Dy të akuzuarit për vjedhje të rëndë, U.K. dhe Sh. E., kanë pranuar të hyjnë në negocim të marrëveshjes për pranimin e fajësisë, me Prokurorinë Themelore në Prizren.

Prokurori i rastit, Fatos Ajvazi, në seancën e së enjtes në Gjykatën Themelore në Prizren, ka propozuar hyrjen në negocim të kësaj marrëveshje, pasi sipas tij, dy të akuzuarit kanë shprehur gatishmëri.

Prokurori për këtë arsye, ka kërkuar që seanca e së enjtes të shtyhet për një ditë tjetër, për tu mundësuar negocimi i marrëveshjes për pranimin e fajësisë.

Mbrojtësit e të akuzuarve, avokatët, Blend Gjini dhe Labinot Elshani, nuk e kanë kundërshtuar një propozim të tillë të prokurorit për hyrjen në negocim të marrëveshjes për pranimin e fajësisë, për dy klientët e tyre.

Gjykatësi i çështjes, Mehmet Ndrecaj, ka marr aktvendim që seanca e së enjtes të shtyhet për një ditë tjetër, varësisht nga epilogu i negocimit të marrëveshjes mbi pranimin e fajësisë.

Prokuroria Themelore në Prizren ka ngritur aktakuzë ndaj U. K.dhe Sh. E, të cilët i akuzon se më 20 tetor 2014, gjatë kohës së mesnatës në rrugën “Azem Bejta” në Prizren, duke e hapur derën e lokalit të të dëmtuarit D. G., hyjnë dhe nga aty marrin një televizor të vjetër në vlerë prej 80 euro, e më pas largohen nga vendi i ngjarjes.

Me këto veprime, ata akuzohen se në bashkëkryerje kanë kryer veprën penale “vjedhje e rëndë”, nga neni 327.par.1.lidhur me par.31.të KPRK-së./betimiperdrejtesi/

Qyteti i Prizrenit është njëri ndër qytetet më të vizituara brenda vitit në Kosovë. Këtë e dëshmojnë edhe të dhënat e Info qendrës që funksionon në kuadër të Komunës së Prizrenit, por e dëshmojnë edhe asociacionet e tjera turistike, si ASB, pastaj “Caritas Kosova”, të cilat konstatojnë se numri i vizitorëve në këtë qytet është në rritje nga të gjitha anët. Në këtë fillimshtator, në qendër të qytetit” Shatërvani” është vështirë të gjendet një vend për t’u ulur, sidomos vikendeve. Na takuam familjen e Fatmir Hasanit nga Kumanova, që kishte ardhur vetëm për ta vizituar këtë qytet të bukur. “Këtu na pëlqen gjithçka, është shprehur për gazetën “Kosova Sot”, Fatmir Hasani.

Në anën tjetër, Izmir Hasanaj kishte ardhur nga Tetova. “Jemi këtu në Prizren, këtë qytet të bukur të shqiptarisë. Janë të njohur qebapët e këtij qyteti. Për ta vizituar pa diskutim është Kalaja e Prizrenit, pastaj kalldrëmi i njohur që e bën këtë qytet fascinues”.

Ai shton se vetë pamja e këtij qyteti ofron shumë.” Këtu pashë edhe pajtonin karakteristik, pastaj trenin, e po ashtu edhe ato biçikletat karakteristike për katër veta, Kalaja e institucionet e tjera të kulturës, të cilat janë vetë mrekullia e këtij qyteti”, pohon Izmiri, që shoqërohej nga bashkëshortja e tij, Mivadetja. Pikat më me interes për turistët sipas doktoreshës nga Tirana Anila Hoxha, janë objektet kulturore.

“Ky qytet ka marrë pak nga Berati, pak nga Gjirokastra, pak nga Shkodra, e më shumë nga vetvetja. Është qendër e këndshme për shumë vizitorë”, është shprehur ajo për gazetë. “Janë disa nga pikat e rëndësishme të Prizrenit, siç është kompleksi i LSHP-së, pastaj vijnë monumentet e vjetra historike, si xhamitë, kishat dhe monumentet e tjera sakrale”. Duhet thënë se Info Qendra Turistike është e organizuar në hapësirat e njërit prej objekteve komunale që quhet “Beledije”, e cila kohë më parë është restauruar me donacion të fondeve të Komisionit Evropian, të cilën Komuna, përkatësisht Drejtoria e Turizmit e ka dedikuar për ushtrimin e veprimtarisë së Info Qendrës Turistike. Kjo qendër u ofron turistëve shërbime të shumta.

Prizreni vazhdon të mbetet njëri nga qytetet e traditës, pohon Aderim Nelaj nga Shkodra. “Prizreni ia kalon secilit qytet shqiptar me bukuri. Ose ndoshta uji i këtij qyteti i bën njerëzit për vete. Kam dëgjuar një lloj legjende se kush e pi ujin e “Shadërvanit ” për tri ditë më ujërave të tjerë nuk ia di lezetin” tregon ai për gazetë. “Prizreni pastaj vazhdon me një trashëgimi shumë të pasur. Këtu afër ndodhet xhamia, pak përtej kisha, më tutje shihet teqeja e si duket dëgjova se tash do të ketë edhe ndonjë sinagogë. Këto janë virtyte besoni që vetëm në këtë qytet gjenden” përfundon ai. Kalaja duket si një kurorë e kësaj bukurie. Por jo vetëm që afër ndodhen shtëpitë karakteristike, por edhe objektet e tjera e bëjnë këtë qytet të këtillë”, theksoi Nelaj.

Edmund Gollovord nga Gjermania pohoi për gazetën “Kosova Sot” se ndodhet tash e tri javë këtu në Kosovë.

“Më besoni erdha të qëndroj tre- katër ditë, por bukuria magjepsëse e këtij qyteti tash më ka lidhur këtu. S’di si do të rikthehem në Gjermani. Këtu njerëzit janë të buzëqeshur, të këndshëm, pastaj qielli më duket se ka një bukuri tjetër nga qiejt e botës perëndimore”, theksoi ai. Numri i vizitorëve kësaj vere ishte shumë i madh, kurse zyrtarët e Komunës thanë se nuk kanë arritur saktësisht të evidentojnë hyrje- daljet e vizitorëve. Por, gjithë këtë bukuri po e zbeh numri i shtuar i lypsarëve që janë kryesisht nga Shqipëria, tregon prof. Habib Berisha, i cili pohon se këtë qytet duhet shpëtuar nga këta lypsarë të organizuar që vijnë nga Shqipëria./kosova sot/

Prokuroria Speciale pretendon se në gjykimin ndaj grupit Kqiraj dhe të tjerëve dëshmitarët kishin ndërruar deklaratat e tyre  pa ndonjë shpjegim. Kjo sipas ankesës së prokurorisë së Shtetit kishte ndikuar në dënimet e ulëta ndaj pjesëtarëve të grupit.

Sipas prokurorisë, edhe pse gati të gjithë dëshmitaret në shqyrtim gjyqësor i kanë ndryshuar deklaratat gjykata nuk e ka shqyrtuar fare faktin e ndryshimit të deklaratave të dëshmitarëve.

Kurse për veprën penale të detyrimit sipas prokurorisë të akuzuarit as nuk janë liruar as nuk janë shpallur fajtorë.

Gjykata Themelore e Prizrenit të akuzuarit kryesor të këtij rasti, Tunë Kqirajt i ka shqiptuar dënim me 2 vjet e 3 muaj burg, Kastriot Kqira është dënuar me 3 vjet burg, Gjon Kqira me 2 vjet e 6 muaj, Gjekson Kqira me 5 muaj, Gëzim Kqira me 5 muaj, Benson Buza me 2 vjet e 6 muaj, Besfort Omaj me 2 vjet e 5 muaj, Zyrafete Hukolli me 6 muaj, Ekrem Leci me 6 muaj, Hil Kaqinari me 6 muaj ndërsa dy të akuzuarit tjerë Ragip Fazlija dhe Sejfë Kaqorraj ishin liruar nga akuzat.

Ndaj aktgjykimit të Gjykatës së Apelit ankesë kanë paraqitur si prokurori ashtu edhe të akuzuarit dhe mbrojtësit e tyre.

Në ankesën drejtuar Gjykatës së Apelit, prokuroria ka propozuar që kjo lëndë të kthehet në rigjykim por jo të njëjtës Gjykatë por rasti të gjykohet në një Gjykatë tjetër.

Mbrojtësi i të akuzuarit Tunë Kqiraj, avokati Azem Vllasi ka deklaruar se ai e ka kundërshtuar aktgjykimin e shkallës së parë vetëm për faktin se i mbrojturi i tij është shpallur fajtor për veprën penale të organizimit të skemave piramidale dhe bixhozit e që sipas avokatit i mbrojturi i tij mund ta ketë pasur këtë ves për të luajtur lojëra të tilla, por që ai asnjëherë nuk ka qenë organizator i këtyre lojërave.

Edhe mbrojtësit e të akuzuarve të tjerë që ishin të pranishëm në gjykatë, e kundërshtuan aktgjykimin e Gjykatës Themelore të Prizrenit.

Kurse avokatja Kosovare Kelmendi e cila në këtë proces gjyqësor e mbron të akuzuarin Marian Kqira i cili është shpallur fajtor vetëm për veprën penale të armëmbajtjes, vepër të cilën e kishte pranuar, nuk ka paraqitur ankesë në aktgjykimin e kësaj gjykate por është përgjigjur në ankesën e prokurorisë.

Edhe përfaqësuesi i palës së dëmtuar, avokati Arianit Koci tha se mbetet në tërësi pranë ankesës së ushtruar me shkrim dhe njëherësh e përkrah propozimin e prokurorisë.

Sipas Prokurorisë Speciale, gjatë disa viteve të kaluara, të pandehurit Tunë, Kastriot, Gjon, Marjan, Gjekson e Gëzim Kqira dhe Benson Buza kanë vepruar si grup i organizuar kriminal më qëllim të përfitimit të drejtpërdrejtë të dobisë financiare, duke kryer vepra të rënda penale.

Sipas aktakuzës, Tunë Kqira i ka mbikëqyrur dhe i ka drejtuar veprimet e këtij grupi kriminal.

Grupi ka shfrytëzuar gjendjen e rëndë financiare ose papërvojën e të dëmtuarve dhe u ka dhënë para me fajde. Pastaj, duke përdorur kërcënimet e rënda, i kanë detyruar të paguajnë kamata dukshëm jo proporcionale, ose të kryejnë ndonjë veprim tjetër në dëm të pasurisë së tyre.

Të akuzuar në këtë rast ishin: Tunë, Kastriot, Gjon, Marjan, Gjekson e Gëzim Kqira, Benson Buza, Besfort Omaj, Zyrafete Hukolli, Ragip Fazlija, Ekrem Leci, Hil Kaçinari, Sejdë Kaqorraj dhe Zef Oroshi.

Emisioni ‘Drejtësia në Kosovë’ në maj të vitit të kaluar transmetoi të gjeturat e një hulumtimi për dëshmitarët e proceseve të fajdeve.

Një person është lënduar rëndë teksa ishte në vendin e punës në rrugën “Ukë Bytyqi” në Prizren, të mërkurën në mëngjes.

Gjatë punës për betonimin e pllakës së një objekti banesor, kamioni që hidhte betonin ka pësuar avari dhe është goditur viktima që ka marrë lëndime të rënda trupore.

Ai është dërguar në spitalin rajonal të Prizrenit.

Policia ka thënë se në vendin e ngjarjes kanë dalë inspektorët e punës dhe njësitë relevante policore.

Gjykata Themelore në Prizren, ka mohuar se është e korruptuar.

“Kolegjiumi i gjyqtarëve që u mbajt me datën 05.09.2018, ka konstatuar se perceptimi i kësaj organizate që e cilësoi Gjykatën e Prizrenit si të korruptuar nuk është reale, është marr mendimi i një numri të kufizuar të avokatëve, ndërsa intervista e marr nga publiku nuk e ka këtë perceptim”, njofton Gjykata në Prizren.

Misioni i USAID në bashkëpunim me OJQ-në “Demokracia Plus ” kanë prezantuar ditë më parë hulumtimin rreth transparencës dhe efikasitetit të gjykatave themelore të Kosovës, e cila përmban rezultatet e anketave rreth kënaqshmërisë së qytetarëve me shërbimet e gjykatave – sipas vlerësimit të avokatëve.

Hulumtim mbi transparencën/qasjen dhe efikasitetin e Gjykatave Themelore në Kosovë është përgatitur me 817 respondentë në shtatë Gjykata Themelore në Kosovë. Hulumtimi gjeti një numër të mangësive në cilësinë e shërbimeve të ofruara nga gjykatat.

“Nga këto gjetje të këtij raporti me 817 respondentë në shtatë gjykata themelore në Kosovë është kuptuar se Gjykata Themelore në Prizren është ranguar si më e korruptuara…”, thuhet në raportin e OJQ-së, “Demokracia Plus”.
Ndërkaq, burimet e “PrizrenPress”-it bëjnë të ditur se ky konstatim ka “trazuar” gjyqtarët e kësaj gjykate.

“Gjykata e Prizrenit është vlerësuar si gjykatë më efikase dhe më transparente, andaj nuk ka mundësi të qëndrojnë paralel, efikase transparente – korruptuar, kjo ka qenë një intervistë individuale e marrë nga një numër i kufizuar i avokatëve, prandaj edhe nuk është realja e këtij perceptimi nëse është cilësuar gjykata më efikasja dhe më transparentja nuk mundet me qene e korruptuar. Në momentin kur lëndët kryhen me kohë nuk ka vend për korrupsion”, thuhet në njoftim të Gjykatës në Prizren.

“Përkundër kësaj kolegjiumi ka vendosur me qëllim të parandalimit të çfarëdo keqpërdorimi: të vendoset kutia e ankesave në korridorin e gjykatës dhe degëve të saj, tu ndalohet avokatëve hyrja në gjykatë pa ftesë dha pa leje të gjykatësve me përjashtim në zyrën ku duhet të dorëzohen parashtresat, ndalimi i komunikimit EXPARTE si dhe rritja e nivelit të përgjegjësisë dhe llogaridhënies për gjyqtar dhe stafin përgjegjës, po ashtu është vendosur që asnjë avokat sipas detyrës zyrtare nuk mund të caktohet nga gjykata pa konsultimin paraprak të Odës së Avokatëve të Kosovës”.

“Në mbledhjen e kolegjiumit të gjyqtarëve është vlerësuar se gjykata me Odën Rajonale të Avokatëve ka pasur edhe ka raporte shumë të mira ashtu që një numër i kufizuar i avokatëve nuk mund të ndikoj në prishjen e raporteve të mira siç kanë qenë deri më tani, mirëpo është obligim edhe i avokatëve ti lajmërojnë rastet e korrupsionit nëse kanë fakte”.

“Përndryshe jemi të përcaktuar ta luftojmë korrupsionin dhe krimin çfarëdo qoftë ai.Jemi të hapur dhe mirëpresim të gjitha Institucionet përfshirë edhe mediat”./PrizrenPress.com/