Fiks 2370 euro i ka kushtuar një iftar kryetarit të Prizrenit, Shaqir Totajt.
Iftari është shtruar në prill të këtij viti për personalitete dhe përfaqësues të institucioneve të ndryshme.
Shuma e pagesës është lejuar më datën 16.5.2022.
“Lejohen mjetet e nevojshme financiare për pagesën e shpenzimeve të krijuara lidhur me iftarin e shtruar gjatë muajit të Ramazanit për personalitete dhe përfaqësuesit e institucioneve të ndryshme të Prizrenit nga kryetari i Komunës së Prizrenit”, thuhet në vendimin për lejimin e mjeteve nga Totaj, shkruan “PrizrenPress”.
Mjetet janë derdhur në llogari të lokalit R.H “Nafron Excluzive” në Prizren.
Asamblisti i Vetëvendosjes në Prizren, Selman Sokoli, ka kritikuar qeverisjen lokale për këtë shpenzim.
Sipas tij, këto mjete janë shpenzuar me strukturat e PDK-së.
“Partia Demokratike “brengoset” shumë për qytetarët kur është në opozitë, sikurse tani në nivel nacional, por në pushtet ajo e vazhdon avazin e vjetër duke mos u kujdesur që taksat e qytetarëve t’i shpezojë me kujdes dhe transparencë”, tha Sokoli.
Sokoli kërkon nga Totaj që të mos e shpenzojë buxhetin e qytetarëve për PDK-në.
“Partia që qet lot krokodili për popullin e Kosovës, taksat e tyre i shpenzon në dreka e darka për strukturat e saj partiake”, shprehet ai./PrizrenPress.com/
https://kk.rks-gov.net/prizren/wp-content/uploads/sites/26/2022/05/Lejimi-i-mjeteve-Iftari.pdf