Kështu bart titullin romani i parë për fëmijë i Ilir Xheladini, i shkruar në gjuhën frënge. Është një rrëfim i tipit të fabulave, që ngjall kërshërinë fëmijërore. Iliri është një emër i ri në botën e letrave. I lindur në Kosovë, ku ka kaluar fëmijërinë dhe rininë e hershme, ai ka provuar veten si shkrimtar vetëm në gjuhën frënge. Pjesën më të madhe të jetës e ka kaluar në Zvicër, në pjesën franceze të saj, në kantonin Neuchatel.
Për portalin albinfo, Ilir Xheladini tregon se bëhet fjalë për një rrëfim i tipit të fabulave.
Merimanga Midax ka një ëndërr: të ngjitet në majën e pemës së vjetër e cila përkëdhel e para rrezet e diellit në mëngjes, dhe të shohë nëse bota vazhdon përtej lëndinës ku ai jeton. Një ditë, ai vendos dhe merr rrugën.
Gjatë udhëtimit të tij, ai takohet me xixëllonjën Etlea, me merimangën Grab dhe me Dea-në, një dallëndyshe e re, e cila lëndohet rëndë nga një skifter. Midax e shpëton dallëndyshen dhe lidhin miqësi. Ky takim shënon fillimin e një udhëtimi të gjatë dhe të rrezikshëm që do të dërgojë larg, shumë më larg se do mund të kapte imagjinata e një merimange…
Libri është botuar në Francë nga shtëpia botuese “Jetsdencre” dhe del nga shtypi më 1 nëntor.
Romani u pëlqye shumë edhe nga Patrice Garcia, i cili njihet për krijimet e tij në filma me renome si “Elementi i pestë”, “Arthur et minimoys” e shumë të tjerë, tregon Iliri. Garcia u ka dhënë njëherësh imazhet e para personazheve të Midax dhe Deas duke krijuar kopertinën e librit.
Nuk duhet harruar edhe intervenimin e Kushtrim Kunushevcit i cili u shtoi harmoninë këtyre personazheve, shpjegon më tutje Iliri rrugën e romanit nga ideja deri te botimi.
Por, si u bë që Iliri të shkruajë vetëm në gjuhën frënge? I pyetur nga albinfo.ch nëse shkruan edhe në gjuhën shqipe, Iliri përgjigjet se nuk ka guxim ta bëjë këtë. “Druaj se në gjuhën shqipe nuk do të arrij t`u jap thellësinë e duhur mendimeve dhe peshën e duhur fjalëve”.
Megjithatë, shpjegon Iliri më tutje, për t’ua ofruar këtë roman edhe lexuesve shqiptarë, ai punën do t`ia besojë një përkthyesi.
I lindur në Prishtinë në vitin 1973, Iliri në moshën 18 vjeçare ishte vendosur në Zvicër, në Kantonin e Neuchâtel-it.
“Kam punuar dhe vazhdimisht kam kryer kurse të gjuhës frënge dhe në informatikë. I pasionuar pas librave, që nga rinia kam botuar poezi dhe tregime në revista për fëmijë. I lidhur ngushtë me artin kam marrë pjesë në disa ekspozita, festivale të filmit. Kam luajtur edhe në dy filma të metrazhit të gjatë si: “Një dimër i tërë pa zjarr” i Greg Zglinski dhe “The War its Over” i Mitko Panov, thotë Xheladini.
Zanafilla e idesë për këtë libër të tij të parë i erdhi nga Albani, djali i tij, të cilit i kishte premtuar se do t’ia shkruante tregim. “Dhe kështu, faqe pas faqeje, tregimi zhvillohej duke përfunduar në një roman prej 117 faqesh”, tha ai.