Orkestra e edicionit të 28 të Festivalit të këngës së vjetër qytetare është në vlugun më të madh të përgatitjeve, e cila do t’i përcjellë live 14 këngët e edicionit të 28 të Festivalit të këngës së vjetër qytetare, që mbahet në Prizren, nga Drejtoria për Kulturë e Kuvendit Komunal, ndërsa i është besuar organizimi Studio Helix-it.
Drejtori i Studio Helix, njofton se orkestra që do t’i përcjellë live këngët përbëhet nga: violinat, violat, çelo, kitarat, kitara bas, mandolina, klarineta, flauta, fis-harmonika, saksofoni, piano sintitajzer, bateri etj. Pjesë e orkestrit sipas organizatorit janë instrumentistët e dëshmuar nga Prizreni, disa nga të cilët jetojnë e punojnë në Prishtinë, por ka edhe instrumentistë nga qytete të tjera të Kosovës dhe Shqipërisë, cilësia e të cilëve garanton performancë të suksesshme të orkestrit.
Provat zhvillohen nën përkujdesjen e kompozitorit Tomor Berisha shton Krasniqi duke e shprehur besimin se deri me 31 gusht gjithçka do të jetë e gatshme për paraqitjen sa më të suksesshme të këngëtarëve në edicionin e 28 të festivalit “Zambaku i Prizrenit”. Krahas përgatitjes së orkestrit Krasniqi njofton gjithashtu se Studio Helix është duke u angazhuar maksimalisht për një edicion më të mirë të festivalit edhe nga ana teknike.
Në edicionin e 28 të festivalit të këngës së vjetër qytetare do të paraqiten këta këngëtarë më këto këngë:
“Sa të dua o Prizren”, kompozim i Tomor Berishës, me tekst të Hivzi Krasniqit do të këndohet nga Majlinda Cikaçi e Sahit Vata;
“Sa të kam dashur” kompozim i Nexhat Maculës me tekst të Mark Gojanit, këndohet nga Albulena Jashari;
“I vetmuar jam” me tekst dhe kompozim të Arsim Kryeziut do të këndohet nga Andi Qerreti;
“Vera e hidhur” kompozim i Edon Ramadanit e tekst të autorit Agron Kalludra do të këndohet nga Denik Prizreni;
“Do t’ këndojmë e do t’ këndojmë” me tekst dhe kompozim të kompozitorit Artan Bakija do të këndohet nga vetë Artan Bakija.
“Flokëzeza” është kompozim i Irfan Blakqorit i cili gjithashtu e ka bërë edhe tekstin dhe do të këndojë këtë këngë;
“Kënga e zemrës” kompozim i Veton Perrollit, me tekst të Musa Bushranit do të këndohet nga Hysen Kafexhiu dhe Frida Toçi;
“Malli im” me teskt të Asdrenit është kompozim i Isa Jakupit ndërsa do të këndohet nga Ylberina Avdyli;
“Nuk jam shpirti yt” kompozim i Memli Kelmendit me tekst të Xhevat Kelmendit, do të këndohet nga Xhevat Kelmendi;
“A po qan lulja”, kompozim i kompozitorit Ylli Kalaja, me tekst të autorit Aulon Kalaja do të këndohet nga Rakipe Kalaja;
“Me trille t’ambla ma more zemrën” kompozim i Zyhni Beqirajt me tekst të Albana Fanit do të këndohet nga Olta Juba;
“Lermë ta puth nishanin” kompozim i Ylli Ramzotit, me teskt të autorit Matish Gjeluci do të këndohet nga Ilsi Ademi.
Krahas këtyre 12 këngëve shqipe, do të paraqitet edhe kënga turke “Sen Oldun” e kompozitorit Hisein Kazaz e cila do të këndohet nga Tolga Kazaz dhe kënga boshnjake “Aroma e bardhë e Zambakut” e kompozuar nga Shefqet Hoxha ndërsa do të këndohet nga Shaqir Ahmeti.
“Festivali Zambaku” i Prizrenit mbahet të mërkurën me 31 gusht, live në kopshtin e Kino Lumbardhit në Prizren, duke filluar nga ora 20. /PrizrenPress.com/