Adrian Çollaku
Të nderuar delegatë të Lidhjes Demokratike të Kosovës,
ju kanë mbetur saktësisht edhe një javë kohë deri në mbajtjen e Kuvendit të Përgjithshëm të partisë, ku duhet të vendosni jo thjeshtë për të zgjedhur një kryetar të ri, por do të vendosni për të ardhmen e kësaj partie.
Prandaj, keni kohë të mjaftueshme që të analizoni secilin kandidat para se të votoni, sepse thjesht këto zgjedhje nuk janë të rëndomta, por janë jetike për të ardhmen e partisë suaj dhe të vetë Kosovës.
Të nderuar delegatë, disa prej jush mund të jenë nëpër pozita ekzekutive dhe nëpër pozita të larta publike falë liderit aktual të partisë, i cili është edhe kandidat për kryetar të partisë, mirëpo duhet të mendoni përtej kësaj, ngase nuk do të jenë të përjetshme ato pozita, e as kjo qeveri. Madje, kjo qeveri ka rrezik të bjerë shumë më shpejt se sa që mendoni ju, pra ndoshta para Vitit të Ri.
Dhe shtrohet pyetja e thjeshtë pse kjo qeveri nuk e ka gjatë. Janë të shumta arsyet, mirëpo po i numëroj disa prej tyre.
Së pari, ky koalicion është në kundërshtim me vullnetin e anëtarësisë së LDK-së. Këtë e tregojnë edhe sondazhet e fundit, ku LDK-ja që nga koha kur ka hyrë në koalicion me PDK-në, është nën 17 për qind, pra duke rënë partia e tretë në vend, më poshtë edhe se Lëvizja Vetëvendosje, edhe pse ata të partisë nuk ua tregojnë këtë fakt.
Së dyti, LDK edhe pse po thirret se e ka postin e kryeministrit, të paktën formalisht, po shihet në realitet se kush është kryeministër i vendit e kush është Shefi. Hierarkia është shumë e thjeshtë, Hashim Thaçi e Kadri Veseli me fuqi të pakontestueshme, dhe një Isa Mustafa formal, që se pyet kush për asgjë.
Dhe së fundi, LDK po tregohet e pafuqishme ta luftoj korrupsionin dhe krimin e organizuar, duke bërë që e gjithë përgjegjësia e dështimit t’i mbetet partisë së drejtuar nga Isa Mustafa, sepse të gjitha mekanizmat e shtetit, citojmë vet Mustafën vazhdojnë të jenë të kapura nga PDK-ja .
Të nderuar delegatë të Kuvendit të LDK-së, ai i keni bërë ende pyetje vetit, se çka mendojnë anëtarësia, çka mendon baza e LDK-së, qoftë për koalicionin me PDK-në, qoftë për atë se kush janë kandidatët që do të udhëheqin me partinë në vitet e ardhshme. Apo e dini përgjigjen dhe ndoshta mendoni vetëm për ndonjë interes të ngushtë personal dhe afatshkurtër.
Edhe pak ditë ju kanë mbetur, ku i keni vetëm dy rrugë para vetes.
Njëra është vazhdimi i tatëpjetës së LDK-së më në krye Isa Mustafën. Dhe e dyta është rimëkëmbja e kësaj partie, duke e zgjedhur Vjosa Osmanin në krye të partisë.
Kandidatët tjerë, si Fatmir Sejdiu e Lutfi Haziri nuk e kanë seriozisht këtë garë. Lutfi Haziri më tepër e ka taktikë, në marrëveshje me Isa Mustafën, vetëm e vetëm që ta neutralizojnë sa më shumë Vjosa Osmanin, derisa Fatmir Sejdiu, është një kandidat i harxhuar, i cili kësaj gare i ka hyrë që të mund të fuqizohet të paktën si individë.
Delegatë të LDK-së, besoj se e keni të njohur botërisht faktin që kandidati për kryetar të partisë Suaj, dhe njëherësh, lideri aktual, Isa Mustafa e mundi Fatmir Sejdiun më 2010, pikërisht duke u thirrur në rrëzimin e PDK-së nga pushteti dhe në ç’kapjen e shtetit prej tyre.
Mirëpo, çka ndodhi në realitet.
Ai pos që nuk arriti t’i rrëzoj ata nga pushteti, u bë me ta, duke ua mundësuar atyre mbetjen në pushtet, dhe duke e rehabilituar këtë parti, nga të gjitha ato shkelje e hajni që i kishte bërë për më shumë se shtatë vjet.
Isa Mustafa duke u munduar që sërish ta marrë drejtimin e partisë, e pamë se sa shkeljet u bënë nëpër nëndegë e degë gjatë zgjedhjeve të brendshme. Në shumicën e këtyre nëndegëve dhe degëve, Isa Mustafa dhe njerëzit e tij, instaluan një formë jodemokratike të zgjedhjeve. Aklamacioni që nuk aplikohej në këtë parti, për herë të pari u bë normale si formë e zgjedhjeve, vetëm e vetëm që Isa Mustafa të mbes edhe më tutje në pushtet…
Dhe mbetja e tij e vazhdueshme në pushtet i ka vetëm dy të mira: rehabilitimin e mëtutjeshëm të PDK-së nga hajnia dhe keqqeverisja dhe zgjedhjen e Hashim
Thaçit si president shteti. Natyrisht edhe punësimin e disa njerëzve të LDK-së. Kaq. Për luftimin e korrupsionit, krimit të organizuar, zhvillimit ekonomik as mos të flasim. Nuk ka indikacione në këtë drejtim, fatkeqësisht.
Kjo formë jo demokratike e instaluar nga Isa Mustafa dhe njerëzit e tij për t’i fituar zgjedhjet me çdo kusht, duke u munduar që të ngufatet zëri i vërtetë i anëtarësisë së LDK-së, do t’i hakmerret edhe më shumë kësaj partie. Se cili është vullneti i anëtarësisë e tregon më së miri edhe mënyra se si nënkryetarja e Isa Mustafës, Teuta Sahatqija, dështoi në Gjakovë. Dështoi poashtu edhe ndër njerëzit më të fuqishëm në këtë parti, Sabri Hamiti. E lista e njerëzve të Isa Mustafës që dështuan është shumë shumë më e gjatë, si Sadri Ferati e shumë të tjerë.
Dhe a e dini pse ka ndodhur një dështim i tillë. Për arsye se isa Mustafa dhe njerëzit e tij nuk arritën të menaxhojnë këto nëndegë e degë dhe nën dy, për faktin kryesore, se këta njerëz ishin pro koalicionit me PDK-në.
Të nderuar delegatë të LDK-së, argumentet janë të panumërta, se pse Isa Mustafa nuk është në të njëjtën vijë me anëtarësinë e LDK-së.
Megjithatë, është në dorën Tuaj, që më 31 maj, ta votoni këtë trend të rënies, apo të votoni një frymë të re, në krye me Vjosa Osmanin, e cila deri më tani ishte e vetmja që kishte një mendim dhe një qëndrim konsistent.
Në momentin që Isa Mustafa dhe servilët e tij për rreth i ranë në krah Hashim Thaçit e PDK-së, u tërhoq nga ta, duke mos pranuar asnjë post. Mendoni se Osmani nuk do të mund të ishte zëvendëskryeministre dhe të kishte një ministri nën udhëheqje?! Mirëpo, ajo tregoi se e kishte sinqerisht respektimin e vullnetit të anëtarësisë së partisë dhe u tha jo.
Dhe sot, ajo është e vetmja kandidate për kryetare të LDK-së, që të paktën i ka paraqitur 10 shtylla se si duhet të frymoj LDK-ja. Pavarësisht luftës që i është bërë asaj nga Isa Mustafa dhe njerëzit e tij, për shkak edhe të pozitës që kanë në qeverisje, ajo sot paraqet alternativën më serioze.
Delegatë të LDK-së, sot një javë ju vendosni se kah do ta çoni LDK-në…