushtetuese është i afërt me kryetarin e PDK-së, Hashim Thaçi, dhe PDK-në në përgjithësi. A besoni se PDK-ja ka pasur ndikimi në Gjykatën Kushtetuese?
Limaj: Ajo që unë besojë është se vendimet e Gjykatës Kushtetuese me mënyrën e interpretimit kanë qenë absurde dhe i qëndrojë këtij mendimi. Tash, prapavija, e asaj, nuk dua të futem, por e di që Gjykata Kushtetuese nuk i ka kontribuar, më mirë me thënë, e ka ndalë rotacionin qeverisës. Që do me thënë, në një mënyrë apo tjetër e ka sfiduar krejt angazhimin drejt një rotacioni politik ose intelektual, një nga ato sfida që ka pasur ky koalicion. Si do që të jetë, atë që e thatë ju, po është e vërtetë, pushteti e ka kapur çdo institucion. Por, nëse kjo shoqëri nuk organizohet për t’i mbrojtur institucionet demokratike, do të ketë edhe më shumë probleme.
Në pjesën e dytë të intervistës, lideri i NISMËS për Kosovë, Fatmir Limaj, flet për fatkeqësinë që e pret Kosovën nëse miratohet dokumenti për Gjykatën Kushtetuese, ashtu siç është tani. Ai apelon që urgjentisht të korrigjohen listat ku “gjithkush” është bërë invalid lufte, ndërsa thotë se për miellin që po cilësohet si krunde, duhet të flasin institucionet
Nëse deputetët e partive qeveritare e votojnë themelimin e Gjykatës Speciale, ashtu siç është paraqitur drafti i ligjit për këtë institucion, atëherë, Kosova do ta ketë një gjykatë që do të veprojë tërësisht në kundërshtim me Kushtetutën dhe jashtë juridiksionit të vendit.
Kështu ka thënë lideri i NISMËS për Kosovë, Fatmir Limaj, i cili në pjesën e dytë të intervistës për portalin TeSheshi,është ka theksuar se njëherë e përgjithmonë duhet të trajtohet lufta e bërë në Kosovë, në mënyrë që Kosova mos të ketë asnjë arsye të ndjehet e hendikepuar, por, paraprakisht duhet të analizohet dokumenti mbi bazën e së cilit do të ndërtohet Gjykata Speciale.
“Ai dokument Kushtetutës së Kosovës ia mohon sistemin juridik të Kosovës në njërën anë, por shkon edhe përtej saj”, thotë Limaj.
Ai shprehet i zhgënjyer edhe me listat e publikuara të veteranëve dhe invalidëve të luftës, veçanërisht me numrin e madh të invalidëve të luftës, ndërsa thekson se lista e invalidëve duhet të korrigjohet fund e krye, ngase, sipas tij, aty figurojnë persona që se plotësojnë asnjë kriter për tu cilësuar, qoftë me “invaliditet të lehtë”.
“Personalisht unë, jam njeri që kam qenë i plagosur në luftë dhe nuk jam invalid. Dhe aty ku më ka kapur plumbi ndjehem shumë mirë”, thotë ai.
Sa i përket problemit të millit, lideri i NISMËS për Kosovë, thotë se duhet të fajësohen institucionet, por paraprakisht, duhet të lejohen agjencitë e pavarura që ta thonë fjalën e tyre, përkitazi me analizat e mundshme. Ai ka folur edhe për arsyet që bënë që PDK-ja t’i fitojë zgjedhjet e fundit, pavarësisht nga skandalet e shumta në të cilat ishte zhytur gjatë mandatit të kaluar qeverisës.
TeSheshi: Çfarë raportesh keni me Hashim Thaçin? Kur jeni takuar për herë të fundit?
Limaj: Herën e fundit jemi takuar para zgjedhjeve, ose më mirë me thënë, para se ta marrim vendimin për ta themeluar NISMËN, në atë kohë nëse nuk gabojë, ose pas themelimit, duhet të jetë prilli, maji i vitit të kaluar. Unë kam raporte korrekte me të gjithë përfaqësuesit politik dhe ne dyshojmë në qëndrime dhe vizionin tonë politik, por përpiqem që t’i ruaj raportet korrekte, të paktën nga ana ime është kështu.
TeSheshi: Ka pasur zëra që thoshin se Thaçi ua patë ofruar edhe postin e kryeministrit me kusht që NISMA të shkojë me PDK-në. A ka pasur një ofertë të tillë?
Limaj: Shiko, ne me përfaqësuesit e PDK-së kemi qenë në një parti politike dhe kemi miq të përbashkët, dhe ato miqësi ekzistojnë edhe sot, dhe do të ekzistojnë edhe në të ardhmen, sepse ka me mijëra njerëz të cilët ne i respektojmë, sikurse që na respektojnë neve. Natyrisht, pas zgjedhjeve ka pasur takime, jo të drejtpërdrejta me mu, por ka pasur me përfaqësues të NISMËS, të cilët kanë ofruar oferta të ndryshme për të shkuar, por ne kemi qëndruar besnik të asaj për çka kemi dalë. Ne kemi dalë me një platformë politike në emër të ndryshimit dhe nuk kemi pranuar asnjë ofertë, edhe pse ka pasur oferta shumë të mëdha, bile nuk krahasohen me ato ofertat të cilat ne i kemi pasur në Bllok.
TeSheshi: Ka pasur ofertë që NISMA ta marrë postin e kryeministrit?
Limaj: Jo, nuk ka pasur oferta ta marrë postin e kryeministrit, të paktën unë s’kam dëgjuar, por ka pasur oferta, si të thuash, prej kryetarit të Parlamentit e deri tek gjysma e Qeverisë, por jo të kryeministrit.
TeSheshi: Zotëri Limaj, kur e keni themeluar ju partinë së bashku me Krasniqin, të gjitha pritjet kanë qenë që kjo do ta dobësojë PDK-në, dhe se kështu do të bie në vendin e dytë nga pozita e të qenit partia më e madhe në vend, por ndodhi e kundërta. A keni bërë ndonjë analizë, si u bë që një parti e cila ka keqqeverisur, është përfshirë në skandale të shumta, një parti që brenda vetës ka persona që e kanë shkelur dhe e shkelin ligjin, ka persona që janë më të fortë se shteti, ka persona që janë të paprekshëm nga drejtësia, sërish t’i fitojë zgjedhjet?
Limaj: Së pari besojë që NISMA për Kosovën në kushtet dhe rrethanat në të cilat është ndërtuar, dhe me një shpejtësi, ju e dini, ne me 28 shkurt i bëjmë një vit të themelimit tonë, dhe menjëherë i jemi futur procesit zgjedhor në qershor, ende pa u shtrirë, ende pa u konsoliduar. Ne i jemi futur një procesi zgjedhor pa pasur as komisioner, as vëzhgues, as strukturë të zgjeruar deri në fund. Pastaj, duke u ballafaquar me një regjim i cili ka qenë jashtëzakonisht pa kompromis dhe i ashpër në teren, nga një luftë e paparë, në kuptimin e luftës speciale që është zhvilluar në teren kundër NISMËS për Kosovën, dhe gjithë faktorët tjerë, ne besojmë se NISMA për Kosovë ka arritur një sukses të madh duke u futur në Parlamentin e Kosovës, si hap i parë. Edhe sot është një parti parlamentare e cila dallon me qëndrime alternative. Sa i përket fitores, është ajo që thash më herët, është diçka që duhet ta analizojmë të gjithë, se si është e mundur, si ka ardhur deri te kjo. Ajo që po them unë është se po shkojmë drejt një vote klientelis
TeSheshi: Po thoni se janë blerë votat?
Limaj: Po. Vota nuk blihet vetëm duke iu dhënë para, nëse mendoni se duhet t’i jepen parat në dorë njeriut që të shkojë t’iu votojë, ky është akti i fundit kriminal. Vota blihet edhe kur ju i detyroni me mijëra mësues që iu qitni drekë dhe iu premtoni rroga, vota blihet edhe kur ju jepni premtime të pambuluara, dilni nëpër komuna me qindra miliona premtoni, vota blihet kur ju hapni vende pune për dyqind-treqind polic, vota blihet edhe kur ju hapni vende pune që e mbushni Postën, vota blihet edhe kur nëpër qendra rajonale të ujësjellësve merren me qindra e qindra punëtor, vota blihet edhe kur hapni vende pune rojtar pylli. Imagjinoni, vetëm në një fshat, unë personalisht që e di, në një fshat malor, në një pjesë të territorit të Kosovës, kur unë kam shkuar në fushatë elektorale me bë fushatë, më kanë ndalë njerëzit dhe më kanë thënë, vetëm në atë fshat, që mos të gabojë i ka pasur pesëdhjetë shtëpi, trembëdhjetë rojtar pylli. Sipërfaqja e pyllit ka mundur të jetë pesëqind deri në gjashtëqind hektar. Trembëdhjetë rojtar pylli në një fshat me pesëdhjetë familje. Ata janë marrë për dy javë, deri të përfundojnë zgjedhjet. Sot ata janë pa punë prapë. Me këtë logjikë të papërgjegjësisë, të mashtrimit, të manipulimit, dihet ku kemi ardhur. Shikoni se çfarë ka ndodhur me zgjedhjet e kaluara lokale. Iu kujtohet në zgjedhjet lokale humbja e qyteteve të mëdha (nga PDK), dhe aty kishte një hapësirë, një mundësi…
TeSheshi: Ajo u pa si ngritje e LDK-së dhe arritje aty ku ka qenë – partia më e madhe…
Limaj: Po pra, por çfarë ndodhi. Shpejtë e shpejtë, prej atij momenti me një fushatë agresive të këtyre premtimeve, spekulimeve, manipulimeve, që u bënë gjithandej Kosovës, e kthyen gjendjen dhe përsëri fituan. Kur ju e keni Policinë në dorë, e keni Prokurorinë në dorë, e keni biznesin në dorë, i keni ndërmarrjet publike në dorë, i keni mediet shtetërore në dorë, çdo gjë në dorë, edhe fatkeqësisht e ke një opozitë tërësisht të përçarë, ju e dini si ka qenë opozita në të kaluarën në Parlamentin e Kosovës, bile do se kanë ditë a janë në pozitë apo në opozitë, dhe në atë situatë, të pashpresë, njerëzit janë të predispozuar të mashtrohen. Kur ju premtoni me qindra -mijëra vende pune, ata janë të predispozuar të mashtrohen sepse gjendja e tyre është e rëndë. Dhe në anën tjetër një kamp i cili nuk mund të premtojë se nuk ka çfarë të premtojë.
TeSheshi: Jeni ndër njerëzit që më së shumti jeni përballur me procese gjyqësore në raport me luftën e UÇK-së. Ndërkohë jemi në prag të themelimit të Gjykatës Speciale, e cila do t’i trajtojë “krimet e UÇK-së”. Madje raportohet se kjo gjykatë do të ketë juridiksion mbi të gjitha gjykatat, po thuhet se do të jetë shtet në vete. Cili është opinioni juaj, çfarë qëndrimi do të mbani në Kuvendin e Kosovës?
Limaj: Përgjigjen time do ta ndajë në dy pjesë. E para, ne mbështesim hetimin, vënien para drejtësisë të gjitha dyshimeve për krime lufte, ku do që kanë ndodhur. Dhe kjo nuk duhet ndalur. Por qëndrimi ynë është që hetimi, dyshimi dhe ndjekja e gjithë atyre që kanë bërë krime të bëhet jo mbi baza etnike por mbi bazë të krimit. Jo në baza etnike, vetëm për shqiptarët apo për serbët, por për krimet që kanë ndodhur në Republikën e Kosovës në kohën e luftës, pavarësisht se kush i ka bërë, pavarësisht përmasave të saja, pavarësisht nga kanë ardhur, duhet të hetohen në tërësi dhe kjo çështje të mbyllet. Ky është qëndrimi ynë. Dhe ne presim kështu, dhe kjo e ndihmon në pajtim, kjo ndihmon në mbylljen e një faqeje të errët dhe të rëndë të kaluar, jovetëm të shqiptarëve, por të gjithë atyre që jetojnë në këtë pjesë të Evropës. Do të thotë do të ketë mundësi për të ecur përpara. Çfarëdo tendence për të bërë hetime, gjykime selektive, nuk do ta ndihmojë drejtësinë, përkundrazi, do të na zgjat telashe dhe probleme në konsolidimin dhe ndërtimin e paqes në këtë vend. E sa i përket dokumentit të cilin e kemi parë këto ditë që ka qarkulluar, ai dokument prekë fondamentin e Kushtetutës së Kosovës. Ai dokument Kushtetutës së Kosovës ia mohon sistemin juridik të Kosovës në njërën anë, por shkon edhe përtej saj. Sepse, kur po flasim për ndryshime kushtetuese, njerëzit po kufizohen vetëm në ndryshimet e neneve, ligjeve, të normave juridike dhe në rregull. Jo, unë po flas për fondamentin. E fondamenti për mua është barazia e qytetarëve. E drejta e njeriut e garantuar me konventa ndërkombëtare. Do me thënë, nëse e shihni atë dokument, aty janë prekur fondamentet e të drejtave dhe lirive të individit. Aty preken fondamentet e të drejtave dhe barazisë së qytetarëve të garantuara edhe me Kushtetutën e Kosovës edhe me aktet ndërkombëtare. Dhe ky dokument si tillë, jo që është i papranueshëm, por është i turpshëm. Nuk guxon një dokument të prekë deri atje, deri në fondamentin e qenies njerëzore. Normat që janë sa është qytetërimi, normat të cilat janë qysh moti të padiskutueshme, kushdo që ka guxuar t’i prekë fondamentet, rrezikon të drejtat e individit dhe barazinë qytetare. Ne nuk jemi duke folur thjeshtë për një gjykatë, po flasim për rrezikshmërinë e shkeljes së këtyre të drejtave. Shikoni edhe i akuzuari i ka të drejtat e veta të garantuara me të gjitha aktet ndërkombëtare. Barazia e palëve është zemra e civilizimit dhe qytetërimit në drejtësinë ndërkombëtare. Askush nuk guxon me asnjë logjikë ta bëjë këtë. Haga nuk e ka bërë. Unë kam qenë në Hagë, siç e dini edhe ju, ka ruajtur themelet e arritura nga shoqëritë e civilizuara. Do me thënë, barazia e palëve dhe moscenimi i të drejtave të individit, qoftë edhe ai i akuzuar për krime lufte. Unë besojë se ky debat do të vazhdojë, por ai dokument që e kemi parë prek dy, së pari prekë sektorin kushtetues dhe juridik të Kosovës në njërën anë, dhe në anën tjetër prekë bazamentet, ose fondamentin e të drejtave të individit dhe barazisë së palëve. Në fakt, këtë, ju e dini, e ka thënë edhe ministri i Drejtësisë. Një ministër i drejtësisë i cili thotë ka ardhur një dokument i cili nuk garanton barazinë e palëve. Kur juve iu thotë një ministër i drejtësisë po e lëshojmë një dokument në Parlamentin e Kosovës, i cili rrezikon dhe nuk garanton barazinë, atëherë ju si ministër me vetëdije po bini një dokument që është në kundërshtim të plotë me bazat, me parimet e ndërtimit të kësaj shoqërie të garantuara në Kushtetutë. Kushtetuta e Kosovës një nga aktet e para e garanton këtë, barazia e palëve.
FOTO 2
TeSheshi: Por zotëri Limaj, ka gjasa që ky dokument të miratohet ashtu siç i pëlqen pushtetit, meqenëse Qeveria dihet se i ka numrat dhe s’ka probleme që i kishte gjatë legjislaturës së kaluar?
Limaj: Ndoshta, nuk e di. Do ta shohim si do të shkojë, por unë pres që njerëzit mos ta keqpërdorin. Të jemi të kujdesshëm, t’iu japim hapësirë ekspertëve të flasin për këtë punë. Duhet t’i ndajmë tri-katër cilësime, cilësimet politike, historike veç edhe ato juridike. Edhe duhet në këto fusha të veprojmë. Ky është një dokument shumë serioz, dhe donë një analizë shumë serioze, por analizë serioze nga ekspertët që merren me këtë lëmi. Këtu më harrojeni UÇK-në, UÇK-në në një anë, individët që do të shkojnë, sepse nuk është problem ajo punë. Në fund të fundit, ai që ka bërë krime le të përgjigjet për krimet e veta, por ne po flasim për shtetin, për bazat e ndërtimit të shtetit. Po flasim për një shoqëri civile, për prekjen e bazave aty ku nuk preken, dhe këtu si shoqëri kosovare, si shtet nuk duhet të lejojmë që këto të na cenohen nga askush dhe për asgjë.
TeSheshi: Jeni njëri nga komandantët e UÇK-së, ndërkohë që analisti nga Tirana, Fatos Lubonja kohë më parë ka deklaruar se komandantët e UÇK-së luftën nuk e kishin bërë për popull, por për të ardhur në pushtet dhe se tash për tash janë duke i dhunuar qytetarët. Si e komentoni këtë?
Limaj: Unë se kam lexuar, dhe se kam zakon t’i komentojë, sidomos jo intelektualët dhe analistët, të cilët në fund të fundit e kanë gjithë lirinë e mundshme t’i japin qëndrimet e tyre, por ajo që mund të them, shikoni, kur shikon nga sot, ka plot në Kosovë, qindra e qindra njerëz që janë zhgënjyer, ndjehen të zhgënjyer nga zhvillimet ku është sot Kosova, vendi ynë. Ka mijëra arsye me qenë të zhgënjyer, dhe nga mllefi, nga keqardhja, nga kjo që është sot në Kosovë, njerëzit japin vlerësime të tilla edhe për kaluarën, sepse, ndjehen keq me atë që e shohin. Unë i kuptojë reagimet e secilit veç e veç, por është distanca kohore e cila do t’i qartësojë një herë e mirë krejt atë çfarë ka ndodhur dhe çfarë po ndodhë në Kosovë, kush dhe çfarë po bënë.
TeSheshi: Zotëri Limaj, në bazë të listave të veteranëve dhe invalidëve të luftës, po del që gjysma e Kosovës kishin luftuar. Ishte kështu, apo jo, sa ushtarë i kemi pasur, apo është manipuluar me këto lista?
Limaj: Unë së pari nuk kam marrë pjesë në këtë proces, nuk kam qenë në komisione, fatmirësisht. Ajo që unë kam parë, siç po thoni ju, jam duke u frikësuar në dy gjëra, unë nuk frikësohem që në fund të këtij procesi që ndonjë ushtar i cili ka qenë ushtar dhe ka mbetur jashtë. Jam i bindur se kjo nuk do të ndodhë, sepse, i kanë qindra shokë rrethit, edhe nëse ka bërë ndonjë gabim do të përmirësohet, sepse, ai që ka qenë ushtar s’mund ta zhbënë këtë, sepse, ne e njohim njëri-tjetrin. Ose gabimi këtu mund të jetë shumë i vogël. Për këtë e kam një besim. Ajo për çka unë jam i shqetësuar është se kush është brenda, shqetësimi im është që mos po e marrin statusin e veteranit ata që absolutikisht nuk kanë lidhje me luftën, nuk kanë qenë pjesë e luftës.
TeSheshi: Por nga informatat e deritashme që mund t’i keni, kjo gjë ka ndodhur tashmë apo jo?
Limaj: Atë që po e shoh, ka, ka edhe reagime, por nga numri që po e dëgjojë e që po e shoh, nuk ka asnjë dilemë që nuk ka kritere të vlerësimit të veteranit, dikush nuk iu ka përmbajtur kritereve të vlerësimit sipas rregullit që është paraparë, e ka zbutur kriterin e vlerësimit dhe jemi rritur si numër. E kjo është me fye veteranin e vërtetë të Ushtrisë Çlirimtare të Kosovës. Dhe e dyta, ajo që unë jam i alarmuar është çështja e invalidëve. Bile, e shfrytëzojë rastin përmes jush që t’iu bëjë ftesë komisioneve përkatëse që ta bëjnë rivlerësimin e invalidëve. Kush është invalid? Kush është invalid i luftës në Kosovë. Çfarë nënkupton fjala invalid? Kush e vlerëson atë invalid? I kam parë disa emra të cilët është marre mi pa në listën e invalidëve. Nuk mjafton të plagosesh në luftë dhe të shkruhesh invalidë, këtë e kanë keqkuptuar. Edhe nëse jeni i plagosur në vijën e frontit, nuk do të thotë që jeni invalid. Shkallën e invaliditetit e përcakton mjeku nga niveli i paaftësisë, nga plaga që ju e keni sa jeni i paaftë, në gjymtyrë, në trup, ku do. Dhe nga shkalla e paaftësisë që vlerësohet nga një ekip i mjekëve, ju pastaj mund ta merrni invaliditetin. Ju mund të jeni plagosur dy-tre herë në trupin tuaj, por fatmirësisht, falë Zotit nuk keni asnjë pasojë në asnjë pjesë të trupit, çfarë invalidi jeni? Unë për shembull, personalisht unë, jam njeri që kam qenë i plagosur në luftë dhe nuk jam invalid. Dhe aty ku më ka kapur plumbi ndjehem shumë mirë. Edhe pse s’kam pasur mjekim e trajtim të mirë sepse ka qenë herët kjo, por ka dashtë Zoti dhe nuk jam invalid. Tash, pse e kam unë një plumb në trupin tim duhet të shkojë të marrë invaliditetin. Jo është keqkuptuar. Nuk po flas më për ato raste ekstre, që nuk kam qenë hiq, as nuk është plagosur. Por po flas për ushtarë. Sa nga ne jemi të plagosur në luftën çlirimtare. Nëse nuk keni pasoja nga ajo plagë, nuk jeni invalid. Dhe lironi fondet, leni ato fonde të shkojnë tek nevojtarët. Dhe posaçërisht po iu flas disa drejtuesve, komandantëve që i kam parë, nëse nuk ndjeheni me pasoja të kufizuara, ju lutëm lironi fondet, lejoni njerëzit t’i marrin ato fonde, le të shkojnë tek ata që kanë nevojë. Edhe unë e shfrytëzojë rastin t’iu them se ju si gazetar duhet ta hulumtoni, kjo është me rëndësi. Ky mund të jetë keqpërdorimi më i madh. Kam dëgjuar që në një fshat, njëri nga drejtuesit e UÇK-së, njëri nga ata që ka qenë në komision, po më tregon, po thotë në një fshat, në një rajon që s’dua t’ia përmendi emrin, njëqind invalid janë deklaruar. E krejt aty i kemi pasur njëqind ushtarë, po i bie që komplet ushtria është invalidë, secili ushtar i plagosur. Ose me iu thënë, a iu ka ra NATO, a çka u bë. Plaga është diçka tjetër, shkalla e paaftësisë dhe invaliditetit është diçka tjetër. Atë e vlerëson mjeku, dhe unë pres që kjo të ndodhë. Kërkojë nga ju që këtë çështje ta hetoni deri në fund sepse tash po dalin këta emra. Shpresojë se komisioni do të futet edhe një herë prej fillimit e deri në fund që ta shoh se cilët janë invalidët e luftës, dhe ata të shpërblehen, ndaj tyre të kemi kujdes, dhe ata të cilët nuk janë invalid t’i lirojnë ato fonde dhe mos t’i jepet statusi që iu ka dhënë deri tani.
FOTO 3
TeSheshi: Gjithsesi do ta hulumtojmë këtë çështje, por tani dua t’iu pyes diçka tjetër. Qeveria e Edi Ramës, pak kohë pasi ishte votuar në Kuvendin e Shqipërisë patë mbajtur një mbledhje të përbashkët me Qeverinë e Hashim Thaçit. Tani është paralajmëruar sërish një mbledhje e përbashkët në mes të dy qeverive. A ka dhënë fryte ajo mbledhja e parë, apo thjeshtë ishte vetëm humbje kohe?
Limaj: Çdo hap në drejtim të ndërtimit qoftë të takimeve në mes të dy qeverive, takime bilaterale, takime në mes të dy qeverive tona, është i mirë. Është në interes dhe ne e përshëndesim dhe mbështesim. Por kërkojmë që nga ato takime të dilet me strategji të përbashkët, me hapa konkret të bashkëpunimit. Është momenti kur duhet të bëhet kjo. Është e habitshme kjo ngecje e bashkëpunimit ekonomik në mes të Kosovës dhe Shqipërisë. Kjo është situatë alarmante. Kjo është për mua e habitshme. Si është e mundur që edhe pas gjithë këtyre viteve ne nuk kemi arritur ta ndërtojmë një bashkëpunim të mirëfilltë, të shëndosh ekonomik e social në të gjitha fushat në mes të Kosovës dhe Shqipërisë. Ne ende nuk kemi një korporatë të përbashkët, nuk po shohim dy biznese që kanë një grupacion të përbashkët. Ne ende nuk kemi fol, shikoni çdo vit kur vjen sezoni i bujqësisë ne kemi telashe dhe probleme qoftë nga ana shqiptare, qoftë nga ana e Kosovës. Ka ardhur koha që këto probleme me të cilat janë përballur qeveritë tona, të merren dikasteret e veçanta. Të themi për shembull nëse patatja bëhet në Kosovë dhe molla në Korrçë, t’i harmonizojmë t’i koordinojmë, dhe në mënyrë strategjike ekspertët e dikastereve të orientohen dhe të bëhen komplementare ato mallra, njëra me tjetrën. Do me thënë, po pres me hapa konkret të fillojë ndërtimi i bashkëpunimit ekonomik në mes të Kosovës dhe Shqipërisë. Për ndryshe, niveli i bashkëpunimit ekonomik që është sot në mes të Kosovës dhe Shqipërisë është i turpshëm, dhe aq i ulët për gjithë ne. Si Kosova si Shqipëria ka potenciale të jashtëzakonshme, jam i bindur që ka vullnet edhe atje edhe këtu, por ne duhet t’u ndihmojmë t’iu gjejmë rrugë, dhe këtu Qeveria e luan promotorin e inkurajimit, stimulimit, ndarjes së fondeve, e subvencioneve, benificioneve të ndryshme, për t’i stimuluar, bashkëpunuar dy pjesët e territorit. Shpresojë që iniciativa e qeverisë shqiptare dhe të Kosovës do të shkojë në këtë frymë dhe do të kalojmë nga kjo gjendje në të cilën ndodhemi sot.
TeSheshi: Një çështje që është aktuale këto ditë është ajo e miellit. Po bëhet fjalë për miell jocilësor, ose për krunde të cilat në tregun kosovar kanë përfunduar si miell. Pse gjithë kjo papërgjegjësi zotëri Limaj nga ana e institucioneve përgjegjëse në raport me shëndetin e popullatës?
Limaj: Ne duhet t’i lëmë të flasin ekspertët, unë nuk kam informacione dhe as ekspertizë. Ajo që mund të bëjmë ne dhe ju është që t’i alarmojmë institucionet përkatëse, Agjencionin e Veterinës, ato që janë të fushës, le t’i hetojnë dhe le t’i vërtetojnë, të gjitha dyshimet dhe dilemat që ngritën. Neve dhe gjithë qytetarëve të Kosovës të na japin një përgjigje çka po ndodhë. Çka do që flas është spekulim, sepse unë as nuk di as nuk di si bëhet kjo. Edhe presim nga institucionet, jo vetëm për këtë, por për çdo rast që ngritët, që ka dyshime dhe dilema. Prandaj, janë agjencionet e specializuara për t’iu thënë qytetarëve të vërtetën se çfarë po ndodhë. T’i qetësojë qytetarët ose t’iu tregojë nëse kanë ndodhur raste të tilla. Prandaj, unë pres që institucionet të dalin para qytetarëve e të tregojnë se çfarë në të vërtetë është duke ndodhur, dhe jo vetëm për këtë, por edhe për shumë gjëra tjera. Edhe për krizën për naftën. Kosova është në gjendje katastrofale me cilësinë e naftës, dhe kjo është një dëm i jashtëzakonshëm që iu shkaktohet qytetarëve të Kosovës. Dhe tash a është e vërtetë apo nuk është kjo, kjo jetë në fazën e spekulimeve dhe atyre që po dëgjojmë derisa institucionet përkatëse të specializuara nuk dalin të na tregojnë saktë se çfarë në të vërtetë po ndodhë aty. A kemi telashe me atë sektor apo jo.
TeSheshi: Kompania Devolli, e cila është importuesja e grurit në Kosovë, thuhet se është aq e fuqishme sa që i kontrollon disa medie, institucionet dhe partitë politike në Kosovë, përfshirë edhe ish-partinë tuaj, PDK-në?
Limaj: Mendimi im është që Kosova rrezikohet nga qeverisja e keqe, nga mentaliteti qeverisës. Rreziku për Kosovën është qeverisja e keqe, qeverisje e cila ka mentalitet të kapjes së shtetit dhe monopolizim të çdo gjëje. Hiqeni këtë mentalitet qeverisës dhe çdo gjë vjen në vendin e vet. Elementet negative që po ndodhin në shoqërinë e Kosovës nuk lufton në këtë mënyrë. Duhet të preket tej te koka, dhe koka në këtë rast është qeverisja e keqe. Ky mentalitet qeverisës e ka sjellë gjendjen në Kosovë këtu ku është sot, me të gjitha ato që ne sot ballafaqohemi. Ky është mendimi im dhe qëndrimi im. Në anën tjetër, bizneseve t’iu japim hapësirë dhe mundësi, sepse në fund të fundit bizneset e zhvilluara duke pasur një konkurrencë të barabartë, duke respektuar ligjin, shtohen vendet e punës. Hulumtimi duhet të bëhet tek qeverisja e keqe, tek ato institucione të pavarura, tek Dogana. Duhet të shkohet të analizohet Dogana, duhet të shkohet të analizohet ATK-ja. Neve sot na intereson, agjencionet tona shtetërore, qeveria jonë, a është duke e zbatuar ligjin. A është duke iu ofruar mundësi të barabartë të gjithëve. Ky mentalitet qeverisës, iu thash, tregon se shteti është i kapur, dhe shteti nuk kapet nga një individ, shteti kapet nga një regjim, nga një qeverisje. Qeverisja demokratike në Kosovë për katër vitet e fundit nuk ka qenë qeverisje, ka qenë regjim, duhet sa më shpejt ta ndryshojmë këtë mentalitet qeverisës, pastaj, gjërat mund të vinë në vend të vetin. Çdo gjë tjetër është e kotë./TeSheshi/
Burimi: http://tesheshi.com/interviste-fatmir-limaj-isa-mustafa-smund-ta-ndryshoje-modelin-e-pdk-se/