Inspektori i Sektorit të Inspektimit për Arsim (SIA) në Prizren, Qemajl Bytyqi, gjatë gjykimit të drejtorit në Drejtorinë Komunale për Arsim (DKA) në Suharekë, Sherif Berisha, tha se pas inspektimit që kanë bërë në atë drejtori, kanë gjetur se konkursi për mësimdhënës ka mangësi.

Bytyqi këtë deklaratë e ka dhënë të mërkurën, në Gjykatën Themelore në Prizren, ku ishte ftuar të dëshmonte në rastin ndaj Berishës, i cili po akuzohet për keqpërdorim të pozitës apo autoritetit zyrtar.

Dëshmitari Bytyqi deklaroi se DKA-së i kishin dhënë afat për të evituar mangësitë e konkursit, por pas inspektimit të serishëm është vërejtur se ato parregullsi nuk janë evituar.

I njëjti tha se në konkursin për mësimdhënës, nuk ishte përcaktuar lloji i lëndës për të cilën kërkohet mësimdhënësi, por se ishte cekur në përgjithësi që kandidati duhet të posedojë diplomë të fakultetit të bujqësisë. Sipas deklarimit të tij, DKA-ja ka pasur afat të ankesës brenda 8 ditëve por të njëjtën nuk e shfrytëzuar.

Në këtë seancë ka dëshmuar edhe Fatmire Elshani, nga ankesa e të cilës edhe ka filluar ky rast penal. Ajo ka thënë se kishte konkurruar në konkursin për mësimdhënës në shkollën profesionale “Abdyl Rama” në fshatin Shirokë të Suharekës, por megjithëse kishte pasur përgatitjen e duhur profesionale, nuk ishte pranuar në punë. Ajo pastaj kishte bërë padi civile të cilën padi edhe e ka fituar në shkallë të parë, por vendimi është ankimuar nga DKA-ja dhe ende gjendet në Gjykatën e Apelit.

Para dëgjimit të dëshmitarëve, prokurorja e rastit, Ervehe Gashi, ka lexuar aktakuzën, për të cilën i akuzuari Berisha është deklaruar edhe një herë i pafajshëm.

Në fjalën hyrëse, prokurorja Gashi deklaroi se pas administrimit të provave dhe dëgjimit të dëshmitarëve, do të vërtetohet se i akuzuari ka kryer veprën penale me të cilën ngarkohet.

Ndërsa mbrojtësi i të akuzuarit Berisha, avokati Brahim Sopa, tha se rasti penal ndaj klientit të tij është i parakohshëm pasi që një procedurë gjyqësore është duke u zhvilluar sa i përket këtij rasti. Ai ka thënë se edhe një shkresë e Ministrisë së Arsimit e mbështet idenë se kallëzimi penal i bërë nga SIA ka qenë i parakohshëm, pasi që nuk janë shterur të gjitha mjetet juridike.

Gjatë kësaj seanca, trupi gjykues i kryesuar nga gjyqtari Xheladin Osmani ka bërë edhe leximin e shkresave të lëndës. Ndërkaq, seancën për dëgjimin e të akuzuarit, e caktoi për 15 maj 2017, në ora 9:30.

Në dhjetor 2016, Prokuroria Themelore në Prizren, ka ngritur aktakuzë ndaj Sherif Berishës, të cilin e ngarkon me veprën penale “keqpërdorim i pozitës apo autoritetit zyrtar”.

Sipas aktakuzës, Berisha, në cilësinë e drejtorit të DKA-së në Suharekë, nuk ka respektuar një rekomandim të SIA-s në Prizren, për anulimin e konkursit për mësimdhënës.

SIA kishte rekomanduar që konkursi për rekrutimin e mësimdhënësve për shkollën e mesme profesionale “Abdyl Rama” në Suharekë, të anulohet dhe të ri-shpallet në afat prej 8 ditësh.

Sipas organit të akuzës, me këto veprime i akuzuari ka kryer veprën penale të keqpërdorimit të detyrës zyrtare dhe ka shkelur rëndë të drejtat e personave tjerë, konkurrues në konkursin në fjalë.

Berisha poashtu është duke u gjykuar edhe në një rast tjetër penal, në të cilin akuzohet se ka punësuar, pa konkurs, rreth 9 mësimdhënës, në shkollat e Komunës së Suharekës./etimiperdrjtesi/

Në fshatin Greikoc dhe Vraniq të Suharekës janë përkujtuar dëshmorët dhe martirët e rënë për lirinë e vendit.

Kryetari i Komunës së Suharekës, Sali Asllanaj, tha se respekti më i mirë për dëshmorët është respekti për shtetin tonë.

“Nëse ne punojmë, angazhohemi që shteti të jetë funksional, të jetë i mirëfillt social dhe i zhvilluar ekonomikisht, ku buxheti ndahet proporcionalisht për të gjithë, atëherë besoj që kemi përmbushë amanetin e dëshmorëve”, tha Asllanaj.

“Nëse të gjithë angazhohemi në këtë drejtim, atëherë unë besoj që këta vërtetë do të pushojnë qetë në varret e tyre”.

Në të dyja tubimet përkujtimore, janë evokuar kujtime dhe u fol për betejat e lavdishme të UÇK-së./PrizrenPress.com/

I akuzuari për sulm XH.N, të mërkurën, u dënua me dy  muaj burgim efektiv, nga Gjykata Themelore në Prizren.

Pas leximit të akuzës, nga prokurori i çështjes Zejnullah Gashi, i pandehuri N, i cili nuk kishte të angazhuar avokat mbrojtës, e pranoi fajësinë për veprën penale me të cilën ngarkohej.

Sipas aktakuzës së Prokurorisë Themelore në Prizren, XH.N me 22 mars 2017, në shtëpinë e tij në Prizren, kishte përdorur forcë ndaj të dëmtuarës – bashkëshortes së tij, duke i shkaktuar lëndime të lehta trupore. Këtë e kishte bërë pas një mosmarrëveshje në mes të fëmijëve të tyre për një kompjuter.

Më këtë rast i pandehuri kishte kryer veprën penale “sulm” nga neni 187 paragrafi 3 lidhur me paragrafin 1, të Kodit të Ri Penal të Republikës së Kosovës, sipas të cilës kryesi dënohet me burgim prej 6 muaj deri në 3 vjet./betimiperdrejtesi/

Të mërkurën ishte paraparë të mbahej shqyrtimi gjyqësor në rastin e të akuzuarve për rrezikim të trafikut publik, Sala Kushaj dhe Artan Krasniqi. Shkak ishte mungesa e dëshmitarëve të thirrur për t’u dëgjuar në këtë seancë.

Ndryshe, prezent në gjykatë ishin prokurori Fatos Ajvazi, dy të akuzuarit të cilët nuk kishin mbrojtës, si dhe përfaqësuesi i të ndjerës L.G, bashkëshorti R.G.

Gjykatësi Refki Piraj, shqyrtimin e radhës e caktoi për 2 qershor 2017 në ora 10:00.

Sipas aktit akuzues, Kushaj dhe Krasniqi, me 21 maj 2015, rreth orës 21:00, në rrugën magjistrale Prizren – Suharekë, nga pakujdesia rrezikojnë trafikun publik. Këtë e bëjnë në atë mënyrë që e akuzuara Kushaj, me automjetin “Opel Astra”, kyçet në rrugë nga parkingu i qendrës tregtare “A-N”, dhe në atë moment kritik, goditet në pjesën e përparme nga i akuzuari i dytë i cili ishte në automjetin “BMË”. Nga goditja, automjeti i të akuzuarës bën lëvizje nëntëdhjetë shkallë, dhe godet automjetin e tipit “Golf 3” i cili ishte në parkingun e qendrës tregtare. Nga lëndimet e marra nga kjo goditje, ndërron jetë tani e ndjera L.G. Lëndime pësojnë edhe bashkudhëtaret tjerë.

Sipas këtij dispozitivi, të akuzuarit kanë kryer veprën penale “rrezikim i trafikut publik”, nga neni 378 paragrafi 9 lidhur me paragrafin 6, të Kodit Penal të Kosovës, e cila dënohet me burgim prej një deri në tetë vite./betimiperdrejtesi/