Shumë më mirë është të shkohet në zgjedhje sesa të vazhdohet dëmtimi i interesave të Kosovës deri në pakthim. Megjithatë, ne mendojmë se ka zgjidhje edhe pa zgjedhje. Ne jemi shumicë parlamentare, i kemi numrat dhe na takon t’i formojmë institucionet”, ka thënë Ymeri.
Zgjedhjet nuk janë zgjidhje, por janë gjendje shumë më e mirë se vazhdimi i dëmtimit të interesave të vendit. Lëvizja Vetëvendosje është e gatshme për proces të ri elektoral dhe në to do të garojë si e vetme.
Deputeti i kësaj partie Visar Ymeri, ka thënë në një intervistë për gazetën Tribuna se VV nuk e ka ndërmend që ta mbështesë bllokun në një mundësi të re që të kërkojë sqarime ose të ngritin pyetje të reja në Gjykatën Kushtetuese. “Lëvizja Vetëvendosje e sheh këtë gjykatë si të kapur dhe si e tillë jokredibile. Në aktgjykimin e fundit të saj karshi çështjes së themelimit të institucioneve Gjykata Kushtetuese jo vetëm që nuk e ka sqaruar çështjen por ka nxjerrë aktgjykim duke e shkelur Kushtetutën e Republikës së Kosovës. Faktori kryesor pse jemi sot në këtë gjendje, krahas uzurpimit që PDK ia ka bërë Kuvendit, është Gjykata Kushtetuese e cila është vendosur tërësisht në funksion të interesit politik të PDK-së”, ka thënë Ymeri. Por, sipas tij, ka zgjidhje edhe pa shkuar fare në zgjedhje sepse blloku i ka numrat dhe i takon atyre të krijojnë institucionet.
Ai ka shpjeguar se kanë kërkuar nga presidentja e Kosovës, Atifete Jahjaga, që të ushtrojë trysni në kryesuesen e seancës Flora Brovina, që të thërrasë vazhdimin e seancës sa më parë. Sipas Ymerit, është e papranueshme që deputetja Brovina vetëm se i ka takuar ta udhëheqë seancën në bazë të kriterit të moshës, ta mbajë peng atë për interesa të partisë së saj.
Tribuna: Si e vlerësoni marrëveshjen e koalicionit LAN me VV-në dhe a duhet të rishikohet kjo marrëveshje?
Ymeri: Marrëveshja e Lëvizjes Vetëvendosje me koalicionin LDK-AAK-Nisma është marrëveshje e parimeve për të mirën e vendit. Për herë të parë kemi një marrëveshje, në të cilën nuk janë fokus interesat individuale dhe grupore, por interesat politike dhe ekonomike të vendit.
Tribuna: A mendoni se brenda bllokut ka vullnet të çeliktë për ndërtimin e institucioneve pa PDK-në?
Ymeri: Tashmë është deklaruar në shumë raste refuzimi kategorik që të gjitha subjektet politike në Kosovë ia kanë bërë mundësisë së bashkëqeverisjes me PDK-së. Ekziston një dakordim i përgjithshëm se qeverisja e PDK-së në këto dy mandate e ka degraduar Kosovën ekonomikisht, politikisht dhe territorialisht. Gjatë kësaj kohe kemi shpronësim të popullit nga disa nga asetet kryesore ekonomike siç janë aeroporti dhe KEDS-i, si dhe tentimi për privatizimin e Telekomit, kemi zhvleftësim të pavarësisë së Kosovës në negociata me Serbinë, si dhe shkelje të rendit kushtetues dhe administrativ e cenim të integritetit territorial në marrëveshjet e dëmshme dhe koncesionet që kjo qeveri ia ka bërë Serbisë.
Tribuna: Nëse rrezikohet të shkohet në zgjedhje, a është më mirë që ndonjë nga partitë e bllokut t’i bashkohet PDK-së në ndërtimin e institucioneve apo vendi të shkojë në zgjedhje?
Ymeri: Shumë më mirë është të shkohet në zgjedhje sesa të vazhdohet dëmtimi i interesave të Kosovës deri në pakthim. Megjithatë, ne mendojmë se ka zgjidhje edhe pa zgjedhje. Ne jemi shumicë parlamentare, i kemi numrat dhe na takon t’i formojmë institucionet.
Tribuna: A mendoni se VLAN-i duhet t’i drejtohet Gjykatës Kushtetuese?
Ymeri: Lëvizja Vetëvendosje e sheh këtë gjykatë si të kapur dhe si e tillë jokredibile. Në aktgjykimin e fundit të saj karshi çështjes së themelimit të institucioneve, Gjykata Kushtetuese jo vetëm që nuk e ka sqaruar çështjen, por ka nxjerrë aktgjykim duke e shkelur Kushtetutën e Republikës së Kosovës. Faktori kryesor pse jemi sot në këtë gjendje, krahas uzurpimit që PDK ia ka bërë Kuvendit, është Gjykata Kushtetuese e cila është vendosur tërësisht në funksion të interesit politik të PDK-së.
Tribuna: Kur prisni të formohen institucionet?
Ymeri: Ne kemi kërkuar nga presidentja Jahjaga që të ushtrojë trysni në kryesuesen e seancës Flora Brovina, që ta thërrasë vazhdimin e seancës sa më parë. Është e papranueshme që deputetja Brovina vetëm se i ka takuar ta udhëheqë seancës në bazë të kriterit të moshës, ta mbajë peng atë për interesa të partisë së saj.
Tribuna: A është e gatshme VV për zgjedhje të jashtëzakonshme dhe a do te kandidoni si subjekt i vetëm apo ne koalicion?
Ymeri: Ne gjithmonë jemi të gatshëm për zgjedhje dhe në to garojmë si subjekt i vetëm, me programin tonë politik dhe Alternativën tonë Qeverisëse. Por, po e përsëris zgjidhja nuk janë zgjedhjet, sepse as nuk ka bazë kushtetuese për to. Zgjidhja gjendet brenda Kuvendit të Kosovës me respektimin e parimit të shumicës parlamentare.