Kryetari i Aleancës për Ardhmërinë e Kosovës (AAK), Ramush Haradinaj, uron kryeministrin e Republikës së Shqipërisë, Edi Rama, dhe mbarë popullin shqiptar, për arritjen nga Shqipëria të statusit të kandidatit për anëtarësim në Bashkimin Evropian (BE).

Haradinaj ia përcjellë qeverisë dhe popullit shqiptar përgëzimet më të thella, për punën e bërë, angazhimin dhe përkushtimin e mbarë spektrit politik të Shqipërisë në arritjen e kritereve për marrjen e statusit të kandidatit për anëtarësim në BE.

Haradinaj përcjellë bindjen dhe përkushtimin e tij të plotë se shumë shpejt edhe Kosova do t’i ndërmarrë hapat e duhur dhe t’i plotësojë kriteret në rrugën drejt integrimit të plotë në BE.

Bashkimi Evropian është dhe mbetet qëllimi i përbashkët dhe parësor i shqiptarëve kudo që janë, si rrumbullakësim i punës dhe përpjekjeve tona të vazhdueshme për paqe, siguri, stabilitet e zhvillim, thuhet në urimin e kryetarit të AAK-së, Ramush Haradinaj.

Kryetari i Komunës së Malishevës, Ragip Begaj, ka pritur sot në një takim pune, përfaqësuesin e IRD-së,Azem Kastratin.Begaj e Kastrati kanë biseduar për ecurinë e punimeve në ndërtimin e ujësjellësit në fshatin Drenoc.

Ata, vlerësuan se punimet po ecin sipas planifikimit dhe shumë shpejt pritet edhe përfundimi i ndërtimit të ujësjellësit.

“Punimet janë duke shkuar shumë mirë, dhe deri më tani është ndërtuar rreth shtatëdhjetë për qind e ujësjellësit në këtë fazë, të shpërndarjes së rrjetit të ujësjellësit brenda fshatit, ndërsa punimet janë zhvilluar sipas planit të paraparë”, tha Kastrati.

Ndërsa kryetari i Komunës, Ragip Begaj, tha se “edhe komuna të gjitha obligimet e saj gjithashtu i ka kryer dhe do të bëj çdo gjë që ka nevojë, për lidhjen sa më të shpejt të fshatit Drenoc, me sistemin e ujësjellësit”.

IRD, është implementuese e programit të USAID-it, në këtë fushë të investimeve dhe në bashkëfinancim me Komunën e Malishevës, janë duke e ndërtuar rrjetin e ujësjellësit në fshatin Drenoc./PrizrenPress.com/

Presidentja e Republikë së Kosovës, Atifete Jahjaga, ka pritur sot në takim një delegacion të Grupit Punues të Kombeve të Bashkuara Kundër Zhdukjes me Forcë, të udhëhequr nga Airel Dulitzky, që po qëndron në Kosovë dhe në rajonin e Ballkanit në një mision faktmbledhës për çështjen e personave të pagjetur.

Duke theksuar se që prej 15 vjet nga përfundimi i luftës, Kosova vazhdon të përballet me çështjen më të rëndë të mbi 1700 qytetarëve të saj të pagjetur, Presidentja Jahjaga theksoi domosdoshmërinë që sa më parë të zbardhet fati i të gjithë atyre, me qëllim të përmbylljes së një plage të rëndë në shoqëri dhe që familjet e të pagjeturve të gjejnë paqen e tyre.

Sipas një komunikatë të presidencës, gjatë këtoj takimi, Jahjaga ka thënë se zbardhja e fatit të të pagjeturve do të vendos edhe paqen dhe stabilitetin në gjithë rajonin e Ballkanit dhe do të ndihmojë edhe në krijimin e kushteve për ndërtimin e mirëbesimit dhe pajtimit mes njerëzve.

Ajo tha se Kosova ka treguar konstruktivitet në çështjen e të pagjeturve dhe theksoi se bashkësia ndërkombëtare duhet të kërkojë nga autoritetet në Serbi që të rrisin shkallën e bashkëpunimit me qëllim të zgjidhjes së fatit të të gjithë të pagjeturve. Presidentja Jahjaga theksoi se krahas zbardhjes së fatit të të pagjeturve, duhet të vendoset edhe drejtësia për të gjitha familjet e të pagjeturve.

Kryesuesi i Grupit Punues të Kombeve të Bashkuara Kundër Zhdukjes me Forcë, AirelDulitzky, e ka njoftuar Presidenten Jahjaga se qëllimi i këtij misioni faktmbledhës është njohja nga afër me çështjen e të pagjeturve në gjithë rajonin e Ballkanit si dhe sfidat me të cilat përballen vendet që kanë qytetarë të tyre të pagjetur, si pasojë e konflikteve të armatosura.

Ai tha se qëndrimi i OKB-së është që sa më parë të zbardhet fati i të gjithë të pagjeturve jo vetëm në Kosovë por edhe në vendet e tjera të rajonit të cilët kanë kaluar nëpër konflikte të armatosura, drejtësia të jap fjalën e saj dhe viktimat e familjarët e tyre të gëzojnë përkujdesjen e shoqërisë.

Kryeministri i Kosovës, Hashim Thaçi, ka uruar Shqipërinë për stutusin e anëtarit të Bashkimit Europian, duke përdorur dy citate, një të Isa Boletinit dhe të Naim Frashërit.

“Shqipëria nga sot është kandidate për anëtarësi në BE. Lajmi më i mirë i mundshëm. Urime motra dhe vëllëzër, nuk ka shqiptar në botë që sot nuk është krenar për arritjet e juaja. Dy citate më bien ndër mend në këtë moment. Isa Boletini i jonë kur ka thënë se “Unë jam mirë kur është mirë Shqypnia” dhe Naim Frashëri kur tha se “për ne shqiptarët, dielli lind nga perëndimi”. Me të vërtetë e ardhmja e të gjithë neve është vetëm Bashkimi Europian”, shkroi para pak momentesh Kryeministri Thaçi në Facebook, duke postuar njëkohësisht edhe një foto të cilën ai e quajti fantastike. “Foto e Shqipërisë fantastike nga A.Ibrahimi”, theksoi Thaçi.

Kryetari i Prizrenit, Ramadan Muja,do të mbaje nesër takimin publik me qytetarët. Zëdhënësi i Komunës, Ymer Berisha njoftoi se takimi mbahet në në sallën e Kuvendit të Komunës në ora 11:00.

“Me 25 qershor 2014 (e mërkurë ) do të mbahet tubimi publik i Kryetarit të Komunës me qytetarët e Komunës së Prizrenit, në sallën për mbledhje të Kuvendit të Komunës, duke filluar nga ora 11:00”, njoftoi Berisha.

Në këtë takim publik kryetari Ramadan Muja, do të raportojë për punën që është bërë gjatë periudhës janar-qershor të këtij viti.

“Po ashtu drejtorët e Ekzekutivit do të informojnë rreth aktiviteteve që kanë pasur gjatë kësaj periudhe”, tha Berisha/PrizrenPress.com/

Kryesuesi i Asamblesë Komunale në Prizren, Kujtim Gashi ka kërkuar që asamblistët të pajisen me nga një laptop. Ai kërkesën e tij për laptop e ka dërguar edhe në Bord të drejtorëve.

“Bordi ka nxjerrë konkluzion për pajisjen e anëtarëve të Kuvendit me nga një laptop”, njoftoi monitoruesja e OJQ-së, “Ec Ma ndryshe”,Elmedina Baxhaku.

Zëdhënësi i Komunës, Ymer Berisha tha ndërkaq se kërkesa e kryesuesit Kujtim Gashit, do të procedohet dhe dërgohet në Asamble.

“Kryesuesi ka propozuar që t’i pajisen asamblistët me laptop dhe ky propozim do të dërgohet në Asamble”, tha Berisha për “PrizrenPress”. Ai tregoi se lop-topat do të blihen nga linja buxhetore e Asamblesë Komunale. /PrizrenPress.com/

Gjykata Kushtetuese ende nuk ka marrë ndonjë vendim për gjyqtarin Kadri Kyeziu. Kryetari i Gjykatës Kushtetuese, Enver Hasani, ditë më parë paralajmëroi se rasti i pjesëmarrjes së gjykatësit në fushatën parazgjedhore të PDK-së, Kadri Kryeziut, do të shqyrtohet më 22 qershor.

Edhe pse ka kaluar kjo datë, Gjykata Kushtetuese ende nuk marrë asnjë vendim ndaj këtij rasti.

“Deklarata me shkrim e Kryeziut është marrë dhe ajo do të shqyrtohet me 22 qershor. Është ngritur Komisioni dhe do të hetohen rrethanat e rastit”, pat thënë Hasani.

Gjyqtari i Gjykatës Kushtetuese të Kosovës, Kadri Kryeziu është parë në fushatë të liderit të PDK-së, Hashim Thaçi në Prizren. Ai ka pranuar se ka marrë pjesë në tubim të PDK-së “si një qytetar i thjeshtë”.

Ndërkaq, partitë opozitare kanë kërkuar nga Gjykata Kushtetuese që të shkarkojnë, Kryeziun nga pozita e gjyqtarit./PrizrenPress.com/