Posti i kryeministrit dhe koalicioni me PDK-në e dërgojnë elektoratin drejt opozitës
Në bazë të sondazheve, të cilat OJQ-të po i bëjnë pas formimit të Qeverisë së koalicionit PDKLDK, humbja e besimit në partitë qeveritare është duke e goditur më së rëndi LDK-në.
Sipas deklarimeve të fundit të zyrtarëve të organizatave të shoqërisë civile, sondazhet flasin se Lidhja Demokratike e Kosovës tani ka zbritur deri në kuotën e besimit prej vetëm 14-15% të besueshmërisë së qytetarëve. Gjithnjë, sipas deklarimeve të OJQ-ve, që u referohen këtyre sondazheve, që nuk janë bërë publike, ky subjekt politik që po qeveris vendin, duke mbajtur postin e kryeministrit rangohet aq poshtë, saqë mbetet në pozitën e tretë pas ‘VETËVENDOSJES’, që është ngritur në pozitën e dytë.
Analistët politikë e shohin këtë debakël të LDK-së në opinionin publik tek votuesit e saj potencialë, si rezultat i gabimeve të njëpasnjëshme që lideri i saj, Isa Mustafa, i bëri në hapa, që nga fushata zgjedhore e vitit 2014 e deri në nënshtrimin para presionit të PDK-së për të bashkëqeverisur dhe duke marrë përsipër vazhdimin e dialogut me Serbinë në Bruksel dhe nënshkrimin e dy marrëveshjeve të dëmshme për interesin e shtetit të Kosovës. Asociacionin dhe Demarkacionin më 25 dhe 26 gusht të vitit të kaluar. /Kosova Sot/