Agjencia e Akreditimit e Kosovës (AKA) nuk ua ka vazhduar akreditimin gjashtë institucioneve të arsimit të lartë.
Kolegji “Victory”, “Fakulteti Ekonomik i Lubjanës”, “EADA” School, Kolegji “VPA”, Kolegji “Humanistika” dhe “Kolegji Internacional i Prizrenit”, janë institucionet që do të mbyllen.
Kryetari i Këshillit Shtetëror të Cilësisë në AKA, Blerim Rexha, ka treguar se këto universitete të lartpërmendura nuk do të pranojnë më student të rinj .
“ Kolegji “Victory”, tani më vetëm e ka njoftuar Ministrinë e Arsimit dhe neve se nuk do të vazhdojnë pranimin e studentëve të rinj, është “Fakulteti Ekonomik i Lubjanës”, është “EADA School”, është kolegji “VPA”, kolegji “Humanistika” dhe është “ Kolegji Internacional i Prizrenit”, të cilëve iu skadon akreditimi institucional më 30 shtator 2016 dhe po ashtu të gjitha programet e studimit në këto kolegje nuk kanë kaluar fazën e plotësimit të kushteve të tyre formale. Në termat tonë praktik, i bie që këto institucione nuk kanë të dejtë të pranojnë studentë të ri në vitin e ri akademik”, ka thënë Rexha.
Ai ka bërë të ditur se institucionet e lartpërmendura kanë pasur akreditim në të kaluarën, mirëpo, ato nuk i kanë plotësuar kriteret në bazë të UA për akreditim. Ndërsa, disa të tjera nuk kanë pas interesim që ta vazhdojnë biznesin e tyre.
“Shumica prej tyre nuk i kanë plotësuar kushtet e stafit akademik, programet e studimit të kenë stafin e tyre dhe kjo është kushti i parë dhe elementar dhe pastaj vijnë edhe kushtet tjera të infrastrukturës, stafit administrativ, studentëve, e kështu me radhë siç kërkohet me UA 2/2013 dhe konform këtij udhëzimi ne e kemi refuzuar akreditimin e tyre”, ka deklaruar Rexha.
Agjencia Kosovare e Akreditimit është në proces të akreditimit të të gjitha institucioneve të arsimit të lartë në Kosovë të cilave u skadon akreditimi institucional apo i programeve të studimit. /Insajderi.com