Sot në basketbollin e Kosovës në kuadër të Prince Caffe Superliga do të zhvillohen dy ndeshje interesante.
Duke filluar nga ora 19:00, Sigal Prishtina do të përballet me Istogun.
Ndërkaq nga ora 20:00 bllafaqohen Proton Cable Prizreni me Bashkimin.
Avokatja Nina Tavakoli i bashkohet ekipit mbrojtës të Thaçit
Avokatja Nina Tavakoli i është bashkuar ekipit mbrojtës të Hashim Thaçit.
Kështu ka bërë të ditur Gjykata Speciale përmes një njoftimi.
“Në bazë të rregullit 26(1) të Rregullores 1, Sekretari njofton Trupin Gjykues të miratimit të znj. Nina Tavakoli si Bashkëavokate për Hashim Thaçin dhe në përputhje me rregullën 26(1) të Rregullores dhe nenin 18(6) të Direktivës për avokatin, 2 e informon Trupin Gjykues për përfundimin e emërimit të Albert Moskowitz si bashkë-avokat i Thaçit”, thuhet në njoftim.
Tutje, bëhet e ditur se më 4 mars të këtij viti, avokati Misetic e ka informuar sekretarin se do të dëshironte të ndihmohej nga Tavakoli si bashkëavokate.
“Tavakoli është pranuar në listën e avokatëve në përputhje me nenin 7(3) dhe 18(1) të Direktivës për avokatin.3”, thuhet tutje në njoftim.
Shoqata “Bereqeti” në Prizren ndihmon familjet skamnore për muajin e Ramazanit
Shpërndarja e pakove ushqimore, dhurimi i iftareve dhe rrobave janë disa nga aktivitetet që shoqata humanitare “Bereqeti” po realizon gjatë muajit të Ramazanit.
Kurtish Hoxhaj, koordinator i degës në Prizren ka thënë se këtë vit ka reduktim të numrit të familjeve me gjendje financiare të rënduar.
“Në Prizren e kemi ‘marketin social’, aty njerëzit dhurojnë materiale, mjete, artikuj ushqimor. Në disa qendra tregtare i kemi ‘shportat e bereqetit’, ku konsumatorët kanë mundësinë ta dhurojnë një artikull ushqimor dhe pas disa ditësh artikujt i dërgojmë në marketin tonë dhe familjet vijnë e furnizohen”, ka thënë ai.
Hoxhaj ka thënë se aktiviteti i parë me rastin e fillimit të muajit të Ramazanit ka qenë ndihma ndaj veteranëve dhe invalidëve të luftës.
“Muajin e Ramazanit e kemi nisur që në ditën e parë me Shoqatën e Veteranëve në Prizren, në shenjë nderi dhe respekti për kontributin e tyre për çlirimin e vendit, por edhe duke pasur parasysh pagën e tyre minimale, 170 euro, që është e papërballueshme për ekonomi familjare”, ka thënë Hoxhaj për RTK-në.
Policia shqipton 2010 gjoba trafiku në 24 orët e fundit
Policia e Kosovës gjatë 24 orëve të fundit ka shqiptuar 2010 gjoba trafiku.
Kështu bëjnë me dije statistikat e policisë në raportin e tyre.
Ndërkaq aksidente me të lënduar janë 12 e me dëme materiale 26.
Shtatë persona janë arrestuar në 24 orët e fundit, ndërsa pesë janë dërguar në mbajtje. Dy të tjerë janë dërguar në vuajtje të dënimit.
Sot 20 vjet nga trazirat e marsit
Sot bëhen 20 vjet nga protestat e njohura si trazirat e marsit ku humbën jetën 19 persona dhe u lënduan qindra të tjerë.
Lajmi për mbytjen në lumin Ibër të tre fëmijëve Egzon Deliut, 13 vjeç, Avni Veselit, 12 vjeç, dhe Florent Veselit, 9 vjeç, teksa iknin nga një grup i të rinjve serb pati jehonë të madhe.
Një nga fëmijët e mbijetuar tregoi para kamerave se ishin ndjekur nga serbët dhe se ata ishin duke ikur, kur disa nga bashkëmoshatarët u mbytën në lumë.
Qytetarët anë e kënd Kosovës nisën protestat të nesërmen më 17 mars të vitit 2004, që shumë shpejt dolën nga kontrolla dhe pati dhunë në to.
Protesta ishte drejtuar UNMIK-ut, në kohën kur Kosova ishte nën administrimin total ndërkombëtar. Ngjarja pasoi me djegie të shtëpive e të objekteve fetare në Kosovë. Serbët u hakmorën duke e bërë të njëjtën me shtëpitë shqiptare atje.
Ndërkaq kryeministri Albin Kurti dje teksa ka kujtuar këtë ngjarje, ka thënë se paqja dhe siguria nuk mund të merren si të mirëqena.
Varfëria dhe mungesa e perspektivës rrit numrin e fëmijëve lëmosh-kërkues
200 fëmijë janë evidentuar si fëmijë lëmosh-kërkues. Këto të dhëna për Radio Kosovën i ka konfirmuar Policia e Kosovës. Sipas drejtuesve të organizatave për mbrojtjen e fëmijëve, arsyeja pse këta fëmijë janë në situatë të tillë është varfëria dhe mungesa e perspektivës.
Numri i fëmijëve të cilët janë në situatë rruge dhe janë të detyruar të kërkojnë lëmoshë, viteve të fundit ka shënuar rritje.
Policia e Kosovës, në një përgjigje më shkrim për Radio Kosovën ka bërë të ditur së gjatë vitit 2023 ishin 364 persona lëmosh-kërkues ku prej tyre janë të evidentuar 200 fëmijë.
Arsyeja kryesore që këta fëmijë detyrohen të qëndrojnë në rrugë dhe të kërkojnë lëmoshë është varfëria.
E, për ta zbutur këtë gjendje Organizata “ Terre des hommes” ka hapur dy qendra ditore në Prishtinë dhe në Prizren.
Shefi i zyrës së Organizatës “Terre des hommes” në Kosovë, Pajtim Zeqiri, i tha Radio Kosovës se sipas një studimi të fundit, 9 në 10 fëmijë, të grupeve të margjinalizuara, gjenden në rrugë si pasojë e varfërisë.
“Në këto raste vlen të theksohet së arsyeja kryesore pse këta fëmijë janë në situatë rruge është për shkak të varfërisë, kushteve të rënda socio-ekonomike dhe mungesa e perspektivës. Sipas një studimi që është realizuara së fundmi, 9 në 10 fëmijë gjenden në situatë rruge të cilët kryesisht vijnë nga grupet e margjinalizuara etnike. Këta fëmijë kryesisht janë të komunitetit rom, ashkali dhe atij egjiptian”, tha ai.
Zeqiri, foli edhe për shërbimet të cilat ofrohen në qendrat ditore për fëmijët në situatë rruge e që janë shumë të nevojshme. Ai tha së në këto qendra ditore që aktualisht janë dy në Kosovë, ofrohen shumë shërbime që kanë për qëllim fuqizimin e fëmijëve dhe njëkohësisht edhe familjen.
“Qendrat tona ditore ofrojnë një gamë të gjerë të shërbimeve. Qasja jonë, në kuptimin e shërbimeve, është një qasje e integruar. Kjo nënkupton që shërbimet tona nuk kufizohen vetëm te një shërbim të drejtpërdrejtë, por te disa shërbime të ndërlidhura më qëllim që ta fuqizojmë fëmijën dhe njëkohësisht edhe familjen”, tha Pajtim Zeqiri.
Ndërkohë, ditë më parë zyra e UNICEF-it në Kosovë ka publikuar një raport ku theksohet se fëmijët në situatë rrugë janë të moshës 6-17 vjeç dhe i përkasin kryesisht komunitetit rom, ashkali dhe atij egjiptian.
95 për qind prej tyre e shohin varfërinë si shkaktarin kryesor që i ka shtyrë të dalin në rrugë. Organizatat e ndryshme që kanë për qëllim mbrojtjen e fëmijëve, në vazhdimësi kanë vlerësuar së fëmijët në situatë rruge, paraqesin shqetësim në të gjithë Ballkanin Perëndimor. /Radio Kosova
Zhduket një 13-vjeçare në Suharekë
Është zhdukur një vajzë e moshës 13-vjeçare në fshatin Gelancë të Suharekës.
Babai i saj ka raportuar në polici se vajza është larguar nga shtëpia dhe nuk kanë njohuri për vendndodhjen e saj.
“Ankuesi m/k ka raportuar se vajza e tij e mitur (13 vjeç) viktima femer/k, është larguar nga shtëpia dhe nuk kanë njohuri për vend ndodhjen e saj. Rasti është duke u hetuar”, thuhet në raportin e policisë.
Një grua dyshohet se u dhunua seksualisht në Malishevë, arrestohet i dyshuari
Një person (femër), dyshohet se është dhunuar seksualisht nga një i dyshuar i cili është arrestuar dhe dërguar në mbajtje.
Rasti raportohet të ketë ndodhur në Malishevë, më 16 mars.
Në raportin 24-orësh të policisë, rasti është cilësuar si “dhunim”.
I dyshuari dhe viktima dyshohet se janë me probleme psikike.
Moti sot me temperatura deri në 15 gradë Celsius
Moti sot parashihet të jetë me vranësira dhe intervale me diell, ku pritet lokalisht të ketë reshje shiu.
Por, sipas Meteo Kosova temperatura maksimale të ditës do të arrijnë deri në 15 gradë Celsius.
“Era do fryjë nga veriu me shpejtësi prej 10-34 km/h. Temperaturat minimale do të lëvizin prej 5 deri në 7°C, ndërsa ato maksimale prej 11 deri në 15°C”, thuhet tutje në njoftim.
Ylli shndrit ndaj Pejës, e mposht për një pikë
Peja është mposhtur nga Golden Eagle Ylli me rezultat të ngushtë prej 72-73.
Pejanët në çerekun e parë ishin duke fituar me nëntë pikë epërsi, 24-15.
Ndërsa, suharekasit arritën që në çerekun e dytë ta ngushtojnë epërsinë në shtatë pikë, duke e fituar 10-minutëshin e dytë me rezultat 18-20.
Çerekun e tretë, Ylli arriti që ta fitonte me 13 pikë epërsi, 10-23, ndërsa çereku i fundit u takoi vendasve të cilët e fituan me rezultat 20:15, por që ishte i pamjaftueshëm për ta çuar lojën në vazhdime.
Lojtari më i dalluar te Golden Eagle Ylli ishte amerikani Nesbitt, i cili shënoi 16 pikë, dha dy asistime dhe vodhi gjashtë topa, kurse te Peja u dallua Qallaku i cili shënoi 13 pikë dhe vodhi 5 topa.