Në mbrëmjen në të cilën Deontay Wilder mbrojti titullin e botës në kategorinë e rëndë të boksit profesionist përballë Luis Ortizit, u zhvillua edhe një luftë tjetër për “titull të botës” në peshën e rëndë të boksit profesionist.
Wilder luftoi në SHBA ndaj Ortizit, të shtunën, ndërsa në një vend tjetër të dhënë pas boksit, në Gjermani, Erzen Rrustemi u përball me argjentinasin 44-vjeçar Juan Pedro Guglielmetti, shkruan Koha Ditore.
Rrustemi e mbrojti “titullin e botës” në versionin World Boxing Federation, duke fituar me nokaut në raund të dytë.
Sikur kjo të mos mjaftonte, meçi Rrustemi – Guglielmetti, ishte i vlefshëm edhe për titullin e përkohshëm të botës në versionin Global Boxing Union. Pra, Rrustemi me një meç fitoi dy “tituj të botës”, përkatësisht njërin e mbrojti e tjetrin e fitoi për herë të parë.
Por versionet në të cilat boksieri 34-vjeçar nga Zhegra e Gjilanit mban titujt, janë fare pak të rëndësishëm në boksin profesionist. Boksi profesionist, si pak sporte të tjera, ofron shumë tituj të botës. Secila federatë, e ka shumë të tilla, ofron titullin e vet të botës e po ashtu edhe tituj të tjerë…