Policia ka njoftuar se nga ora 11:20 është mbyllur përkohësisht Pika Kufitare Vërmicë – Morinë nga autoritete shqiptare, njofton Klan Kosova.

“Ndalimi i qarkullimit nga autoritetet e Shqipërisë, sipas tyre është bërë për arsye të protestës që po mbahet nga qytetarët në afërsi të tunelit të Kalimashit, dhe në pa mundësi për të lëvizur automjetet dhe për shkaqe të sigurisë së qytetarëve nuk po lejohet qarkullimi-hyrja e mjeteve në Republikën e Shqipërisë deri në një vendim tjetër”, thuhet në njoftimin për media të Policisë së Kosovës.

Sot gjatë ditës është protestuar në Kalimash për shkak të taksës rrugore të vendosur nga shteti shqiptar.

Si pasojë e kësaj janë lënduar pesë pjesëtarë të forcave të policisë shqiptare si dhe 12 qytetarë pjesëmarrës në protestë si dhe janë djegur sportelet që ishin dedikuar për pagesën e taksës rrugore.

Sot, mbushen 19 vite nga ngjarja më e rëndë në Malishevë, përkatësisht nga masakra e Burimit, ku u vranë dhe u masakruan, 42 civil shqiptar. Masakra e Burimit, është masakra më e madhe që ka ndodhur në Malishevë gjatë luftës së fundit, ndërsa deri më sot, për këtë ngjarje dhe për asnjë vrasje tjetër gjatë luftës, nuk është dënuar askush.

Në përkujtim të kësaj ngjarje, nën përkujdesjen e Kryetarit të Komunës së Malishevës, është mbajtur një seancë përkujtimore e Kuvendit të Komunës së Malishevës dhe më pas janë bërë nderime dhe homazhe në varrezat e vrarëve në Dragobil, si dhe tek Vrella e Mëhillit në Burim, ku edhe ka ndodhur kjo masakër.

Në fjalimin e tij, në seancën përkujtimore, Kryetari i Komunës së Malishevës, Ragip Begaj, tha se “masakra e Burimit dhe masakrat tjera, ishin një hakmarrje e pushtuesit serb”. ” Luftën nuk e do askush, por neve na është imponuar lufta. Dalja në skenë e Ushtrisë Çlirimtare të Kosovës dhe përkrahja që mori ushtria jonë në popull, ishte grushti më i fortë për armikun.  Duke mos mundur ta shuaj luftën, sepse populli e donte lirinë dhe ishte më i vendosur se kurrë të fitonte lirinë, dhe duke parë përkrahjen e fuqive të mëdha dhe të botës demokratike, armiku ynë i përjetshëm, mori hak në popullatën civile. Pavarësisht humbjes dhe dhimbjes së madhe që kemi bashkë, ju familjarë, të jeni krenarë, sepse gjaku i tyre dhe i dëshmorëve tjerë, është burimi i lirisë që sot e gëzojmë”, tha mes tjerash në fjalën e tij, Kryetari i Komunës së Malishevës, Ragip Begaj.

Ndërsa kryesuesi i KK të Malishevës, Rrahim Morina, në mënyrë kronologjike, e ka prezantuar masakrën e Burimit, duke filluar nga rrethimi i plotë që i është bërë Malishevës, e deri te rasti i ndodhur në Burim, ku u vranë civil të pafajshëm.

Më 31 mars të vitit 1999, tek vendi i quajtur Vrella e Mëhillit, në Burim të Komunës së Malishevës, u vranë dhe u masakruan 42 civil, shumica prej tyre nga fshatrat Dragobil dhe Astrazup, si dhe tre banorë të Komunës së Suharekës, të cilët ishin strehuar në këtë pjesë. Po në këtë ditë, në fshatrat tjerë janë vrarë dhe masakruar edhe civil të tjerë.

Për këtë masakër, deri më sot, nuk është dënuar asnjë kryes i këtij krimi të rëndë dhe asnjë urdhërdhënës për vrasjen, dhe familjarët, kërkojnë që rasti i masakrës së Burimit, të ndriçohet dhe autorët e këtij krimi, të dënohen.

Drejtoria e Inspektoratit, e Prizrenit, ka bërë rrënimin e një objekti pa leje në lagjen “Bajram Curri” të qytetit.

Objekti në fjalë sipas kreut të Prizrenit Haskuka ka qenë tërësisht pa leje, derisa ka pasur shpërfillje të urdhrave të inspektorëve, shkruan sot Koha Ditore.

“Pronari gjatë ndërtimit kishte shpërfillur dy herë urdhëresën e inspektorëve ndërtimorë për ndërprerjen e punimeve.

Pronari ka vazhduar ndërtimin, prandaj si masë e fundit sipas ligjeve në fuqi është bërë rrënimi i objektit”, ka njoftuar Haskuka.

Rezervuari i ujit të pijshëm në fshatin Gjonaj është ndërtuar me mjete të buxhetit komunal, por ky projekt megjithatë nuk e ka zbutur problemin e furnizimit në këtë lokalitet.

Kjo për faktin se ka probleme teknike që duhen rregulluar me investime shtesë. Pikërisht në këtë drejtim, udhëheqësit e kompanisë rajonale të ujësjellësit “Hidrorajioni jugor” po kërkojnë donatorë për investimet shtesë, shkruan sot Koha Ditore.

Haziz Hodaj nga Gjonaj, këshilltar i LDK-së në Kuvendin e Komunës së Prizrenit ka bërë të ditur se ky projekt është neglizhuar nga pushteti i kaluar komunal, pasi që ndërtimi i rezervuarit të ujit të pijshëm ka zgjatur 3 vjet. “Ka 3 vjet që ka nisur ndërtimi i këtij rezervuari. Vitin e kaluar ka përfunduar ndërtimi, me investimin e Komunës së Prizrenit, mirëpo ai ende nuk është vënë në funksion.