Avokati publik i Prizrenit Besim Morina thotë se nuk ka bërë asnjë shkelje ligjore pavarësisht që ëhstë duke u përballë me organet e drejtësisë. Ai është i bindur se nuk ka shpërdoruar detyrën apo autoritetin zyrtar
Morina tregon se hetimet ndaj tij kanë nisur afër 6 muaj më parë dhe se para hetuesve të Policisë, por edhe në intervistën në Prokurori ka treguar se nuk ka shkelje ligjore nga ana e tij.
“Nëse ka shkelje atëherë këtë e ka bërë Gjykata, sepse ka marrë vendim të kundërligjshëm, ndërkohë që tani fajtori kërkohet diku jashtë”, ka thënë Morina për media.
Sipas tij, rasti ka të bëjë me ” vendim për anulim të kontratës mbi falje dhe dorëzim-posedim palëve përkatësisht ish-pronarëve të cilat deri në vitin 1998 vet Prokuroria sipas detyrës zyrtare i ka anuluar këto kontrata dhe ju ka dorëzuar pronat ish-pronarëve, sepse ju janë marrë në mënyrë arbitrare nga pushtetet e kaluara”. Sipas tij, në 5 vjetët e punës së tij ka pas vetëm 2-3 lëndë të kësaj natyre.
“Nga ana ime nuk bëhet fjalë për shpërdorim të detyrës zyrtare sepse unë nuk i marrë vendimet. Nëse një vendim i Gjykatës ka qenë i kundërligjshëm atëherë Prokuroria do të duhet ta shpallë si të tillë dhe ta hetoj Gjykatën, e jo fajin ta kërkoj te personi i tretë, i cili nuk bjen vendim, as qëndrime, por vetëm me fjalë i kundërshton pretendimet e palëve”.
“Personalisht ndjehem i dëmtuar dhe i ofenduar që të akuzohem mbi bazën e fajeve të tjerëve, përkatësisht të akuzohem për veprimet e të tjerëve”.
Ai tregon se si avokat publik komunal përballet i vetëm me 5 mijë lëndë të natyrave të ndryshme. Morina ka pranuar se në Gjykatën Themelore janë mbajtur seancat fillestare në lidhje me aktakuzën ndaj tij dhe se pritet që brenda pak javësh të nis shqyrtimi kryesor.
“Gjatë shqyrtimit kryesor besoj se do të vërtetohet se nuk kam shpërdoruar detyrën zyrtare”.
Aktakuza e Prokurorisë ngarkon Besim Morinën se në cilësinë e avokatit publik komunal i autorizuar për përfaqësimin dhe mbrojtjen e interesave lidhur me pronën e komunës pranë Gjykatës kompetente nuk e ka përmbushur detyrën e tij zyrtare , me qëllim të shkaktimit të dëmit për personat tjerë, duke shkelë me dijeni ligjin përkatësisht duke shpërdorë detyrën e tij zyrtare.
Sipas aktakuzës në një lëndë civile me paditës të nacionalitetit serb, të cilët e kanë paditë Komunën e Prizrenit për shkak të anulimit të kontratës, avokati komunal gjatë shqyrtimit gjyqësor i ka mbrojtë interesat e komunës, ku me përgjigje në padi e ka kontestuar padinë dhe kërkesë padinë e propozuar, duke kërkuar që e njëjta të refuzohet si e pabazuar.
Ndërkohë Gjykata e ka aprovuar kërkesë padinë e paditësve, mirëpo sipas aktakuzës avokati komunal nuk ka ushtruar ankesë, duke mundësuar kështu plotfuqishmërinë e aktgjykimit, dhe kësisoj dyshohet se i ka shkaktuar dëm komunës në vlerën e patundshmërisë prej 28,070 metra katrorë, në zonën kadastrale në Dushanovë.
Akti i akuzës po ashtu thekson se avokati komunal ka vepruar njëjtë edhe në një rast tjetër civil, ku gjatë shqyrtimit gjyqësor në tërësi e ka kontestuar padinë e paditësve, dhe pasi Gjykata ka aprovuar padinë, nuk ka ushtruar ankesë, ku sipas Prokurorisë dyshohet se i ka shkaktuar dëm komunës në vlerën e patundshmërisë 1,471 metra katrorë, në vendin e quajtur “Pashaallti”. Kësisoj Prokuroria e ka akuzuar se ka kryer veprën penale të të keqpërdorimit të detyrës zyrtare apo autoritetit zyrtarë, në vazhdimësi./PrizrenPress.com/