Dy partnerët e koalicionit në Prizren, VV dhe LDK, po e shqyrtojnë mundësinë e ndërrimit të drejtorive të Ekzekutivit.

LDK po e kërkon Drejtorinë e Shëndetësisë, ndërsa Drejtorinë e Mirqeniesë Sociale, të cilën e drejton aktualisht, dëshiron t’ia japë Vetëvendosjes.

Burime të “TV Prizreni”, thonë se kohëve të fundit janë duke u zhvilluar bisedime intensive ndërmjet këtyre dy subjekteve politike për t’i ndërruar drejtoritë.

Kryetari i degës së LDK-së, Haxhi Avdyli, gjatë bisedimeve me zyrtarë të VV-së, ka kërkuar që drejtori aktual i Mirëqenies Social, Fejzë Kabashi, të emërohet drejtor i Shëndetësisë, ndërsa LVV-ja ende nuk ka ndonjë emër që mund të drejtonte drejtorinë e Mirëqenies Sociale.

Po sipas këtyre burimeve, një pjesë e LDK-së por dhe disa zyrtarë të VV-së, janë të mendimit që nëse arrihet marrëveshje për këto ndryshime, në krye të Drejtorisë së Shëndetësisë të vendoset një zyrtar tjetër i LDK-së, i cili merret me profesionin e mjekut, e jo drejtori aktual i Mirëqenies Sociale.

Mirëpo, një gjë e tillë nuk ka gjetur mbështetje rreth njerëzve të cilët aktualisht e kanë në dorë LDK-në .
Në anën tjetër, zyrtarë të LVV-së, thonë se për këtë çështje nuk kanë pasur takime me partnerin e koalicionit, si dhe nuk kanë diskutuar për një gjë të tillë me kryetarin e komunës, Mytaher Haskuka.

Partia Demokratike e Kosovës (PDK) në Prizren, thotë se 7 mjekë, mësimdhënës në shkollën e mjekësisë “Luciano Motroni”, janë larguar nga puna.

Sipas këtij subjekti politik, në këtë shkollë orët e lëndëve mjekësore nuk janë duke u mbajtur.

“Arsyet janë të qarta politike, që të largohen mësimdhënësit me përvojë dhe të sillen militantët e tyre partiak. Drejtoria komunale e arsimit në Prizren, shpall konkurs duke shkelur Udhëzimin Administrativ 05/2015-Normativi për mësimdhënësit e arsimit profesional, Ligjin e Punës Nr.3/L-212-2010, Ligjin e Arsimit Parauniversitar Nr. 04/L-032-2011, Ligjin për Arsim në Komuna Nr.03/L-068-2008, Ligjin për Arsimin dhe Aftësimin Profesional Nr. 04/L-138-2013, ku largon mjekët specialistë dhe shpall konkurs për mjekë të përgjithshëm duke anashkaluar legjislacionin në fuqi, dhe të arrijë qëllimet për interesa të tyre partiake”.

Mësimdhënësit e larguar nga kjo shkollë, në këtë institucion shkollor punojnë me dhjetëra vite:
Sharr Vezgishi – mjek specialist, 28 vite përvojë pune në këtë shkollë.
Nazif Ahmeti- mjek specialist, 16 vite përvojë pune në këtë shkollë.
Genc Muja- mjek specialist, 18 vite përvojë pune në mësimdhënie.
Nexhip Berisha- mjek specialist, 8 vite përvojë pune në këtë shkollë.
Shenasi Xhemaj- mjek& psikolog, 3 vite përvojë pune në këtë shkollë.
Filiz Hashani – mjeke, 19 vite përvojë pune në këtë shkollë.
Armend Fejza- mjek, 10 vite përvojë pune në këtë shkollë.

“Çfarë cilësi pritet të ketë në këtë shkollë, pas këtij vendimi skandaloz ? “

“ShMLM “Luciano Motroni’’ në Prizren, ndër vite ka qenë shkolla më e mirë në nivel të Kosovës për cilësi, kjo është vlerësuar nga DKA në Prizren dhe MASHT-i. Kjo cilësi është arritur fal angazhimit dhe përvojës shumëvjeçare të këtyre mësimdhënësve profesional mjek- specialist dhe mësimdhënësve tjerë që punojnë në këtë shkollë”.

“Bazuar në kualifikimin, përvojën, performancë e këtyre mësimdhënësve, duket qartë se problemi është politik, ku drejtori i DKA në Prizren, Skënder Susuri, vepron në mënyrë selektive, ku nuk vepron njëjtë dhe nuk hapë konkurse për mësimdhënës të cilët nuk janë adekuat apo të kualifikuar, dhe ku numri i tyre është mjaftë i lartë. Në krejt këto lojëra politike të DKA-së në Prizren të vetmit që pësojnë janë nxënësit”./PrizrenPress.com/

Gjykata Themelore e Prizrenit, Departamenti i Përgjithshëm Penal, i ka caktuar masën e paraburgimit në kohë zgjatje prej një muaji të pandehurit me iniciale M.M. nga Prizreni, për shkak të dyshimit të bazuar se ka kryer veprën penale “lëndim i rëndë trupor”.

Themelorja thotë se i dyshuar, më datë 01.09.2018, rreth orës 02:00, në shtëpinë e cila gjendet në Prizren, për shkak të disa mosmarrëveshjeve me të dëmtuarin me iniciale O.M., pasi që fillimisht janë fjalosur në restorantin “RESTO”, më pas i dyshuari shkon në shtëpi duke përdor dhunë ndaj të dëmtuarit të cilin e godet me grusht, duke i shkaktuar lëndime të rënda trupore.

Sipas gjykatës caktimi i paraburgimit është tani për tani i domosdoshëm dhe i arsyeshëm pasi që i dyshuari me të dëmtuarin janë vëllezër dhe jetojnë në një shtëpi të përbashkët, “duke pasur parasysh se jemi në fazën fillestare ekziston rreziku permanent poqëse mbetet në liri mund të dëmtojë, asgjësojë provat dhe do të ndikojë tek dëshmitarët si dhe pjesëmarrësit e tjerë eventualë”.

Kundër këtij vendimi pala e pakënaqur ka të drejtë ankese në afat prej 24 orëve, përmes kësaj gjykate, Gjykatës së Apelit në Prishtinë.

Shoqëria civile në Prizren nesër në ora 12 do të protestojë në sheshin e Shatërvanit kundër dhunës në familje dhe ndaj grave.

“Nesër me 05.09.2018,prej orës 12 ne sheshin Shadërvanit fillon protesta. Ju ftojmë të gjithë juve qe keni mundësi te na bashkangjiteni me ngritë zërin kundër dhunës! Kundër vrasjeve te femrave! Kundër dhunës ne familje! Kundër çdo lloj dhune në familje”, thuhet në njoftimin e shoqërisë civile në Prizren.

Kjo protestë mbahet si vazhdim i organizimit të protestës në Gjakovë, Prishtinë, Ferizaj, Kaçanik e Vushtrri.

Protesta është thirrur pas rastit tragjik që ndodhur pasditen e 7 gushtit në Brekoc të Gjakovës.

Një grua 40-vjeçare dhe vajza e saj 9-vjeçare mbetën të vrarë me armë zjarri.

I dyshuari kryesor i këtij rasti është bashkëshorti i viktimës, Pjetër Nrecaj.

Gjykata Themelore e Prizrenit, Departamenti i Përgjithshëm Penal, i ka caktuar masën e paraburgimit prej 1 muaji një të dyshuari për shkak të veprës penale “lëndim i lehtë trupor”.

Sipas Gjykatës, i pandehuri me iniciale A.K. nga Prizreni, dyshohet se më datën 31.08.2018, në shtëpinë e tyre të përbashkët e cila gjendet në Prizren, i ka shkaktuar lëndim të lehtë trupor të dëmtuarës (bashkëshortes) me iniciale F.K. për shkak të “problemeve familjare motiveve të ulëta të xhelozisë, i dyshuari fillimisht e kishte lidhur të dëmtuarën dhe më pas ka përdorur dhunë duke i shkaktuar lëndime trupore”, raporton Koha.net.

Sipas gjykatës, caktimi i paraburgimit është tani për tani i domosdoshëm dhe i arsyeshëm pasi që të dy jetojnë dhe punojnë në botën e jashtme përkatësisht në shtetin e Zvicrës. Gjykata po ashtu njofton se të njëjtit bashkërisht në muajin korrik kanë ardhur për pushime në Kosovë andaj “po të mbetet në liri mund të dëmtojë, asgjësojë provat dhe do të ndikojë tek dëshmitarët si dhe pjesëmarrësit tjerë”.

Kundër këtij vendimi pala e pakënaqur ka të drejtë ankese në afat prej 24 orëve, përmes kësaj gjykate, Gjykatës së Apelit në Prishtinë.