BLERIM ÇOÇAJ
Liderët e partive politike kanë filluar të ‘zbresin’ në Prizren. Jo pse e kanë fort për zemër këtë qytet, por arsyeja kryesore është shfrytëzimi si hambarë për vota.
Në vend që të fokusohen në reformimin e partive të tyre, ata parashikojnë ndryshimin me anë të riciklimit ! Prizreni nuk mund të shpëtojë, duke ricikluar njerëzit.
Reformim dhe demokratizim, do të thotë inkuadrim cilësor i vlerave të reja, të cilat paraqesin një dimension kryesor dhe të gjerë në kuptimin e konceptit funksional dhe përmbajtjesor-strukturor.
Mosreformimi i tyre nuk është i thjeshtë dhe as mekanik. Përkundrazi, mendoj se është i ndërlikuar për shumë arsye të “thjeshta”. Nuk është vetëm vertikal, por edhe horizontal.
Fatkeqësisht liderët e partive politike, reformimin më shumë e kanë parë në aspektin formal se sa në atë konceptual .
Partia është institucioni ku qendërzohen njerëzit vizionarë e të kualifikuar në një shoqëri në tranzicion dhe më tej, por të lidhur ngushtë shpirtërisht me njerëzit e thjeshtë.
Liderët si duket ende reformimin nuk e kanë kuptuar si një proces në lëvizje, dinamikë, në zhvillim.
Prizreni ka nevojë për një ndryshim rrënjësor nga ajo që kemi parë nga paslufta. Krimi i instaluar për 17 vite, nuk mund të luftohet me riciklim, por me reformim dhe demokratizim të përgjithshëm./Gazeta Blic/