Propozimi i Lëvizjes Vetëvendosje, drejtuar bllokut opozitar të cilën e përbëjnë Lidhja Demokratike e Kosovës, Aleanca për Ardhmërinë e Kosovës, dhe Nisma për Kosovën, që qeveria e ardhshme të ketë mandat të shkurtuar dy vjeçar, nuk po shihet me sy të mirë nga analistët.

Madje ky propozim po thuhet se është jo kushtetues dhe në kundërshtim më ligjin. Të paktën kështu mendon njohësi i çështjeve kushtetuese, Riza Smaka.

Ai në një prononcim për gazetën ka thënë se propozimi i Lëvizjes Vetëvendosje është antiligjor dhe në kundërshtim më kushtetutën

“Propozimi i tillë është i pavend, i papranueshëm dhe juridikisht i paqëndrueshëm. Edhe sikur të arrihej konsensusi për këtë do të ishte në kundërshtim me ligjin, sepse mandati nuk mund të negociohet nga subjektet politike, sepse mandati i qeverisë është 4 vjeçar, edhe sikur të dakordoheshin krejt subjektet politike do të ishte marrëveshje juridikisht e paqëndrueshme”, ka thënë Smaka../Tribuna/.,

Propozimi për rendin e ditës së seancës konstitutive të përbërjes së re të Kuvendit të Kosovës pritet të bëhet më së largu deri më 12 korrik. Kjo dinamikë, përcaktohet nga fakti që presidentja Atifete Jahjaga ka caktuar seancën konstitutive të Kuvendit të ri të Kosovës më datën 17 korrik.

Andaj, tani u mbetet kryetarit në largim nga përbërja e kaluar e Kuvendit, Jakup Krasniqit si dhe ish-anëtarëve të Kryesisë që të thërrasin takimin me liderët e partive që kanë siguruar ulëse në Kuvend, për të propozuar rendin e ditës.

Sipas Rregullores së Punës, propozimi i rendit të ditës duhet të bëhet më së largu pesë ditë para seancës konstitutive. Marrë parasysh që data 17 korrik është e enjte, nëse jo gjatë vikendit, ky takim mund të mbahen edhe gjatë kësaj jave. Nga ai takim, do të nisë edhe zyrtarisht beteja politike ndërmjet PDK-së në njërën anë dhe bllokut LDK, AAK dhe Nisma në anën tjetër për grupin më të madh parlamentar dhe postin e kryetarit të Kuvendit…

E kishin pritur me gëzim ardhjen në vendlindje, por pushimet e tyre kaluan si mos më keq. Çifti bashkëshortor Nexhmedin dhe Sanije Berisha ardhja në Kosovë u kushtoi me humbjen e vendit të punës.

E krejt kjo sherri i një dënimi nga policia. Nexhmedini kishte bërë kundërvajtje në trafik e me këtë rast policia ia konfiskoi patentë-shoferin por edhe pasaportën. Nexhmedin Berisha rrëfen për Tribunën se ditën që duhej të niseshin për Gjermani u ndaluan nga Policia dhe e dënuan për tejkalim shpejtësie.
Me këtë rast policia ia konfiskoi dokumentet dhe rastin e dërgoi në gjykatë. Berisha thotë se ishte i gatshëm të paguaj çfarëdo çmimi vetëm që dokumentet të mos shkojnë në gjykatë./Tribuna/.

Kosova mund të hyjë në vjeshtë pa një Qeveri të re. Procedurat e zgjedhjes së kryetarit të Kuvendit, e më pas edhe ato për formimin e Qeverisë, mund të marrin deri në 4 muaj.
Presidentja Atifete Jahjaga ka vendosur të hënën që seanca e parë konstituive e Kuvendit të Kosovës të thirret për 17 korrik.

Nga kjo datë presidentes nis t’i rrjedhë koha për caktimin e mandatarit për formimin e Qeverisë.

Por, mund të aplikohet pauza nëse edhe çështja e kryeparlamentarit bëhet lëndë e Gjykatës Kushtetuese, shkruan Koha Ditore.

Pas zgjedhjeve të 8 qershorit, ka dy pretendentë për të marrë postin e kryeparlamentarit: koalicioni parazgjedhor i PDK-së, që në zgjedhje ka fituar më së shumti vota (37 deputetë) dhe koalicioni paszgjedhor LDK-AAK-Nisma, që bashkërisht kanë diku rreth 10 për qind më shumë vota sesa subjekti fitues (47 deputetë). Të dyja palët kanë theksuar se do t’i drejtohen gjykatës, në rast se dëmtohen gjatë seancës konstituive.

Në emisionin “Puls” të KTV-së, këtë javë të ftuar kanë qenë Avokati i Popullit, Sami Kurteshi dhe avokati Skender Musa, të cilët folën në lidhje me shkeljen e të drejtave të njeriut nga institucionet publike në Kosovë.

Avokati i Popullit, Sami Kurteshi, ka akuzuar institucionet shtetërore për abuzim me ligjin, pushtetin dhe shtetin.

“Në Kosovë kemi të privilegjuar. Në shumë fusha privilegjohesh pse je i pasur, privilegjohesh pse e ke shpinën e fortë, mandej po vijmë tek gjendja duke e personalizuar dhe i përgjithësuar gjërat, dhe ku askush nuk i beson sistemit gjyqësor. Sot e kam lexuar një deklaratë të një prokurori ku thotë se nuk e dërgoj lëndën në një gjykatë se nuk i besoj. Tash llogarite çfarë deklarate bën prokurori i shtetit. Pastaj kemi mosbesim te qytetarët në institucionet e vendit e sidomos në gjykata”, ka thënë mes tjerash Kurteshi.

Ai më tej ka thënë se administrata shtetërore më shumë i ngjanë “kohës së gogolit”.

“I keni lexuar veprat e gogolit? Pra, kemi administratë të kalbur të shtetit. Pastaj si është e mundur që individi kosovar me qenë i pasur ndërsa shteti më i varfër në Evropë. Ose po e vjedhim shtetin të gjithë një nga një ose ka diçka që nuk po funksionon. Ne po e dimë ku është problemi, por s’po guxojmë ta gjejmë problemin”, është shprehur Kurteshi.

Kryetari i NISMA për Kosovën, Fatmir Limaj, ka pritur në takim drejtorin politik për çështjet e Evropës dhe ndërkombëtare në Ministrinë e Punëve të Jashtme të Austrisë, Jan Kickert, me të cilin ka bashkëbiseduar për zhvillimet aktuale politike në vend.

Limaj e ka njoftuar Kickert për proceset demokratike nëpër të cilat po kalon Kosova, si dhe për zgjedhjet e përgjithshme në vend e të cilat janë përmbyllur me sukses.

Gjithashtu Limaj dhe Kickert, kanë folur edhe për krijimin e institucioneve të reja të Kosovës, dhe të dy janë pajtuar dhe kanë theksuar nevojën që ky proces të përfundoj sa më shpejt dhe në përputhshmëri me kushtetutën dhe ligjet në fuqi.

Gjatë takimit u diskutua edhe për vazhdimin e dialogut mes Kosovës dhe Serbisë ku të dytë u pajtuan që procesi i dialogut duhet të vazhdojë.

Lideri i Aleancës për Ardhmërinë e Kosovës, Ramush Haradinaj ka konfirmuar se tashmë janë pajtuar me LDK-në e Nismën për Kosovën, që të veprojnë si një grup i vetëm parlamentar në legjislativin e ri.

Derisa, sipas tij, PDK-ja duhet ta kuptojë tranzicionin demokratik dhe ta kuptojnë mesazhin se Kosova është e gatshme të bëjë gjithçka, vetëm që PDK-në ta heqin nga qeverisja.

Haradinaj këto komente i ka bërë pas një takimi me drejtorin Politik të Ministrisë së Punëve të Jashtme të Austrisë, Jan Kickert, të shoqëruar nga Johann Settler, zyrtar i lartë në MPJ-së së Austrisë dhe Johann Brieger, ambasador i Austrisë në Kosovë.

Lideri i AAK-së theksoi se në vazhdimësi janë duke diskutuar me partnerët e koalicionit, LDK-në dhe Nisman, për qeverisjen e ardhshme, e po ashtu edhe me Vetëvendosjen për t’i harmonizuar qëndrimet.

“Jemi dakorduar që të jemi një grup parlamentar për të gjitha procedurat që i paraprijnë zgjedhjes së kryetarit. Njëkohësisht sot e kemi shfrytëzuar kohën edhe për projektin e Qeverisë se me çka do të ballafaqohemi në qeverisjen e ardhshme. Sikurse e shihni, pas ngjarjes tragjike në KEK, e cila nuk është sanuar dhe mund të përsëritet, pra na duhet të parashohim se në çka do të ndodhemi në ditët e para të qeverisjes dhe po punojmë për të gjitha këto tema”, tha Haradinaj, transmeton KP.

Kreu i AAK-së e ka quajtur spekulim lajmin se ai është takuar me Agim Çekun në “Zanzi Bar” për të diskutuar rreth koalicionit me PDK-në.

Haradinaj tha se kjo është vetëm spekulim, pasi që sipas tij, “Zanzi Bar” ka harruar se ekziston, madje nuk ka qenë klubi i tij i preferuar kurrë.

Ndërsa, rreth qëndrimeve të VV-së, Haradinaj tha se ka takuar liderin e saj, Albin Kurtin, në vikend pa praninë e mediave, derisa do ta takojë edhe nesër për të biseduar për temat që u interesojnë palëve.

“Tash, ndoshta është prejudikim të flas, por është me rëndësi që ne nuk po përtojmë të ulemi të ballafaqohemi me gjithë ato që e presin Kosovën. E mora shembullin e KEK-ut, por mos harroni se Kosova A është bombë e kurdisur. Herën e parë e kanë shpëtuar, kanë vdekur dy njerëz, herën tjetër do të jetë edhe më keq, nëse vazhdon të shpërthej sikurse atëherë. Pra kemi një qeveri e cila nuk është kujdesuar për asgjë, përveç atyre që ka pasur interesat e tyre, dhe e ka lënë Kosovën në një gjendje të keqe dhe e dimë me çka do të ballafaqohemi dhe një pjesë të kohës po ia kushtojmë të gjitha temave”, tha Haradinaj.

Ndërsa thotë se reagimet e PDK-së janë duke i parë me indiferencë, edhe pse i quan gabim, pasi sipas tij, është më mirë të reflektojnë më me dinjitet në këtë tranzicion demokratik dhe ta kuptojnë mesazhin, se “Kosova është në gjendje të bëjë gjithçka vetëm të heq PDK-në nga pushteti”.

Për dallim prej gjykatave tjera në vend, të cilat ish-administrata e Kombeve të Bashkuara në Kosovë i kishte pranuar si vazhdimësia e vetme faktike institucionale nga koha e ish-Jugosllavisë, Gjykata Kushtetuese kishte filluar të ngritej tek pas pavarësisë në vitin 2008.

Duke qenë gjykatë e re, ajo nuk trashëgonte mentalitetin e kulturës së punës dhe kredibilitetin e dëmtuar të gjykatave tjera. Përkundrazi, ajo kishte mbështetjen e nevojshme financiare, si dhe praninë e përvojës së gjykatësve të huaj.

Respekti ndaj saj ishte ngulitur në sferën publike kosovare me kalimin e kohës, gjë që ia kishte mundësuar të kalonte fare lehtë edhe aktgjykime aq të vështira që përfshinin, ndër të tjera, konstatime shkeljesh nga Presidentët Fatmir Sejdiu dhe Behgjet Pacolli. Pas aktgjykimeve të saj, të dy kishin dhënë dorëheqje, respektivisht më 2010 dhe 2011.

Mirëpo, aktgjykimi i datës 1 korrik që ndërlidhet me kompetencat e Presidentit të vendit në lidhje me propozimin e Mandatarit të Qeverisë, erdhi nën hijen e një imazhi të saj të dëmtuar.

Njëri nga gjyqtarët e Gjykatës, Kadri Kryeziu, ishte parë në takim zgjedhor të Partisë Demokratike të Kosovës në pushtet, në muajin maj. Ndonëse, si pasojë, Kryeziu nuk ka marrë pjesë në gjykimin e lëndës, gjykata dhe institucionet tjera ende nuk kanë vendosur për rastin e tij.

Neni 1.2 i kodit të mirësjelljes së kësaj Gjykate thotë se “gjyqtarët nuk duhet të perfshihen në asnjë aktivitet, ose të jenë anëtarë të ndonje asociacioni, që do të mund të ndikonte në përceptimin dhe në besimin e qytetarëve në pavaresinë e tyre në vendimmarrje”.

Kryeziu e ka dëmtuar pikërisht përceptimin dhe besimin në pavarësinë e tij në vendimmarrje.

Edhe Kryetari i Gjykatës, Enver Hasani, është parë në takime me përfaqsues politikë të institucioneve të Kosovës.

Institucionet janë të ngritura për të balancuar pushtetet. Prandaj, anëtarët e tyre duhet të bëjnë kujdes që edhe me veprimet e tyre personale e private të ruajnë kredibilitetin e institucioneve ku punojnë, sepse këtë përgjegjësi e marrin bashkë me kontratën e punës.

Gjykata Kushtetuese është autoriteti i fundit për të bërë interpretimin e përputhshmërisë së ligjeve me Kushtetutën. Si e këtillë, ajo duhet të mbrohet nga presioni politik. Por, kësaj here ajo së pari duhet të marrë masa të vetëmbrohet.

Rregullorja e punës e Gjykatës Kushtetuese mundëson dorëheqjen, shkarkimin ose përjashtimin e gjyqtarit të saj. Kadri Kryeziu duhet të përcaktohet ose të detyrohet për një nga këto opsione.

Kryetari Enver Hasani duhet së paku të përgjigjet përpara publikut të Kosovës./Politko.net/