Në rrugën “Skënderbeu” në Komunën e Malishevës është raportuar se viktima i gjinisë mashkullore, derisa po hapte një kanal, ka pasur rrëshqitje të dheut me ç’rast viktima ka pësuar lëndim trupor.

Sipas Policisë, viktima është jashtë rrezikut për jetën ku pas marrjes së tretmanit mjekësor në QM-Malishevë, është dërguar për trajtim mjekësor në QKUK.

Rastit i janë përgjigjur njësitë relevante policore si dhe Inspektori i Punës.

Sipas raportit të Policisë së Kosovës rasti ka ndodhur dje rreth orës 17.

Në Komunën e Suharekës është raportuar se pullazin e shtëpisë, një objekt me ushqim për bagëtinë dhe një minibus të viktimës, e ka përfshirë zjarri.

Njësiti i zjarrfikësve ka intervenuar duke lokalizuar dhe shuar zjarrin.

Sipas raportit të policisë nuk raportohet për të lënduar.

Rastit iu kanë përgjigjur njësitet relevante policore si dhe është njoftuar njësiti i KEDS-it.

Kjo ngjarje ka ndodhur dje rreth orës 23:50.

Këshilltarët opozitarë kanë dorëzuar kërkesën për thirrjen e seancës së jashtëzakonshme të Kuvendit të Komunës së Prizrenit me qëllim të diskutimit të gjendjes aktuale në arsim. Kërkesa është nënshkruar nga këshilltarë të PDK-së dhe të AAK-së dhe është adresuar te kryesuesi i KK-së, Artan Abrashi.

“Me iniciativë të grupit të këshilltarëve të PDK-së dhe përmes nënshkrimeve të anëtarëve të KK-së së Prizrenit kërkojmë nga kryesuesi të thërrasë mbledhjen e jashtëzakonshme me këtë rend dite: ‘Debat për gjendjen jo të mirë në arsim, konkursin për drejtorë dhe zv.drejtorë të shkollave’”, shkruan në kërkesë, shkruan sot Koha Ditore.

Dërgimin e kësaj kërkese e ka konfirmuar shefi i grupit të këshilltarëve të PDK-së, Samir Krasniqi. “Kërkesën për seancë të jashtëzakonshme e kemi dorëzuar sot në Komunë. Përmes saj kemi kërkuar që në KK të debatohet për gjendjen jo të mirë në arsim dhe konkursin për drejtorë dhe zv.drejtorë të shkollave”, ka thënë Krasniqi./koha ditore/

Në territorin e Komunës së Malishevës të mërkurën kanë ndodhur disa zjarre fushore, ndërsa njësia e zjarrfikësve të Malishevës, ka intervenuar në tri zjarre të mëdha fushore.

Drejtoria për Mbrojtje dhe Shpëtim, apelon tek qytetarët, që të bëjnë kujdes të shtuar.

Në disa raste, këto zjarre fushore, kanë rrezikuar të përhapen në masë dhe duke rrezikuar djegien e pyjeve dhe të shtëpive, por duke ju falënderuar ndërhyrjes së njësisë së zjarrfikësve, janë shuar këto zjarre.

Bashkë me njësitë e zjarrfikësve, në këto incidente zjarri kanë intervenuar edhe njësitë e policisë dhe Drejtoria për Mbrojtje dhe Shpëtim.

Drejtori për Mbrojtje dhe Shpëtim, Valon Gashi ka apeluar tek qytetarët, që të bëjnë kujdes të shtuar dhe të mos shkaktojnë zjarre në fusha, qoftë nga hedhja e cigareve apo edhe nga djegia e hamulloreve dhe barit të thatë, pasi për shkak të thatësisë së madhe, zjarret përhapen shpejt dhe nuk mund të kontrollohen.

Sekretarja Parlamentare e Shtetit në Ministrinë Federale për Bashkëpunim Ekonomik dhe Zhvillim, Maria Flachsbarth, dhe Sekretari Parlamentar i Shtetit në Ministrinë Federale të Mbrojtjes, Thomas Silberhorn edhe sot do të vazhdojnë vizitën në Kosovë.

Të dy së bashku do ta mbyllin kampin gjerman të KFOR-it në Prizren dhe në mënyrë simbolike do të hapin Parkun Invativ dhe Trajnues “ITP Prizren” për të cilin shfrytëzohet kampi fushor në Prizren, raporton RTKlive.

“Gjermania dhe ushtria gjermane (Bundeswehr-i) do të mbeten edhe më tej aktive në Kosovë. Pas një pranie 20-vjeçare në Prizren, Bundeswehr-i e transferon angazhimin e tij në Camp Film City në Prishtinë dhe mbetet edhe më tutje i aktiv në kuadër të KFOR-it. Në hapësirën e kampit fushor në Prizren do të ngritet Parku gjermano-kosovar Inovativ dhe Trajnues (ITP), i cili do të mbështetet me mjete të Qeverisë së Kosovës dhe Ministrisë Federale gjermane për Bashkëpunim Ekonomik dhe Zhvillim”, thuhet në njoftimin e Ambasadës gjermane në Prishtinë.

Gjatë vizitës së tyre, sekretarët parlamentarë do të takojnë kryeministrin e Kosovës, Ramush Haradinaj dhe ministrin e Financave, Bedri Hamza.

Në vazhdim të bisedave ata do të marrin pjesë në pritjen e Ambasadës Gjermane për Ditën e Bashkimit të Gjermanisë, e cila këtë vit shënohet në frymën e 10-vjetorit jubilar të marrëdhënieve diplomatike në mes Gjermanisë dhe Kosovës.

Sot pasdite mbahet një apel i fundit i Bundeswehr-it tek Shadërvani në Prizren. Më pas, në mënyrë simbolike do të hapet Parku gjermano-kosovar Inovativ dhe Trajnues “ITP Prizren”.