Ish- kryetari i Komunës së Rahovecit, Smajl Latifi, ka reaguar rreth kthimit të rrugës kryesore të qytetit në dy kahje.
Ai tregon se ndryshimi i regjimit të qarkullimit të automjeteve në trafik ka ardhur si rezultat i realizimit të projektit të Komisionit Evropian dhe Komunës së Rahovecit.
“Qëllimi i këtij projekti ka qenë dhe mbetet, që të kemi më shumë gjelbërim në qytet dhe të sigurohen përfundimisht trotuaret me ato pengesat, që e kanë ngjyrën e portokalltë dhe janë në formë të topave”,shkruan Latifi në “Facebook”.
“Mirëpo, edhe gjatë realizimit, por sidomos me realizimin e këtij projekti ka pasur ankesa legjitime të bizneseve, të cilat pothuajse në këtë moment, e kishin të pamundshme të furnizoheshin, për shkak se trotuaret nga ky projekt i realizuar nuk mund të shfrytëzoheshin më për ndalim, parkim të automjeteve etj.”
“Njëkohësisht, ka pasur edhe shumë falënderime dhe mirënjohje nga ana e qytetarëve, prindërve të nxënësve, mësimdhënësve, qytetarëve, ngase qyteti mori një pamje më të bukur si dhe jeta e tyre tashmë me këtë projekt po bëhej shumë më e sigurt.”
“Dua të them me këtë rast se, ndryshimi i regjimit të qarkullimit në trafik, pra nga rrugë dykahëshe, në rrugë njëkahëshe ka ardhur si kërkesë, nevojë dhe domosdoshmëri e momentit, pikërisht për t’i dhënë zgjidhje situatës së re të krijuar me realizimin e projektit në fjalë.”
“Komuna e Rahovecit, ekzekutivi, inxhinierët e komunës, drejtoria e urbanizmit, ajo e shërbimeve publike, kuadrot kompetente të policisë së Kosovës dhe ekspertët e komunikacionit si dhe ata të autoshkollave kanë dhënë kontribut të madh dhe i kanë dhënë këtë zgjidhje kësaj problematike, duke e lejuar qarkullimin e automjeteve vetëm në një kahje dhe atë në: rr.” Xhelal Hajda-Toni” dhe në rr. “Gëzim Hamza-Piktori”. Çfarë ka bërë komuna më pas? Me të njëjtën përbërje ka vendosur shenjat e komunikacionit.”
“Siç jemi në dijeni, me rrugën njëkahëshe është krijuar edhe parkingu, i cili është shenjuar dhe siç e e shohim çdo ditë, pikërisht nga mungesa e një menaxhimi ka krijuar shumë shpesh probleme për bizneset, qytetarët etj. Nga ana jonë si ish qeveri ka pasur një përpjekje serioze për ta futur në menaxhim me pagesë parkingun në rr. “Xhelal Hajda-Toni”, por Kuvendi i Komunës, mendojmë pa arsyetim të qartë, nuk e ka aprovuar propozimin e qeverisë që e kam drejtuar.”
“Për informimin e atyre që nuk janë të informuar, unë dhe qeveria ime atëbotë jemi pajtuar me opsionin që e kanë trajtuar, arsyetuar dhe vendosur ata që marrin vesh në këto çështje.”
“Çdo përpjekje për t’i dhënë kahje tjetër dhe konotacion ndryshe kësaj çështjeje, nuk është e saktë dhe nuk është e shëndoshë. Tekefundit, nuk ka qenë prej askujt ideja që të përfitojë individualisht apo politikisht dikush në këtë çështje. Kjo është logjika.”
“Së fundi, debati i sotëm me qytetarë që u mbajt në qendrën e kulturës
“Mensur Zyberaj” në Rahovec është shumë domethënës, shumë i qëlluar dhe mendoj se është edhe produktiv. Unë i respektoj shumë kritikat, vërejtjet, sugjerimet si dhe kërkesën për rikthim të rrugës në dy kahje, siç ka qenë më herët, por nuk mendoj se vendimi definitiv do të duhej të merrej pa ofruar ekspertizën më të mirë të mundshme profesionale institucionet përgjegjëse, të cilat më së miri mund ta thonë fjalën e tyre vendimtare”./PrizrenPress.com/