Prizreni së shpejti do të ketë adresa të reja. Megjithatë, jo të gjitha tabelat e vjetra, të vëna menjëherë pas luftës së fundit do të ndërrohen. Për herë të parë, tabela orientuese nëpër rrugë do të ketë edhe në fshatrat e kësaj komune.
Komisioni për Emërtimin e Rrugëve, Shesheve dhe Lagjeve të Prizrenit (KERRSHLP), i themeluar nga Kuvendi i Komunës, tashmë ka bërë emërimin e 1.645 rrugëve, ndërsa fjalën përfundimtare rreth këtij procesi do ta thotë Kuvendi i Komunës, në mbledhjen e radhës, që do të mbahet më 28 maj.
Pas mbi 50 mbledhjeve të mbajtura rreth përcaktimit të emrave që do të mbajnë rrugët dhe sheshet, Komisionit përkatës i është dashur një punë e ngjeshur prej shtatë muajsh, por që del se ka pasur kompromis në mes të anëtarëve dhe se një pjesë e emërtimeve të bëra që në kohën e Qeverisë së Përkohshme të Kosovës, menjëherë pas përfundimit të luftës, fare nuk janë ndryshuar./Zëri/