Analisti Imer Mushkolaj thotë se eskalimi i situatës së sotme ka qenë diçka e pritshme për shkak të një situate emocionale të krijuar qysh nga protesta e së shtunës, si dhe pas deklarimeve të zyrtarëve në pushtet në lidhje me protestën.
Një deklaratë për KALLXO.com, ai ka thënë se nuk e përkrahë dhunën që është përdorur sot dhe nuk e sheh si zgjidhje të problemeve.
Ai është habitur me deklaratat e kryeministrit Isa Mustafa dhe ministrit të jashtëm njëherit zëvendëskryeministrit, Hashim Thaçi, menjëherë pas protestës të cilët thanë se protesta e sotme kishte qëllime politike.
“Unë besoj se çdo protestë që organizohet ka qëllim politik dhe duhet të ketë qëllim politik mirëpo natyrisht se rastet e tilla shfrytëzohen nga partitë politike për arritur qëllimet e veta”, tha ai.
Ai tha se në krye të protestës kishte udhëheqës të partive opozitare dhe se situata të tilla zakonisht shfrytëzohen nga opozita.
Mushkolaj është i mendimit se nëse vazhdohet në këtë formë, mund të prodhohet një situatë e pakëndshme si ajo e vitit 2004.
“Në fokus është një ministër i cili ka qëlluar të jetë serb dhe kjo po kam frikë se do të prodhojë veprime të pamatura që mund të ndërmerren”, ka thënë Mushkolaj.
Ai e konsideron si të vonuar reagimin e kryeministrit Mustafa duke thënë se ai ishte dashur që qysh në fillim t’i drejtohej protestuesve duke i bërë thirrje që të qetësohen.
Ndërkaq, reagimin e Mustafës bashkë me Thaçin ai e ka parë si një mos guxim nga ana e kryeministrit për të reaguar dhe për të zgjidhur situatën i vetë, pa ndihmën e Thaçit.
“Unë kam pritur që të reagojë vetëm Mustafa si kryeministër por duket që Mustafa nuk e ka guximin që të reagojë i vetëm. Fatkeqësisht Mustafa nuk po është në gjendje ta menaxhojë situatën në të cilën ndodhet tash”, tha ai.
Mushkolaj thotë se qytetarët e Kosovës nuk e kanë ndërmend që të ndalen dhe referuar gjendjes së tillë, ai është i mendimit se partitë në pushtet dhe ato opozitare duhet që të mblidhen dhe të gjejnë zgjidhje.