SBASHK kërkon që pensionistët të paguhen shtesë përveç pensioneve.
Qeveria zotohet so do të miratojë kërkesën e SBASHK në koordinim me Ministrit e linjës
Mësimdhënësit të cilët u pensionuan në muajt mars, prill dhe maj në këtë kohë pandemie, vazhduan të punojnë me nxënësit e tyre, por nuk morën paga e as pensione. SBASHK kërkon nga Qeveria që këta mësimdhënës, përveç pensioneve, të marrin edhe paga shtesë.
E në Qeveri deklarojnë se këtë kërkesë e kanë shqyrtuar dhe kanë kërkuar nga Ministria e Arsimit që bashkë me ministritë e linjës ta shqyrtojë dhe të ofrojnë një zgjidhje ligjore për ta.
Bejtush Ibrahimi, tani e 38 vjet është mësimdhënës në ciklin e ulët, në komunën e Prizrenit. Ai më 1 prill mbushi 65 vjet, moshën e pensionimit, por pavarësisht kësaj vazhdon të zhvillojë mësimin në distancë me nxënësit e tij.
Edhe pse vazhdon të punojë, mësuesi Ibrahimi nuk mori as pagën e mësimdhënësit, e as pensionin për këta dy muaj.
“…unë jam pensionuar më 1 prill, që nga 16 marsi mbajë mësim në distancë me nxënësit dhe ka qenë një premtim dhe një marrëveshje se do të kompensohen, por deri tash nuk kam marrë as pagë e as pension kjo është një shqetësim…”
Në situatë të njëjtë në të gjithë Kosovën janë rreth 250 mësimdhënës të cilët kanë mbushur moshën e pensionimit dhe vazhdojnë të punojnë, pasi në kohën e pandemisë ishte e pamundur të realizoheshin konkurse për mësimdhënës të rinj.
Për këtë çështje Sindikalistët e Arsimit kanë kërkuar nga Qeveria që këta mësimdhënës, përveç pensionimit, të marrin edhe një shtesë që të plotësohet paga e një mësimdhënësi.
“…nëse di të ishte realizu kërkesa jonë këta mësimdhënës diku 2 – 3 muaj nuk kishin marrë pension kishin marrë pagë dhe diferenca krejt diku është 245 mësimdhënës dhe diferenca për 3 muaj do të kishte qenë 190 mijë euro shtesë, nëse si marrin pensionet i marrin pagat”, tha Ymer Ymeri nga SBASHK.
Kërkesa e SBASHK-ut ka hasur në mirëkuptim nga Qeveria e Kosovës. Në një përgjigje nëpërmjet telefonit, këshilltari në Zyrën e Kryeministrit ka vënë në dukje:
“Ne e kemi pranuar kërkesën në fjalë nga SBASHK-u. Kryeministri Kurti e ka shqyrtuar këtë kërkesë dhe e ka vlerësuar si të arsyeshme, me ç’rast i është drejtuar MASHT-it që në bashkëpunim me ministritë e linjës ta shqyrtojë këtë kërkesë dhe ta ofrojë një zgjidhje ligjore për të”
Me ligjet pozitive në Kosovë, mësimdhënësit në momentin që mbushin 65 vjet, automatikisht pensionohen dhe u shkëputet kontrata e punës.