Me urdhër të Gjykatës Themelore të Prizrenit, sot në orët e mëngjesit është bastisur laboratori i Ajtene Krasniqit.
Operacioni i Policisë së Krimeve Ekonomike në bashkëpunim me Agjencionin e Ushqimit dhe Veterinës, kanë hyrë në ambientet e këtij laboratori duke regjistruar gjithçka që kishte të bënte me prodhimin e të ashtuquajturave “barna natyrale”.
Sipas kryeprokurorit të Prokurorisë Themelore, Sylë Hoxha, ky lokal është bastisur edhe herëve tjera, por e dyshuara në këtë rast, zonja Krasniqi, ka vazhduar aktivitetin e saj pa leje dhe pa licencë adekuate.
“Përveçse nuk i plotëson kushtet sanitare ku mund të prodhohet një ilaç medicinal, krimet ekonomike dhe prokuroria janë duke zhvilluar hetimet mbi një vit për përdorimin e një produkti ED -41 që është produkt ilegal dhe pas ekzaminimeve ka rezultuar të jetë i rrezikshëm për shëndetin e njeriut”, thotë kryeprokurori Hoxha për televizionin publik.
Megjithëse Krasniqi këmbëngul se duhet të vazhdojë aktivitetin e saj, institucionet e drejtësisë thonë se lokali do të mbyllet.
Në fillim të aktivitetit të saj vite më parë produkti i Ajtene Krasniqit bëri bujë, sidomos në luftimin e sëmundjes së helikobakterit. Bile në zgjedhjet e vitit 2013-të ajo u vizitua dhe u përgëzua edhe nga figura të larta politike.