Dje Policia e Krimeve Ekonomike ndaloi biznesmenin nga Suhareka Aziz Tafaj njërin nga bashkëpronarët e ish-kompanisë NBI Suhareka tash e quajtur “Agrokosova Holding”.
Lajmin e ndalimit të biznesmenit e konfirmoi për KALLXO.com Shpresa Berisha, avokatja e Aziz Tafajt.
Ajo bëri të ditur se askush nuk i di arsyet e ndalimit të Tafajt.
Tafaj, por edhe italianët Roberto Migoto e Gianfranco Fantineli janë aksionarë të ish-ndërmarrjes shoqërore NBI Suhareka, por në shtator me një vendim gjykate që u ekzekutua nga një përmbarues privat Fantinelit iu lejua hyrja në ndërmarrjen e privatizuar.
Me këtë nuk u pajtuan partnerët biznesorë Aziz Tafaj e Roberto Migoto.
Ditën kur Fantineli hyri në hapësirat e ndërmarrjes që pas privatiimit quhet “Agrokosova Holding” Tafaj e quajti të njëanshëm dhe në kundërshtim me statutin e ndërmarrjes vendimin e gjykatës që lejoi Fantinelin të hyjë në këtë ndërmarrje.
Në tetor të vitit të kaluar Aziz Tafaj, Shaban Tafaj dhe partneri italian Roberto Migoto u arrestuan nga policia, ngase tentuan të hyjnë në ambientet e ndërmarrjes.
Ndërmarrja për kultivimin dhe prodhimin e rrushit NBI Suhareka ishte privatizuar në vitin 2006./Kallxo.com/