Një grup i studentëve nga Departamenti i Matematikës në Universitetin e Prishtinës kanë protestuar sot para zyrave të Agjencisë së Akreditimit të Kosovës për të shprehur pakënaqësinë rreth mosakreditimit të këtij programi.
Petrit Avdylaj, në emër të studentëve ka thënë se vendimi i AAK-së është i padrejtë dhe në kundërshtim me të drejtat elementare për shkollim.
“Ne së bashku e kundërshtojmë vendimin e Agjencisë Kosovare të Akreditimit për mosakreditimin e programit të matematikës në Departamentin e Matematikës edhe ne themi se ky vendim nuk është aspak logjik edhe përkundër arsyetimeve të tyre
“Themi se ne kërkojmë që sa më parë të hapet një afat për programin e matematikës në Departamentin Matematik në UP ose të ketë një afat special si një lloj marrëveshje në mes të AAK-së dhe departamentit të Matematikës dhe MASHT-it”m, ka thënë ai.
Ndërsa të pyetur nëse këtë kërkesë ia kanë bërë edhe departamentit përkatës i cili është vonuar në inicimin e procedurave për akreditim, studentët janë shprehur se një kërkesë të tillë nuk e kanë bërë, duke shtuar se asnjë arsyetim i Agjencisë nuk e justifikon mosakreditimin e këtij programi.
Studentët kanë paralajmëruar edhe protesta të tjera nëse kërkesa e tyre nuk do të shqyrtohet nga UP-ja, MASHT-i dhe AAK-ja.
Mirëpo, zëdhënësi i UP-së, Ardian Gola, ka thënë se bashkëndjen me studentët, por ka shtuar se me këtë program të studimit ka pas shumë vonesa, gjë që AAK ka vendos për mosakreditim apo mosfillim të procedurave për një gjë të tillë.