Kryetari i Asociacionit te Arkitektëve të Kosovës, Valdet Osmani, ka ardhur në përfundim se në çdo vend të botës ku nuk mbizotëron ligji, rregullat dhe profesioni, krijohen qytete të ngjashme me Prishtinën dhe Prizrenin. I pari qytet udhëhiqet nga LDK-ja, ndërsa i dyti nga PDK-ja. Në një intervistë për Tribunën, Osmani ka thënë se Prishtina ka marrë formën e një qyteti kaotik që gradualisht po shndërrohet në “geto” me ndërtime të egra, arkitekturë të trullosur dhe me objekte të paplanifikuara e jofunksionale.
I gjithë ky kaos, sipas tij, është krijuar për shkak të mospunës së institucioneve. Sipas tij, për ta zgjidhur këtë problem kaotik duhet të urgjentisht të largohet mentaliteti refuzues dhe i kryeneçësisë, inatit dhe mendimi paragjykues. Osmani ka theksuar se Komuna e Prishtinës u ka ofruar arkitektëve besimin në udhëheqje dhe shërbime por për fat të keq, sipas tij, politikanëve shpesh u janë dhënë mendime dhe rekomandime joprofesionale që kanë ndikuar në këtë kaos urbanistik dhe në degradimin e Prishtinës.
Por, i pari i arkitektëve të Kosovës alarmon se nuk është vetëm Prishtina e përfshirë në këtë kaos urbanistik. Sipas tij, Prizreni ka pësuar të njëjtin fat sikurse Prishtina dhe kjo, siç thotë ai, është një fatkeqësi për vetë qytetin e Prizrenit që do të mund të ishte një qytet i mrekullueshëm dhe krenari e Arkitekturës së Kosovës. Gjersa qytetet tjera, sipas tij, janë pothuajse në të njëjtën situatë.