Këtë javë bëhet një vit nga nënshkrimi i marrëveshjes së 19 prillit, në Bruksel, midis kryeministrit Hashim Thaçi dhe atij serb, Ivica Daçiq, raporton KTV.
Që nga atëherë, shumica e pikave të marrëveshjes mbesin të pazbatuara.
Megjithëse disa pika janë zbatuar pjesërisht, partia më e madhe opozitare, LDK-ja, konsideron se ky proces tregoi shumë pak efekte pozitive.
“Vetëvendosje” e ka kundërshtuar vazhdimisht dialogun. Ky subjekt kishte kërkuar të hyhej në dialog vetëm me kushtëzime.
Pjesa më e madhe e marrëveshjes kishte të bënte me stabilizimin e situatës së sigurisë, posaçërisht në veri.
Megjithëse në atë pjesë është themeluar një rajon i veçantë, procesi i integrimit të ish-pjesëtarëve të MUP-it dhe konsolidimi i policisë në veri mbetet një proces i papërfunduar.