Sulmi ndaj ekipit të TV “Besës” dhe TV “Prizrenit”, që ndodhi teksa po përcillnin rrënimin e objektit të “Abi Çarshisë”, do të hetohet nga Prokuroria Themelore në Prizren.
Kryeprokurori i Prizrenit, Admir Shala tha se sulmet ndaj gazetarëve janë prioritet për prokurorinë.
“Prokuroria i ka dhënë prioritet shumë të madh veprave penale ndaj gazetarëve. Kemi prokuror të caktuar vetëm për vepra penale kundër gazetarëve”, tha Shala, shkruan “PrizrenPress”.
Gjatë aksionit të Inspektoratit për rrënimin e objekteve “Abi Çarshia”, persona të panjohur kanë kërcënuar e sulmuar kameramanin e televizionit TV “Besa” dhe TV “Prizrenit”.
Ata kanë insistuar që të mos lejohet xhirimi në prani të policëve.
Ndaj këtyre sulmeve, falje gazetarëve i ka kërkuar vetë pronari i “Abi Çarshisë”.
Asociacioni i Gazetarëve të Kosovës(AGK), ka reaguar sot ndaj sulmit të ekipeve të këtyre dy televizioneve në Prizren.
“AGK vlerëson se sjellje të tilla nga çfarëdo grupi i interesit janë të papranueshme, dhe të patolerueshme. Pengesat në punën e gazetarëve dhe punonjësve medial duhet të ndalen dhe trajtohen me prioritet nga organet e rendit”, thuhet në reagim të AGK-së.
“AGK u bënë thirrje të gjithë punonjësve medial që të kryejnë me profesionalizëm dhe etikë detyrën prej gazetari dhe njëkohësisht të raportojnë për çdo shkelje dhe keqtrajtim që iu bëhet derisa kryejnë detyrën”./PrizrenPress.com/
https://www.facebook.com/TVBESA/videos/468887900337280/