Prokuroria Speciale ka ngritur aktakuzë pranë Gjykatës Themelore në Prizren, Departamenti i Krimeve të Rënda, kundër të pandehurve F.H., B.R dhe V.R për shpëlarje parash, mashtrim dhe shmangje nga tatimi.

Sipas prokurorisë, të pandehurit F.R dhe B.R në periudhën kohore qershor 2016 – gusht 2017, duke i fshehur faktet dhe me qëllim të përfitimit për vete dhe persona të tjerë, e me qëllim të fshehjes apo të maskimit, të natyrës, burimit, vendit, dispozicionit, lëvizjes ose pronësisë së pasurisë, pasi që më parë kanë pranuar mjete monetare të shumta duke i mashtruar një numër shumë të madh të qytetarëve të Kosovës, kinse do t`i punësojnë në Gjermani, duke përfituar me anën të veprës penale të “mashtrimit dhe falsifikimit të dokumenteve”, nga secili i dëmtuar shumën prej 2500 – 3000 euro. Ndërsa, numri i të dëmtarëve që nuk janë punësuar fare në Gjermani është 489 persona.

“Ndërsa, të pandehurit F.R dhe B.R gjatë kësaj periudhe kohore me veprime të kundërligjshme, kanë përvetësuar shumën e parave prej 1,220,175.00 euro, nga kjo kanë bërë shpëlarje të parave në shumën prej 1,068,775.00 euro”.

Me këto veprime, në vazhdimësi dhe në bashkëkryerje kanë kryer veprën penale “shpëlarje parash”.

Po ashtu, në aktakuzë thuhet se të pandehurit F.H dhe B.R,. në periudhën e njëjtë kohore qershor 2016 – gusht 2017, kanë mashtruar 489 të dëmtuar, duke i vënë në lajthim se kinse do t`i punësojnë në Gjermani, duke ju lëshuar kontrata kinse origjinale, a në fakt ju kanë dorëzuar kontrata të falsifikuara, ku me këtë rast me anë të mashtrimit, ju kanë marrë nga 2,500 – 3,000 euro secilit, duke përvetësuar shumën prej 1,206,425.00, në mënyrë të kundërligjshme dhe nuk ju ka mundësuar punësimi fare, edhe përkundër përpjekjeve nga të dëmtuarit për tu punësuar apo edhe së paku të ju kthehen parat por, pas sukses.

Me këto veprime të lartcekurit në vazhdimësi dhe bashkëkryerje kanë kryer veprën penale “mashtrimi”.

Gjithashtu, në aktakuzë theksohet se të pandehurit F.H dhe B.R nga muaji qershor 2016 – gusht 2017, në cilësinë e pronarëve dhe menaxherëve të kompanie, me dashje kanë lëshuar dokumente në emër të personit tjetër pa autorizim, në atë mënyrë që lëshojnë mbi 400 kontrata të falsifikuara, për punësim në shtetin e Gjermanisë, në emër të shtetasit gjerman M. Sch, pa autorizimin e tij paraprak.

Me këto veprime të pandehurit e lartcekur në vazhdimësi dhe në bashkëkryerje kanë kryer veprën penale “rastet e posaçme të falsifikimit të dokumenteve”.

“I pandehuri, V.R., nga muaji qershor 2016 – gusht 2017, në vazhdimësi dhe me dashje falsifikon dokumentet me qëllim të shfrytëzimit të atyre dokumenteve, si origjinale, duke vënë nënshkrimin në emër të personit tjetër pa autorizim, në atë mënyrë që i njëjti nënshkruan rreth 400 kontrata për punësime në shtetin e Gjermanisë, në emër të M. Sch., pa autorizimin e tij paraprak”.

“Gjithashtu, i pandehuri F.H., gjatë periudhës kohore 2016 – 2017 në cilësinë e personit përgjegjës, me qëllim të shmangies pjesërisht apo të tërësisht pagesës së tatimit, tarifave apo kontributeve të tjera që kërkohen me ligj, nuk i ka përfshirë të dhënat lidhur me të ardhurat e këtyre bizneseve. Si pasojë e mos deklarimit të këtyre ka bërë shmangien nga tatimi në shumën prej 137,999.60 euro”.

Me këto veprime ka kryer veprën penale “shmangje nga tatimi”.

Gjykata e Prizrenit ka përmbyllur me dënime me burg incidentin e 25 gushtit 2011 ku personi me inicialet G.B ishte rrahur me stupc bejsbolli.

Në një njoftim të gjykatës sqarohet se F.M. është dënuar me gjashtë muaj burgim ndërsa personi i dytë V.M. është dënuar me gjashtë muaj me kusht nën akuzën për lëndime të rënda trupore.

Sipas njoftimit të gjykatës, viktima e kishte thirrur në telefon për një takim bashkëshorten e të pandehurit F.M. Kur viktima ishte afruar në vendin ku ishte lënë takimi, aty sipas aktakuzë ishin duke pritur burri (F.M.) dhe i pandehuri V.M.

“Të pandehurit dalin në vend takim ku i pandehuri i parë kërkon nga i dëmtuari që të del jashtë automjetit, i dëmtuari refuzon, e më pas i pandehuri hap derën e automjetit e godet me shkop të bejsbolli ndërsa i pandehuri i dytë e godet me grusht dhe shqelma të dëmtuarin në kokë me ç‘rast i shkaktojnë lëndime të rënda trupore”, thuhet në njoftimin e gjykatës.

Komunikata sqaron se palët kanë të drejtë ankese në Gjykatën e Apelit.

Dy drejtorë të Komunës së Rahovecit janë aksidentuar dje në  fshatin Pataqan të Rahovecit.

Lajmin për KALLXO.com e ka konfirmuar edhe kryetari i Komunës së Rahovecit Smajli Latifi.

“Po, drejtori për ekonomi dhe drejtori i financave janë aksidentuar me veturë private dje rreth orës 14:00”, tha Latifi për KALLXO.com.

Sipas Latifit, drejtori për ekonomi, Artan Asllani i cili ka qenë duke drejtuar automjetin ka pësuar lëndime më të lehta, ndërsa drejtori i financave, Afrim Limani, ka pasur lëndime më të rënda.

Latifi shtoi se si pasojë e lëndimeve të marra në aksident, Limani ka pasur sot një operacion në Qendrën Klinike Universitare të Kosovës.

Për aksidentin e dy drejtorëve është raportuar edhe sot në raportin 24 orësh të policisë.

“Ka ndodhur një aksident trafiku mes dy automjeteve, me ç’rast përveç dëmeve materiale, lëndime trupore kanë pësuar tre persona” thuhet në raportin e policisë.

Ymer Hoxha, kryetar i Gjykatës Themelore në Prizren, ka marrë vendim për ndalimin e hyrjes së palëve dhe avokatëve në objektin e Gjykatës pa ftesë ose leje gojore.

“Urdhërohen punëtorët e sigurimit dhe recepsionistja që të mos lejojnë hyrjen e Avokatëve dhe palëve në objektin e Gjykatës pa ftesa ose leje gojore të kryetarit të gjykatës apo gjyqtarit me përjashtim në zyrën për dorëzimin e shkresave”, thuhet në vendimin e kryetarit të Gjykatës Themelore të Prizrenit, Ymer Hoxha.

KALLXO.com ka kontaktuar me kryetarin e Gjykatës, Ymer Hoxha, i cili tha se ky vendim është marrë për të pasur rend dhe rregull në Gjykatë.

“Ky vendim është marrë që të ketë rend dhe rregull, dhe të mos pengohet puna e gjykatësve, kështu funksionon edhe në polici, në odën e avokatëve e në shumë institucione të tjera. Asnjëri që nuk ka ftesë ose leje të gjykatësit nuk lejohet të hyjë”, tha Hoxha për KALLXO.com

Në vendimin e Hoxhës thuhet “nëse Avokatët apo palët nuk e zbatojnë urdhrin atëherë personeli i sigurimit i largon me detyrim”.

Vendimi i kryetarit të Gjykatës Themelore në Prizren ka hyrë në fuqi me 8 gusht dhe sipas Hoxhës nuk do të shfuqizohet.

Tre persona kanë mbetur të lënduar pas një aksidenti trafiku dje në Rahovec.

Policia njofton se rreth orë 13 kishte ndodhur aksidenti mes dy veturave ku u lënduan tre burra.

Nga aksidenti pati edhe dëme materiale.

Sipas policisë, të lënduarit janë dërguar për tretman të nevojshëm mjekësor në spitalin e Gjakovës dhe me vendim të prokurorit, rasti vazhdon të hetohet në procedurë të rregullt.