Cristiano Ronaldo nuk la pa përmendur Leo Messin, edhe gjatë prezantimit të tij te skuadra e re, Juventus.
Ylli portugez u prezantua me fanellë të Juventusit para gazetarëve të hënën, pasi kompletoi transferimin e tij nga Real Madridi për 105 milionë euro.
Ronaldo, në prezantimin e tij tha se është shumë ambicioz, dhe se mezi pret të startojë sfidën e re.
Ndër të tjera, ai foli edhe për Lionel Messin, rivalin e madh të tij gjatë kohës sa të dy ishin në La Liga.
Në 10 vitet e fundit, dyshja ka dominuar me titujt e Ballon d’Or, duke fituar nga pesë secili. Por, largimi i Ronaldos nga Real Madridi ka bërë që këtij rivaliteti t’i vijë fundi.
Por, sipas Ronaldos ky nuk ishte aspak një rivalitet.
“Unë nuk i shoh lojtarët si rivalë, kjo nuk është kush jam unë”, tha portugezi.
“Ishte një sfidë e mirë me Messin. Të gjithë juve ju ka pëlqyer, dhe ishte interesante. Por unë kurrë nuk e kam parë atë si rivalitet. Ju gjithmonë dëshironi të jepni më të mirën për ekipin”, përfundoi Ronaldo.
Cristiano Ronaldo ka arritur që ta fitojë Topin e Artë katër herë në pesë vitet e fundit (2013, 2014, 2016, 2017), derisa të parin e kishte fituar në vitin 2008, si lojtar i Manchester United. /Insporti.com