“Do t’i kthehemi arsimit fuqishëm pasi që pa arsim as liria nuk ka kuptim. Ju drejtorë keni bërë një punë të jashtëzakonshme. Vullneti dhe gatishmëria juaj ka qenë e pakontestueshme andaj në nivel vendi kemi gjithsej 44723 fitues. Vetëm komuna e Prizrenit ka gjithsej 3241 fitues në të dyja garat në të tria nivelet. E vlerësoj shumë edhe përfshirjen e komuniteteve në Programin Nacional për Rininë, pasi që ai është hartuar për të gjithë nxënësit pa dallim, kjo është edhe e bukura e Prizrenit”.
Kështu tha Koordinatori Nacional për Kulturë, Rini dhe Sport në Qeverinë e Republikës së Kosovës, Rexhep Hoti, para drejtorëve të shkollave të komunës së Prizrenit.
Koordinatori Hoti tha se suksesi i nxënësve të Prizrenit i arritur në gara garat nacionale të Kreativitetit Kulturor dhe Mendimit Kritik dhe atyre të Diturisë nuk do të ishte i mundur pa përkushtimin e drejtorisë komunale të arsimit, drejtorëve dhe stafit të shkollave. Ai tha se gjatë realizimit të garave ka pasur sfida mirëpo janë tejkaluar në bashkëpunim me këta akter.
Ndërsa, Drejtoresha e DKA-së Vezgishi falënderoi Koordinatorin Hotin dhe drejtorët e shkollave për vullnetin e treguar për kryerjen me sukses të garave nacionale.
“Garat zhvillohen për t’u shërbyer nxënësve, ndërsa angazhimi dhe vullneti juaj ka bërë që rezultatet e nxënësve të mos mungojnë. Sigurisht se ka pasur sfida dhe lëshime, por është hera e parë që ky program po zbatohet andaj ne do ta përkrahim Programin Nacional për Rininë, një program shumë i nevojshëm për vendin tonë”, tha Vezgishi.
Drejtorët e shkollave treguan sfidat që kanë hasur gjatë garave, por shtuan se rezultatet që kanë arritur ishin më të mëdha se sfidat, e kjo për ta ka qenë një arritje e lartë si përkushtim i tyre ndaj nxënësve.
Në shenjë falënderimi për bashkëpunim dhe për kontributin e dhënë në garat e Kreativitetit Kulturor dhe Mendimit Kritik dhe garat e Diturisë, Hoti ndau mirënjohje për drejtoreshën e DKA-së dhe drejtorët e shkollave.?