Kosova së shpejti do të ketë edhe projektin e parë filmik të zhanrit të frikshëm, që po realizohet nën urdhrat e regjisorit holandez Dion Ventress.
Gjatë një interviste të dhënë për mediat amerikane, regjisori ka folur për projektin dhe temën që trajton ky film i frikshëm.
“Tregimi flet për një vajzë me emrin Adelina, e cila jeton në Kanada dhe rikthehet në Kosovë pas vdekjes së babait. Ajo mëson se ka trashëguar një shtëpi në qytetin e vogël të Kaçanikut. Derisa qëndron aty, shtëpia fillon të ketë aktivitete paranormale”.
Regjisori Ventress po ashtu ka folur për Kosovën dhe jetën këtu, duke thënë se edhe pse shumë njerëz të huaj e shohin ende si në vend me rrezik të lartë, ky është në fakt një nga vendet më të sigurta për të.