Gjykata Supreme ka vendosur sot për dy ankesat e fundit të subjekteve politike, të paraqitura kundër vendimeve të Panelit Zgjedhor për Ankesa dhe Parashtresa (PZAP).
Përmes një njoftimi për media, Kolegji i Gjykatës Supreme ka njoftuar se e ka refuzuar si të pabazuar ankesën e Lidhjes Demokratike të Kosovës (LDK), dega në Prishtinë, të paraqitur kundër vendimit të PZAP-it, transmeton Express.
Po ashtu, Kolegji i Gjykatës Supreme e ka refuzuar si të pabazuar ankesën e Partisë Demokratike të Kosovës (PDK), dega në Rahovec.
PZAP-i në vendimin e marrë para pesë dite, ka refuzuar ankesat e PDK-së për Prizren, Rahovec dhe Klinë në lidhje me rezultatet përfundimtare të raundit të dytë të zgjedhjeve dhe ato të LDK-së për Prishtinë, Dragash dhe Kamenicë. Për këtë refuzim, këto dy parti janë ankuar më pas në Supreme. /Express/