Naim Maloku ka thënë se është pro arritjes së një koalicioni ndërmjet PDK-së, LDK-së dhe AAK-së. Ai ka kërkuar nga liderët e këtyre tri partive politike të heqin dorë nga postet udhëheqëse në mënyrë që vendi të dalë nga kriza.

Politikani Naim Maloku ka thënë të dielën se në këtë fazë do të mund të funksiononte edhe një formulë qeverisëse PDK-LDK-AAK.Në këtë intervistë për “Epokën e re”, ai ka thënë se nëse arrihet një formulë e tillë, ajo duhet të bëhet për katër vjetët e ardhshëm sepse Kosovës do t’i sillte stabilitet politik. “Me një koalicion të tillë për katër vjetët e ardhshëm Kosova do ta fitonte stabilitet politik të fuqishëm, një qeveri të fuqishme e cila do ta mbante më lehtë barrën e dialogut me Serbinë dhe proceset të cilat Kosova duhet t’i përfundojë me sukses në raport me integrimet euroatlantike. Prandaj, mendoj se të tre liderët duhet të japin diçka nga vetja dhe pikërisht ky kishte me qenë mossynimi në pozitat udhëheqëse”, ka deklaruar Maloku, duke kërkuar nga liderët kryesorë, Hashim Thaçi, Isa Mustafa dhe Ramush Haradinaj, të heqin dorë nga postet udhëheqëse në mënyrë që vendi të dalë nga kriza.

“Një marrëveshje më e shpejtë dhe më e qëndrueshme do të arrihej në qoftë se Thaçi, Mustafa dhe Haradinaj pajtohen të mbesin deputetë, por që në pozitat e para udhëheqëse t’i zgjedhin njerëzit nga partitë e tyre. Kjo do të kishte me qenë mënyra më e lehtë për ta tejkaluar krizën aktuale politike”, është shprehur Maloku. Sipas tij, është e nevojshme që ata t’i qesin interesat e Kosovës në rend të parë dhe t’i marrin seriozisht proceset dhe t’i çojnë përpara.

“Nuk shoh zgjidhje tjetër meqë AAK-ja nuk hyn në koalicion me Hashim Thaçin kryeministër dhe anasjelltas PDK-ja e ka vështirë që pas këtyre katër muajve ta pranojë Ramush Haradinajn kryeministër. Prandaj, është problematike që Thaçi ose Haradinaj të jetë kryeministër sepse aq shumë kanë shkuar armiqësitë dhe konfliktet verbale saqë nuk e shoh të realizueshme një gjë të tillë”, ka theksuar Maloku. Ai ka vlerësuar se më e keqja që i ka ndodhur Kosovës është bllokimi i institucioneve dhe moskomunikimi i skenës politike.

“Mendoj se më e keqja që i ka ndodhur Kosovës është bllokimi i institucioneve dhe moskomunikimi i skenës politike. E gjithë kjo mund të jetë më dëme afatgjata, prandaj çdo zgjidhje që e zhbllokon këtë situatë është e mirëseardhur për Kosovën dhe qytetarët e saj”, ka thënë Maloku.

Pas vizitës së senatorit amerikan, Christofer Murphy, në Kosovë, liderët e subjekteve politike i kanë ulur “gjakrat” rreth tejkalimit të ngërçit politik.

Madje, brenda kësaj jave partitë që kanë formuar Bllokun LAN do t’i drejtohen Gjykatës Kushtetuese për të dhënë sqarime shtesë lidhur me konsumimin e PDK-së për bërjen e qeverisë dhe interpretimin e pikës 127.

Bajram Gecaj, nga LDK-ja, ka thënë se koalicioni nuk ka lëvizur aspak nga qëndrimet e tij edhe përkundër vizitës së senatorit amerikan, Christofer Murphy. “Vizita e tij aspak nuk mund të kuptohet si presion mbi klasën politike në vend. Gjatë kësaj jave ne do t’i drejtohemi Gjykatës Kushtetuese për t’i thënë se vendimin që e ka sjellë nuk po funksionon, atëherë Gjykata duhet ta gjejë zgjidhjen”, ka thënë Gecaj./zeri/

Në mesin e mbi pesë mijë policëve serbë, prezentë në ndeshjen mes Serbisë e Shqipërisë, kishte edhe policë me prejardhje nga Kosova.
Madje, ata edhe po flisnin shqip me dhjetëra shqiptarë që ishin prezentë në stadiumin e Partizanit.

Këtë e ka konfirmuar për “Zërin” gazetari nga Tirana, Blendi Fevziu, i cili ishte pjesë e një grupi prej rreth 50 vetash që kishin shkuar në Beograd për ta shikuar lojën mes serbëve dhe kuqezinjve.

Ky grup i shqiptarëve ishte vendosur në hapësirën VIP të stadiumit të Partizanit, për shkaqe sigurie, teksa për sigurinë e tyre po përkujdeseshin edhe policët nga Kosova, të cilët pas luftës janë zhvendosur në Serbi apo pas shpalljes së pavarësisë në vendin tonë. /zeri/

Pankarta e madhe e vendosur në stadiumin e Partizanit më mbishkrimin “Kosova është Serbi”, nuk bën të ndikojë në agjendën shtetërore të Kosovës. Kështu vlerësojnë, njohësit e marrëdhënieve ndërkombëtare. Sipas tyre, presidentja e Kosovës, nuk duhet të anulojë pjesëmarrjen në konferencën e Beogradit e paraparë të mbahet më 1 nëntor. Ndërkohë, Arbër Vllahu, zëdhënës i presidentes ka thënë se ende nuk kanë vendosur nëse presidentja Jahjaga do të marrë pjesë në konferencën e organizuar në Beograd.

“Ftesa e grupit evropian të Komisionit Trilateral për pjesëmarrje në konferencën e organizuar në Beograd, është duke u analizuar dhe vlerësuar. Opinioni publik në Kosovë do të njoftohet me përgjigjën e Zyrës së presidentes, brenda ditësh”, ka thënë Vllahiu. Për profesorin e marrëdhënieve ndërkombëtare, Afrim Hoti, zhvillimet e fundit në Serbi nuk janë arsye që presidentja Jahjaga të mos jetë e pranishme në konferencë në Beograd. Sipas tij, këto zhvillime nuk do të duhej të ndikonin në agjendën e të parës së shtetit.

“Mendoj se pavarësisht zhvillimeve ditore, presidentja Jahjaga, duhet me ndjekë agjendë dhe mandat të qeverisjes shtetformuese dhe në këtë drejtim për aq kohë sa ftesat t’i vijnë nga çfarëdo mekanizmi serioz ndërkombëtar, ajo duhet t’u përgjigjet pozitivisht. E kuptoj edhe frustrimin dhe tensionet e krijuara kohëve të fundit, sidomos pas zhvillimit të ndeshjes mes përfaqësueses së Shqipërisë me atë serbe, megjithatë nëse duhet dikush të izolohet, ajo duhet të jetë Serbia dhe në asnjë mënyrë Kosova e Shqipëria”, ka thënë Hoti./tribuna/

Gjykata Kushtetuese nuk pritet ta marrë në shqyrtim kërkesën e Avokatit të Popullit, Sami Kurteshi, për çështjen e vazhdimit të mandatit të tre gjyqtarëve ndërkombëtarë nga ana e presidentes, Atifete Jahjaga. Burime të gazetës pranë Gjykatës Kushtetuese kanë bërë të ditur se refuzimi do të bëhet me arsyetimin se gjyqtarët ndërkombëtarë, të cilët janë pjesë e Gjykatës Kushtetuese, janë palë në këtë proces dhe nuk mund të japin opinion për veten e tyre.

Kësisoj kjo gjykatë do t’i kërkojë Avokatit të Popullit, që lëndën ta dërgojë në Komisionin e Venecias për shqyrtim. Sipas këtyre burimeve, gjykata gjithashtu do të refuzojë edhe kërkesën e mundshme të LDK-së, për sqarim shtesë rreth opinionit për çështjen e kryeparlamentarit. Për Gjykatën Kushtetuese është totalisht e papranueshme kërkesa eventuale për sqarime shtesë rreth opinionit të tyre, pasi një kërkese e tillë vë në dyshim edhe vet profesionalizmin e gjykatës.

Ndërsa kohë më parë, kryetari i Lidhjes Demokratike të Kosovës, Isa Mustafa, në një postim në rrjetin social facebook, kishte kërkuar nga presidentja e vendit që ta shohë më qartë se kujt i takon mandatimi i gjyqtarëve të jashtëm me kushtetutë dhe ta tërheq vendimin e saj. Kosovës, sipas tij, nuk i nevojitet një Gjykatë Kushtetuese e cila është e kontestueshme në pikëpamje kushtetuese./tribuna/