Deputeti i Lidhjes Demokratike të Kosovës, Haxhi Avdyli përmes një postimi të gjatë në Facebook ka bërë të ditur se do të marrë pjesë në protestën e së shtunës që është thirrur nga partia tjetër opozitare, Lëvizja Vetëvendosje.

Ky vendim i Avdylit bie ndesh me vendimin e kryesisë së LDK-së, të cilët e kishin refuzuar ftesën e Vetëvendosjes për protestë.

“Unë vendosa. Që të shtunën nga ora 14 deri 16, ta zhveshi petkun e Neurokirugut, mësimdhënësit, veteranit por edhe kryetarit të degës së LDK-së e deputetit dhe të jem vetëm një qytetarë më shumë në Protestën e së shtunës”, ka shkruar ne Facebook, deputeti i LDK-së, Haxhi Avdyli.

Ai thotë se në protestën nuk po shkon për hatër të asnjë lideri opozitar, por vetëm kundër Hashim Thaçit.

“Aty do jem vetëm për Kosovën unike e të pandarë. Për hatër të asnjë lideri opozitar por vetëm kundër Hashim Thaçit vizatuesit të dështuar hartave të copëtimit Qosiqian të Kosovës”, ka shkruar tutje Avdyli.

Ai thotë se të shtunën, në protestë do të jetë së bashku me mijëra votues të LDK-së, e me tre flamuj, shtetëror, kombëtar e flamurin dardan.

Gjykata Themelore e Gjakovës nuk e ka shpallur aktgjykimin ndaj të akuzuarit për vrasje në Ratkoc të Rahovecit, Feriz Hoti.

Kjo pasi është gjetur dëshmitari i arratisur më parë nga burgu.

Natën e 17 Majit 2017, dëshmitari Muhamet Kiqmari nga Podujeva, bashkë me Evan Poterën, Liridon Sylejmanin dhe Hamdi Jusufi, kishin dalë me makinë me qëllim që të vjedhin një market.

Kiqmari tha se ‘në fillim kemi parë një shtëpi 6-7 metra larg marketit ku ka qenë e ndezur një dritë në katin e dytë, mirëpo kur i jemi afruar marketit dritën e ndezur nuk e kemi parë më”.

“Unë kam tentuar ta hap derën e marketit me një mjet, ndërsa Evani me dana, duke u munduar që ta këput zingjirin e dryrit të marketit dhe ndërsa Liridoni ka pritur në makinë. Pastaj dikush ka gjuajtur me armë 2-3 herë dhe ne kemi filluar të ikim”, ka treguar dëshmitari Kiqmari.

“Hamdiun e kam parë vetëm që është rrëzuar, mirëpo nuk na ka shkuar mendja që e ka kapur plumbi. Mirëpo të nesërmen e kemi kuptuar që ka vdekur”, tha dëshmitari.

Avokati i të akuzuarit Sefer Morina, e pyeti dëshmitarin se “atë natë a e keni parë personin që ka gjuajtur me armë?”

“Jo, as nuk e kam parë sepse kam ikur”, u përgjigj dëshmitari.

Prokuroria pretendon se Feriz Hoti ka kryer vjrasjen e Hamdi Jusufit natën e 17 majit 2017 në Ratkoc të Rahovecit, kur ka qëlluar drejt disa personave që po tentonin të hynin dhunshëm në dyqanin e tij.

Në seancën e kaluar, i akuzuari Feriz Hoti ishte deklaruar i pafajshëm.

“Kërkoj nga Gjykata që të më lirojë nga aktakuza. Shpreh keqardhje për të dëmtuarën Nazife Jusufi, mirëpo unë jam i pafajshëm dhe se në burg po qëndroj qe 15 muaj pa faj”, kishte thënë i akuzuari Hoti.

Gjykimi vazhdoi me fjalën përfundimtare dhe prokurori Uka tha se mbetet në tërësi pranë fjalës së tij përfundimtare të dhënë në seancën e kaluar.

Ndërsa mbrojtësi i të akuzuarit avokati Sefer Morina, tha se edhe pas dëshmisë së sotshme të dëshmitarit Muhamet Kiqmari, nuk është vërtetuar fajësia e të mbrojturit tim, sepse ai të akuzuarin nuk e ka parë natën kritike.

Në aktakuzë thuhet se Feriz Hoti, pasi që dëgjoi zhurmën që po shkaktonin Hamdi Jusufi, Muhamet Kiçmari, Liridon Sylejmani dhe Evan Potera që po tentonin të thyenin derën e marketit “Rama-F” për të vjedhur brenda tij, doli nga oborri i shtëpisë dhe me armë filloi ndjekjen e tyre.

Sipas aktakuzës, katër personave që po tentonin të vidhnin në lokalin e tij, Hoti në fillim u kërkon të ndalen duke i sharë, e më pas kur ata vazhdojnë të ikin ai vazhdon të gjuajë drejt tyre me pushkën automatike “AK 47”.

Në aktakuzë përshkruhet edhe momenti kur i akuzuari e qëllon tani të ndjerin Hamdi Jusufi.

“Në të shtënën e fundit qëllon tani të ndjerin Hamdi në pjesën e kokës dhe nga plaga e marrë vdes në vend të ngjarjes”, thuhet mes tjerash në aktakuzë.

Shpallja e aktgjykimit do të bëhet nesër në ora 09:00.

Kryeprokurori i Prokurorisë Themelore në Prizren, Admir Shala, ka mbajtur takim me të gjithë përgjegjësit të cilët merren me trajtimin e rasteve që ndërlidhen me veprat penale të cilësuara si dhunë në familje, brenda kompetencës së kësaj prokurorie, me qëllim të ngritjes së efikasitetit për trajtimin e rasteve të tilla.

Në këtë takim ishin të pranishëm prokurorë përgjegjës për rastet e dhunës në familje, përfaqësues nga Policia e Kosovës për rajonin e Prizrenit, gjykatës, mbrojtës të viktimave, përfaqësues nga Qendra për Punë Sociale, Strehimorja, Zyra për Ndihmë Juridike Falas, si dhe zyrtarë nga Shërbimi Sprovues.

Kryeprokurori Shala nga të pranishmit kërkoi bashkëpunim dhe bashkërendim të plotë mes institucioneve kompetente, me qëllim të ndërmarrjes së veprimeve të nevojshme, që trajtimi i rasteve të tilla të ketë prioritet të plotë dhe ndaj tyre të veprohet dhe të reagohet me urgjencë.

“Pjesëmarrësit në takim u pajtuan për nevojën e ndërtimit të raporteve më të drejtpërdrejta edhe me viktimën (të dëmtuarën) e dhunës në familje. Në këtë drejtim koordinatorja për dhunë në familje nga Prokuroria Themelore në Prizren, Mehreme Hoxha, zyrtarëve policorë ua prezantoi nga një kopje të vlerësimit të rrezikut si dhe të urdhërit për mbrojtje emergjente, me rekomandimin që në të ardhmen së bashku me kallëzimin penal, të plotësohet nga viktima edhe formulari për vlerësimin e rrezikut. Në fund të takimit, të gjithë pjesëmarrësit vlerësuan se duhet të thellohet edhe më tutje bashkëpunimi dhe të mbahen takime më të shpeshta sa i përket rasteve të tilla në mënyrë që të shtohen mekanizmat e mbrojtjes ndaj dhunës në familje”, thuhet në komunikatë.

Deputeti i Lidhjes Demokratike të Kosovës, Haxhi Avdyli, ka reaguar për deklaratën e zv/kryeministrit të Kosovës, Behgjet Pacollit, i cili ka thënë se me serbët nuk ka pasur kurrë problem dhe se ka jetuar gjithmonë me ta, shkruan Insajderi.

Avdyli ka thënë se Pacolli ndoshta nuk ka pasur probleme me serbët, por Kosova po. Ka thënë se Kosova ka probleme me Serbinë për shkak se janë të zhdukur më shumë se 2 mijë persona dhe ka vrarë 10 mijë persona të tjerë.

“Ky zotnia ka dashtë me thënë unë skam pas problem me Serbët, kam jetuar me ta. Por Kosova të cilën e përfaqëson ky ka fort problem me Serbët sepse ka 10.000 të vrarë, 2000 të zhdukur, 700.000 të burgosur e 100.000 shtëpi të djegura , nga këta miqtë joproblematik të Hashimit e Bexhës. Aman lene lobimin e kthehuni në shtëpi se horë na bëtë”, ka shkruar Avdyli në Facebook.

Pacolli gjatë ditës së djeshme kishte deklaruar për media serbe se Kosova dhe Serbia duhet të heqin kufirin mes dy vendeve.

“Ne kemi jetuar së bashku një herë dhe shoh një tendencë që ata duan të jetojnë së bashku. Ne, në vend që të bëjmë kufij, ne duhet të largojmë kufijtë dhe të lejojmë njerëzit të lëvizin lirisht”, ka deklaruar Pacoli në Neë York për TV Prvu./Insajderi.com