Shkruan:Astrit Gashi
Ramush Haradinaj, duhet të tregojë lidership dhe të dëshmojë se e mendon Kosovën më shumë se pozicionin e tij, duke hapur rrugë për zgjedhjen e qeverisë së Kosovës nga LAN, edhe me kushtin që ai të mos jetë kryeministër.
Haradinaj ndonëse i përzgjedhur për kryeministër me shumë vullnet dhe pas asnjë kushtëzim nga të gjitha partitë përbërësë të bllokut, tash e ka mundësinë e vetme që këtë “nder” e “rrespekt” i cili i është dhënë- ta kthej prapa, për hatër të vendit.
Gjatë këtyre më shumë se 5 muajve prej se është formuar fillimisht blloku politik LAN pastaj më një marrëveshje me VV-në edhe LVAN, në vazhdimësi janë krijuar përveçse pengesave të vendosura haptazi nga PDK-ja, edhe rrethana të reja- politike të brendshme dhe të jashtme.
Tashmë është e qartë që LVAN-it i janë paraqitur aq shumë pengesa sa që ai e ka thjeshtë të pamundur me ardhë deri te mundësia për të zgjedhur kryeparlamentarin.
Është kjo hera e parë pra në historinë e re të Kosovës, që në kombinim koalicionit qeverisës i mbetet vetëm një post, ta quajmë i madh, ai i Kryeministrit dhe me këtë edhe Qeverisë së Kosovës. Deri më tani, dhe kështu ishte edhe me qeverisjen e fundit, partitë qeverisëse ndanin mes vete kryetarin e shtetit, kryeministrin dhe kryeparlamentarin. Sot kjo nuk është e mundshme, dhe një Gjykatë Kushtetuese e cila pa asnjë dyshim ka marrë dy vendime shumë të kontestueshme, nuk do të jap përgjigje tjetër.
Puna pra ka ngecur të ridefinimi i marrëveshjes se LAN-it dhe te ndryshimet këtu- posaçërisht për pozitën e Kryeministrit.
Këtu Ramushi ka një mundësi politike, e cila është shumë me vlefshme se pozita e Kryeministrit. E ka mundësinë për ta krijuar një rrëfim i cili do ta formësoj karrierën e tij politike.
Ramush Haradinaj, nuk duhet që vet ta ndjek rrugën e atij që po don me e largu nga pushtetit. Rrugën e Hashim Thaçit e PDK, që kursesi nuk po pranojnë të lëshojnë pushtetin.
Haradinaj duhet sot të dëshmojë se e ka seriozisht në dëshirën e tij për të ndërruar pushtetin, dhe se këtë konstatim nuk e ka thjesht vetëm një maskë përmes së cilës dëshiron që ta merr pushtetin.
Dyshimet në këtë drejtim tashmë ekzistojnë- por atyre duhet t’ju bie shuplakë vetë Haradinaj.
Ai duhet të ofrojë para partnerëve të tij që heqë dorë nga pozita e Kryeminstrit, nëse kjo është ajo që duhet për të ndërtuar një qeveri të re në vend- tashmë sa më parë.Dhe këtë i përket Haradinajt që ta thotë vetë. T’ja thotë vet Isa Mustafës e Fatmir Limajt dhe me këtë ta njoftoj edhe Albin Kurtin.
Nëse Haradinaj pret që këtë temë do ta hap , tjetri, në këtë rast Isa Mustafa (Limaj thjesht nuk paraqet një pikë thyese apo kthyese), e ka gabim. Mustafa thjesht sot e ka të pamundur ta bëjë këtë, sepse i duket sikur po bënë tradhëti dhe sikur me ketë ai po e prish koalicionin.
Bisedën pra duhet me e hap Haradinaj- sepse vetëm kështu nga ajo krijohet një vlerë. Heqja dorë nga pozita, dikujt mund t’i duket dhe një padrejtësi, por liderët e burrështetasit janë lindur edhe si produkt i padrejtësive personale, për një të mirë më të madhe të vendit.
Haradinaj, sot si kryeministër i përzgjedhur nga LAN-i, duhet t’i mbledh “ministrat” e tij dhe t’ju thotë vetëm një fjalë: unë tërheqëm nga pozita, që PDK-në dhe Thaçin ta dërgojmë në opozitë.
Të kapërcejë pra nga një kryeministër në dëshirë- në një burrështetas. Kapërcim të cilin Thaçi nuk arriti ta bëjë deri në fund- edhe pse të gjithë ja kërkuan.Nesër mund të jetë vonë- dhe historia në këto gjëra di të jetë e pamëshirshme!/Gazeta Blic/