Numri i aksidenteve me fatalitet ka shënuar rritje këtë vit.
Vetëm për 6 muaj të këtij viti 54 persona kanë vdekur si pasojë e aksidenteve në trafik.
Nëse krahasojmë me vitin e kaluar me të njëjtën periudhë, vërejmë që numri i tyre është rritur.
Në vitin 2016 për 6 muaj kanë vdekur 50 persona në këto aksidente fatale ndërsa gjatë këtyre muajve në 2017 kanë vdekur 54 persona, shkruan Indeksonline.
Një ndër shkaktarët e vdekjeve në komunikacion janë tejkalimi i shpejtësisë mos mbajtja e distancës dhe manovrime të pasigurta me automjet.
Policia e Kosovës ka apeluar të pjesëmarrësit në trafik që të jenë vigjilent dhe të respektojnë rregullat e ligjit e trafikut.
“Duke ditur se posaçërisht gjatë këtyre muajve të sezonit veror kemi fluks më të madh të automjeteve, gjithashtu edhe qarkullimi i njerëzve është me i dendur apelojmë tek te gjithë pjesëmarrësit në trafik në veçanti drejtuesit e automjeteve, që të jene vigjilent dhe të respektojnë rregullat që dalin nga ligji i trafikut; t’i përmbahen shpejtësisë se përcaktuar me shenjat e trafikut, t’i shmangen ngasjes kur janë të lodhur/përgjumur, të mos drejtojnë automjetin nën ndikimin e alkoolit dhe mos të përdorin telefonat gjatë ngasjes se automjeteve sepse me veprime të tilla jo të sigurta po kontribuojnë në shtimin e aksidenteve dhe humbjen e jetëve njerëzore” thuhet në njoftimin e policisë.
Përveç aksidenteve më fatalitet, aksidentet me lëndime janë shtuar në këtë vit.
Përderisa në periudhën Janar-Qershor të vitit të kaluar kanë qenë 2781, në vitin 2017 kanë ndodhur 2828 aksidente me lëndime, shkruan Indeksonline.
Mirëpo, numri i aksidenteve ka rënë. Përderisa në vitin e kaluar në këtë periudhë kanë ndodhur 8285, në këtë vit kanë ndodhur 212 aksidente më pak.
Në anën tjetër, numri i tiketave të shqiptuara është rritur.
Kjo sipas Policisë, për të parandaluar aksidentet që po marrin jetën e qytetarëve.
Në vitin e kaluar për gjashtë muaj janë shqiptuar 161006 tiketa, në këtë vit janë shqiptuar 183729 tiketa për shkelje të rregullave në trafik.