Ish-komandanti i UÇK-së dhe Zonës së Dytë të TMK-së në Prizren Selim Krasniqi, akuzon drejtuesit e institucioneve se pas përfundimit të luftës, nuk bënë asgjë për të mbrojtur pjesëtarët e UÇK -së.
Ai thotë se pjesëtarët e UÇK -së, 17 vjet pas luftës, vazhdojnë të ndiqen nga Serbia.
“Janë mbushur burgjet me ish-luftëtarë të UÇK -së. Janë dënuar ushtarë e komandantë të të gjitha zonave duke filluar nga Pashtriku, Dukagjini, Drenica,Llapi e Karadaku”, thotë Krasniqi, shkruan “PrizrenPress”.
Selim Krasniqi gjatë luftës ka qenë komandat i UÇK -së, ndërsa pas luftës i Zonës së Dytë të TMK-së në Prizren.
Ai, bashkë me “Grupin e Prizrenit” është dyshuar për krime të luftës nga UNMIK-u. Pas pesë vitesh të mbajtjes në paraburgim Krasniqi, bashkë me Bedri Zyberajn e Agron Krasniqi, është shpallur i pafajshëm.
Ai thotë se pavarësisht arrestimeve e burgosjeve, pjesëtarët e UÇK-së, vazhdojnë të ndiqen me kërkesë të Serbisë.
“Po vazhdojnë të përndiqen e burgosen ish -luftëtarët në shumë shtete të Evropës me kërkesë të Serbisë”.
Krasniqi ka reaguar pas arrestimeve të fundit të dy ushatërve të UÇK-së në Zvicër
“Në anën tjetër është formuar një Gjykatë Speciale për arrestimin, gjykimin e dënimin e luftëtarëve të UÇK -së”, shkruan Krasniqi në Facebook.
“Këto po na ndodhin edhe pse dihet botërisht, që ne bëmë një luftë çlirimtare, ku ranë shumë dëshmorë”.
“U vranë e u masakruan me mijëra qytetarë. U shkatërrua e u dogj një pjesë e madhe e pasurisë së Kosovës. E pas gjithë këtyre vuajtjeve e sakrificave të tjerët vazhdojnë të na shkaktojnë mjerim duke e paraqitur vetën viktimë”.
“Evropa po sillet sikur të ishim agresor!”.
Por, çfarë bënë liderët dhe drejtuesit e institucioneve tona?
“Në fakt edhe nuk pritet me tepër në kohën kur njerëzit më të mirë nuk mund të jenë në institucionet e krijuara me gjak e sakrificë”.
“Nëpër këto institucione ka plotë të tillë që i kanë shërbyer me devotshmëri Serbisë fashiste”. /PrizrenPress.com/