Rreshteri i Policisë së Kosovës, Habib Morina, i cili akuzohej për keqpërdorim të pozitës apo autoritetit zyrtar, të hënën, është shpallur fajtor nga Gjykata Themelore në Prizren dhe është dënuar me dy mijë euro gjobë.

Fillimisht, trupi gjykues, i kryesuar nga gjyqtari Xheladin Osmani, të akuzuarin Morina e ka dënuar me burgim efektiv prej gjashtë muajsh, por me kërkesë të të akuzuarit, dënimi me burgim prej gjashtë muajsh i është zëvendësuar me dënim me gjobë prej dy mijë eurosh.

Para se të shpallej aktgjykimi në këtë rast, palët në procedurë kanë paraqitur fjalët e tyre përfundimtare, andaj me këtë rast, prokurori i çështjes, Mehdi Sefa, ka deklaruar se nga administrimi i provave dhe dëgjimi i dëshmitarëve është vërtetuar fajësia e të akuzuarit.

Sefa ka kërkuar që i akuzuari të shpallet fajtor dhe me rastin e shqiptimit të llojit dhe lartësisë së dënimit, të merret parasysh se i akuzuari për herë të parë është akuzuar, se i njëjti është familjar dhe ka shërbyer për shumë vjet në Policinë e Kosovës.

Ndërsa, i akuzuari, Habib Morina, ka paraqitur me shkrim fjalën e tij përfundimtare, në të cilën ka thënë se është akuzuar padrejtësisht pasi që, sipas tij, edhe dëshmitarët kanë vërtetuar se ai nuk ka pasur dijeni për kamionin e ndalur me çimento qysh pretendon prokuroria.

Morina ka thënë se të gjitha veprimet i ka ndërmarrë sipas normave ligjore dhe kompetencave të tij, duke mohuar se me qëllim ka kryer një veprim për t’i sjellë dobi pasurore dikujt tjetër, apo për ta dëmtuar dikë. Për më tepër, ai ka thënë se rasti atë natë vetëm ka filluar dhe veprimet për të cilat pretendon prokuroria se nuk i ka ndërmarrë, të njëjtat veprime sipas tij, janë ndërmarrë ditën e nesërme dhe se të dëmtuarit në këtë rast i është kompensuar dëmi.

I akuzuari, po ashtu në fjalën përfundimtare, ka thënë se nuk ka pasur qasje në tërësinë e lëndës kundër tij andaj ka thënë se është dashur të merren të gjitha procesverbalet e bëra nga policia në këtë rast ku do të dëshmoheshin veprimet e ndërmarra dhe koha kur janë ndërmarrë.

Sepse, sipas Morinës, nuk qëndron fakti se ai është lajmëruar menjëherë kur është ndaluar i personi me çimento, por më vonë kur edhe është lajmëruar rasti për vjedhje nga i dëmtuari, e që veç personi ishte larguar nga pika e kontrollit. Andaj ka kërkuar që të lirohet nga akuza.

Ky rast zhvillohej në bazë të aktakuzës së Prokurorisë Themelore në Prizren, të ngritur ndaj Habib Morinës, të cilin e akuzon se duke vepruar në cilësinë e zyrtarit policor, ka keqpërdorur pozitën e tij zyrtare. Sipas aktakuzës, Morina, me qëllim që t’i shkaktojë përfitim material Miftar Papës, ka lejuar që i njëjti të largohet me 39 thasë çimento të vjedhur, me ç’rast i ka shkaktuar dëm Nuhi Bytyqit.

Aktakuza përshkruan se si pala e dëmtuar Nuhi Bytyqi nga Suhareka, kishte lajmëruar rastin në Stacionin Policor të Suharekës, për vjedhjen e 39 thasëve çimento nga oborri i shtëpisë së tij.

Sipas aktakuzës, në të njëjtën kohë, gjatë një pike kontrolli është ndaluar Miftar Papaj, i cili kishte të ngarkuar në automjet 39 thasë çimento, mirëpo rreshteri Morina nuk kishte lejuar që i njëjti të ndalohej dhe të konfiskohej sasia e çimentos së bashku me automjetin.

I akuzuari B. Gj., të martën, është dënuar nga Gjykata Themelore në Prizren me një vjet burgim dhe 1 mijë euro gjobë, për posedim dhe shitje të narkotikëve.

Po ashtu, edhe i akuzuari për përdorim të substancës narkotike, të llojit marihuanë, Kushtrim Kabashi, është dënuar me 500 euro gjobë.

Kryetari trupit gjykues, Xheladin Osmani, ka shpallur aktgjykimin dënues për të akuzuarit, duke shtuar se si rrethanë lehtësuese në këtë rast janë marrë pranimi i fajësisë nga të akuzuarit, mosha e tyre relativisht e re dhe se për herë të parë kanë rënë ndesh me ligjin.

Ky rast zhvillohej në bazë të aktakuzës së ngritur nga Prokuroria Themelore në Prizren, me të cilën, B. Gj. akuzohej për blerje, posedim, shpërndarje dhe shitje të narkotikëve të llojit marihuanë.

Sipas aktakuzës, të akuzuarit i është gjetur rreth 700 gramë narkotik të llojit marihuanë, të përgatitur në foli alumini për t’i shitur.

Ndërsa, i akuzuari K. K., akuzohej se më 6 dhjetor 2016, në një kafene në Prizren, në prani të të akuzuarit Gjinovci dhe disa shokëve tjerë, ka poseduar 0.75 gram narkotik të llojit marihuanë, në formë të cigares, të cilën e ka përdorur.

Kandidati i Nismës për kryetar të Prizrenit, Zafir Berisha, kërkon nga qytetarët mbështetje pr t’u zgjedhur kryetar i Komunës.

Sipas tij, Prizreni deri më tash është keqqeverisuar nga njerëzit e papërgjegjshëm.

Postimi në Facebook
Me 22 tetor mbahen zgjedhjet për kryetar të Prizrenit , prandaj më lejoni me shumë respekt t’ju drejtohem me këtë letër permes së cilës kërkoj mbështetjen tuaj, që bashkarisht të angazhohemi në 4 vitet e ardhshme për të ruajtur krenarinë dhe identitetin kulturor e historik të qytetit tonë të bukur.

Prizreni për vite të tëra është qeverisur nga njerëz të papërgjegjshëm, të cilët kanë keqpërdorur besimin tuaj për interesa personale dhe të grupeve parapolitike; duke na bërë të ndihemi keq të gjithëve si qytetarë të ndershëm, me skandalet korruptive të tyre.

Mbështetja juaj për vizionin dhe ekipin e Nisma-s që në zgjedhje mban nr. 31, është mbështetje për vendosmërinë tonë, për t’i rikthyer krenarinë e nëpërkëmbur, qytetit të Prizrenit.
Me respekt Zafir Berisha

Kryetari i Lëvizjes Vetëvendosje në Prizren,Artan Abrashi ka komentuar publikimin e fotografive të Mytaher Haskukës në aktivitetet e PDK-së.

Abrashi thotë se Haskuka ka qenë mësues i kuadrove të lartë të PDK-së, LDK-së, AAK-së dhe partive tjera politike.

Postimi i plotë në Facebook

Prof.Dr.Mytaher Haskuka si drejtues i lartë i UNDP-së në Kosovë ka marrë pjesë në trajnimet e shumta të kuadrove të lartë të PDK-së, LDK-së, AAK-së dhe partive tjera politike.

Por pasi nxënësit e tij nëpër parti dolën harama që e katranosën keq vendin, si mësues i urtë dhe i përgjegjshëm vendosi t’i marr gjërat vet në dorë.

Ai pas fitores në zgjedhjet parlamentare si deputet, tani garon për Kryetar të Komunës së Prizrenit si kandidat i Lëvizjes VETËVENDOSJE!

I falemnderojmë sinqerisht kundërshtarët tanë që na e rikujtojnë vazhdimisht peshën e tij.

Kandidati i PDK-së për kryetar të Prizrenit, Shaqir Totaj, ka marrë mbështetje nga të rinjët e subjektit të tij politik.

“Rinia Demokratike e Kosovës Prizren, në takimin e mbajtur me kandidatin për kryetar, njëherit kryetarin e ardhshëm të Prizrenit, z.Shaqir Totaj, treguan gaditshmëri dhe optimizëm në përkrahjen e fuqishme për numrin 94 dhe Partinë Demokratike të Kosovës”, thuhet në komunikatën e PDK-së në Prizren.

“Njëzëri, ata konstatuan se i vetmi vizion i cili garanton mundësi të mëdha për rininë dhe fuqizimin e tyre është ai i PDK-së dhe kryetarit Totaj”.

“Kandidati për kryetar komune, z.Shaqir Totaj u shpreh i entuziazmuar nga numri i madh i strukturës së të rinjve të PDK-së në këtë takim, duke qenë i bindur se kjo rini do të jetë uragani i fitores së 22 tetorit dhe mbështetja më e madhe për të, si kryetar i ardhshëm i komunës së Prizrenit”.

“Nga ky takim u transmetua mesazhi se PDK vazhdon të jetë e vetmja forcë politike në Prizren e cila e ka platformën qeverisëse më të qëlluar për të rinjët e kësaj komune”.

Zafir Berisha, kandidat për kryetar të Prizrenit, në njërin nga tubimet e mbajtura me banorët e fshatit Billushë ku edhe kishte lindur, u ka kërkuar atyre të bëhen pjesë e Nismës.

Ai ka thënë se Nisma është garancë për ndryshim në qeverisjen e Prizrenit.

Sipas një komunikate të Nismës, bëhet e ditur se Berisha i ka siguruar vendasit e tij se fshati do të jetë pjesë e planeve për investime, çka ishte anashkaluar nga qeverisjet e kaluara.

Më poshtë gjeni komunikatën e plotë të Berishës:

Zafir Berisha në vendlindjen e tij, u zotua për angazhim edhe më të madh në interes të qytetarëve!

Shkolla fillore “Dëshmoret e Vrrinit”, në fshatin Billushë (Kushtrim), ishte e ngushtë për ti zënë të gjithë të interesuarit, që kishin dal për ta prit kryetarin e ardhshëm të Prizrenit, nga radhet e NISMA për Kosoven, Zafir Berisha. Në vendlindjen e tij kryetari Berisha kerkoi nga të gjithë pranishmit jo për të votuar, sepse kjo veç është e nënkuptuar, por për tu bërë pjesë e ekipit të madh të NISMA-s, i cili është një garancë për një qeverisje ndryshe në Prizren. Z. Zafir Berisha i siguroi vendasit e vet, se edhe si kryetar i komunes do të mbetet ai që ka qenë si në femijërinë e hershme dhe fshati i tij i lindjes do të rikthehet në hartat e investimeve të komunes së Prizrenit, i cili për shtatë vite rreshtë për fat të keq ka qenë i anashkaluar. Z. Berisha mes tjerash tha se, ka besimin e plotë të qytetarëve të Vrrinit dhe Prizrenit për të udhëhequr në katër vitet e ardhshme.

Ndërsa kryetari i nëndegës në fsh. Billushë, Pranverim Berisha, kandidat i nominuar për kuvend komunal, tha se kandidati për kryetar Zafir Berisha dhe ekipi i tij, jo vetëm që din, por edhe kan guximin të punojnë për interesat e qytetarëve të komunes së Prizrenit, për dallim nga kandidatët tjerë.