Ambasadorja e Shteteve të Bashkuara të Amerikës, Tracey Jacobson do të vizitojë sot Komisionin Qendror të Zgjedhjeve për të parë nga afër organizimet që po bëhen për zgjedhjet e 8 qeshorit.

Jacobson, duke folur për zgjedhjet më herët ka deklaruar se ato duhet të jenë të lira dhe të drejta, si dhe t’i përmbushin standardet demokratike evropiane për organizimin e zgjedhjeve.

Zyra për regjistrimin e partive politike në KQZ, të premten pritet të jetë e stërmbushur. E gjithë kjo për shkak të partive politike të cilat po presin deri ditën e fundit për të aplikuar dhe për të certifikuar kandidatët e tyre për zgjedhjet e përgjithshme të 8 qershorit.

Komisioni Qendror i Zgjedhjeve javën e kaluar kur ka miratuar planin operativ, kishte vendosur një afat prej nëntë ditësh, konkretisht nga data 8 deri më 16 maj në orën 24:00, në mënyrë që partitë politike të aplikojnë për certifikim dhe pjesëmarrjen në zgjedhje.

Deri të martën në mbrëmje kur gati kaluan një javë nga hapja e afatit, ka aplikuar vetëm një subjekt politik.

Nga KQZ kanë konfirmuar se subjekti që ka aplikuar për certifikim i takon komunitetit boshnjak.

Partitë tjera si duket janë të angazhuara në prurje të reja dhe për këtë qëllim po presin deri në momentin e fundit para se t’i dërgojnë listat në KQZ.

Përveç asaj që nga koha kur kanë nisur diskutimet për kandidaturat, shumë subjekte sidomos këto të mëdhatë, si PDK dhe LDK kanë hyrë në debate të brendshme që janë përshkruar edhe me tensione.

Rasti konkret është me PDK e Hashim Thaçit.

Gazeta Tribuna të martën ka raportuar se si kreu i kësaj partie po e mban pezull çështjen e listës duke mos u hapur fare për këtë çështje me anëtarë të tjerë.

Burime të gazetës kanë shpjeguar se Hashim Thaçi po tenton t`i shmanget ikjes masive të të pakënaqurve të PDK-së në listën e kandidatëve për deputetë të “Nismës”.

Anëtari i Kryesisë së Lëvizjes Vetëvendosje Glauk Konjufca, ka vlerësuar se kjo lëvizje është e vetmja alternativë për Kosovën.

Ai ka bërë me dije se qendrat e Lëvizjes Vetëvendosje, i janë nënshtruar ristrukturimit dhe mobilizimit të përgjithshëm, i cili ka sjellë bashkimin e shumë njerëzve që e kanë forcuar organizimin e tyre, shkruan Epoka e Re.

Konjufca ka thënë se Lëvizja Vetëvendosje, është i vetmi subjekt politik që ka vizion, koncept dhe alternativa qeverisëse për Kosovën.

Derisa partitë e tjera politike, sipas tij, deri më tani kanë qeverisur me vendin pa kompetenca, pa program të qartë dhe me korrupsion marramendës.

Disa qytetarë që kanë aplikuar për viza në Ambasadën e Italisë në Prishtinë janë ankuar për vonesa disamujore për përgjigje. Ata ndihen të frustruar jo vetëm për shkak se procedurat zhvillohen ngadalë, por edhe se nuk i dinë arsyet e vërteta të kësaj zvarritjeje.

Edhe ambasadori i Italisë në Prishtinë, Andreas Ferrarese, i ka konfirmuar vonesat, por i ka arsyetuar ato me disa probleme burokratike. Ai nuk e ka përjashtuar mundësinë që në këtë të ketë ndikuar indirekt edhe rasti i arrestimit të ish-deputetit, Ukë Rugova.

Ka përmendur mungesën e stafit dhe shkëputjen e kontratës me kompaninë IVAO, që personat që kanë aplikuar për viza nëpërmes kësaj kompanie kanë paguar edhe 20 euro shtesë. Sipas tij në ambasadë janë futur pasaporta edhe në rrugë jozyrtare dhe se tani u duhet kohë për verifikimin e tyre./Koha Ditore/

Pesë deputetë të Kuvendit të Kosovës nga rajoni i Prizrenit janë akuzuar nga Prokuroria për mosdeklarim apo deklarim të rrejshëm të pasurisë.

Nait Hasani, Mursel Haljilji, Duda Balje, Enis Kervan dhe Albert Kinolli akuzohen nga Prokuroria Themelore e Prizrenit për shkak se kanë deklaruar vetëm pagën bazë të deputetit dhe jo të hyrat e tjera nga mëditjet në komisione të ndryshme parlamentare.

Prokuroria e Shtetit i ka prezantuar si suksese në luftën kundër korrupsionit aktakuzat kundër vetëm tre deputetëve dhe disa zyrtarëve të tjerë.

Koordinatorja nacionale kundër korrupsionit, prokurorja Laura Pula ka treguar javën e kaluar në një konferencë për media se në mesin e disa zyrtarëve, Prokuroria ka ngritur aktakuzë kundër tre deputetëve, pa treguar se për çfarë veprash dhe kush janë të akuzuarit. Emrat e tyre nuk i ka bërë publike as kur gazeta ka kërkuar sqarime se kush janë të akuzuarit dhe për çfarë veprash akuzohen ata./Koha Ditore/

Zyrtarisht, fushata për zgjedhjet parlamentare të 8 qershorit në Kosovë fillon në fund të muajit maj. Por, ajo realisht është në vlug të saj. Karakteristikë e këtyre ditëve është nxitimi i partive politike për të prezantuar përforcimet e reja, posaçërisht me anëtarë të rinj nga shoqëria civile.

Bashkimin e pjesëtarëve të organizatave joqeveritare me partitë politike, analistët e vlerësojnë në mënyra të ndryshme. Fisnik Korenica nga Grupi për Studime Juridike dhe Politike thotë se zhvillimet e tilla janë fushatë zgjedhore.

“Shumica e aderimeve në partitë politike nuk janë bërë për të ndryshuar qëllimet e këtyre partive politike, por për të ndryshuar formatin dhe metodat e bërjes së fushatës para-elektorale. Është qasje e gabuar e disa individëve dhe partive politike që e keqpërdorin të kaluarën dhe disa njerëz të shoqërisë civile për të krijuar imazh të fitores në këtë fushatë para-elektorale”, thotë Korenica, transmeton VOA.

Naim Rashiti nga Grupi Ballkanik për Politika, thotë se këto largime kanë ndodhur edhe më herët për dy qëllime.

“Partitë politike kërkojnë që të freskohen, sepse politika dhe partitë politike kanë ushtruar politika shumë të vjetruara dhe këta njerëz të shoqërisë civile nuk kanë mundur të gjejnë veten në kuadër të burokracisë institucionale. Thënë shkurt, nuk kanë mundur të inkuadrohen pa qenë pjesë e partive politike. Kjo kulturë institucionale që është krijuar në këtë kohë, ka ngushtuar hapësirën që kuadri i duhur të marrë pozitat e duhura në institucionet e vendit”, tha Rashiti.

Por, a e kanë dëmtuar rolin e shoqërisë civile, këto largime?

Korenica thotë se shoqëria civile nuk është e individëve, por se qëllimet e këtyre largimeve e kanë dëmtuar atë.

“Po pëson dëm në kredibilitetin në opinionin publik. Shoqëria civile nuk duhet të ketë mision politik. Shoqëria civile është opozitë civile e gjithë skenës politike dhe jo vetëm pushtetit. Prandaj, kur ka aderime të formave të tilla, ndonjëherë vihet në dyshim edhe vet kredibiliteti i njerëzve që janë kritikë të pushtetit aktual”, thotë ai.

Rashiti thekson se askush nuk mund të dëmtojë shoqërinë civile.

“Do të ketë dhe do të vijnë gjenerata të reja dhe ka shumë të tillë që po presin në treg. Shoqërisë civile i mbetet që të organizohet më mirë dhe të bëjë punën e vet më mirë. Këta njerëz që janë futur në politikë, pavarësisht bindjeve të tyre, kanë shkuar me një qëllim që të japin kontributin e tyre”, tha Rashiti, sipas të cilit, të gjitha partitë politike në Kosovë kanë nevojë për një freskim dhe demokraci të re të brendshme.

Ndërkaq, Korenica shton se largimi i pjesëtarëve të shoqërisë civile në parti politike, në një shtet normal nuk do të duhej të ndodhte, pasi që të dyja këto kanë misione të ndryshme.

Anëtari i KQZ-së, Nenad Rikallo deklaroi sot se KQZ-ja ka përfunduar tetë koalicione politike për zgjedhjet e ardhshme të parakohshme parlamentare në Kosovë. Florian Dushi, ndërkaq ka thënë për lajmi.net se këto janë vetëm paralajmërime për koalicionet parazgjedhore të subjekteve politike dhe se në këtë fazë ato nuk kanë obligim t’i deklarojnë as partnerët e përzgjedhur për koalicione.

Rikallo i tha agjencisë Beta se KQZ-ja ka përfunduar tetë koalicione parazgjedhore, duke përmendur me këtë rast një koalicion të serbëve, të quajtur Lëvizja për prosperitet demokratik, të cilin e përbëjnë Partia serbe e Kosovë-Metohisë dhe Lidhja e socialdemokratëve të pavarur.

Sipas tij, është konkluduar edhe koalicioni boshnjak Vakat, që e përbëjnë Partia Demokratike e Boshnjakëve, Partia demokratike Vatan, Partia e bashkuar e Boshnjakëve dhe Partie e Re Boshnjake.

Në mesin e tetë paralajmërimeve për koalicione parazgjedhore janë edhe gjashtë koalicione të subjekteve politike shqiptare.

Florian Dushi, anëtar i KQZ-së, tha për lajmi.net se këto janë vetëm paralajmërime dhe se partitë politike në këtë fazë nuk janë të obliguara të tregojnë se me cilat subjekte politike të tjera do të lidhin koalicione parazgjedhore.

Dushi tha se aplikimet në KQZ për koalicione parazgjedhore pranohen deri më 16 maj, kurse pas kësaj date pritet të bëhet edhe certifikimi i këtyre koalicioneve.

Përzgjedhja e kryeprokurorit të Shtetit do të bëhet më së largu deri në fillim të qershorit. Ekspertë juridikë thonë se kryeprokurori i ri duhet të jetë me integritet të lartë, ndërsa do të përballet me sfida të shumta, ndër më kryesoret me luftimin e krimit të organizuar dhe korrupsionit.

Zgjedhjet që kanë përshkuar Republikën e Kosovës, në vitin 2014 kanë përfshirë edhe organin më të lartë të akuzës. Në garën për Kryeprokuror të Shtetit, e cila po shkon drejtë fundit, kanë mbetur 8 kandidatë, prej të cilëve 3 do të futen në listën e ngushtë, e cila do të votohet nga anëtarët e Këshillit Prokurorial të Kosovës për të zgjedhur Kryeprokurorin e ri të Shtetit. Përzgjedhja e Kryeprokurorit mund të përfundojë gjatë këtij muaji, ose më së largu në javën e parë të muajit qershor, raporton RTK.

Problemet e mëdha në sistemin prokurorial, lufta kundër krimit të organizuar dhe korrupsionit do të jenë sfidat më të mëdha të Kryeprokurorit të ri të Shtetit. Në këtë fazë, kandidatët, të cilët po e vazhdojnë garën për Kryeprokuror të Shtetit janë: Sylë Hoxha, Kryeprokuror i Prokurorisë Themelore të Prizrenit, Agron Galani, Kryeprokuror i Prokurorisë Themelore të Pejës, Jusuf Mejzini, prokuror në Zyrën e Kryeprokurorit të Shtetit, Aleksandër Lumezi, Kryeprokuror i Apelit në Prishtinë, Shyqri Syla, Kryeprokuror i Prokurorisë Themelore të Mitrovicës, Jetish Maloku, Kryeprokuror i Prokurorisë Themelore të Gjilanit, Ali Rexha, prokuror në Prokurorinë Speciale si dhe Laura Pula, prokurore në Zyrën e Kryeprokurorit të Shtetit.

Emisioni “Betimi për Drejtësi” ka intervistuar kandidatët për Kryeprokuror të Shtetit për sfidat dhe vizionin e tyre për sistemin prokurorial në vend.

Në emisionin “Betimi për Drejtësi” avokati Dastid Pallaska thotë se Kryeprokurori i ri i Shtetit, duhet të jetë hero ishtetëndërtimit të Kosovës.

Pallaska thekson se kriteret bazë për përzgjedhjen e Kryeprokurorit duhet të bazohen në integritetin e tij.

“Kandidati që duhet të zgjidhet Kryeprokuror duhet të zgjidhet sikurse në vendet demokratike”, thotë Pallaska.

Institucionalizimi i rolit të Prokurorit të Shtetit do të jetë ndër sfidat e para të Kryeprokurorit.