Mbrëmë rreth orës 20:20, një shofer duke lëvizur me veturën e tij nga pakujdesia ka goditur një këmbësore në fshatin Medvec të Prizrenit.
E aksidentuara, sipas Policisë, ka pësuar lëndime trupore, shkruan PrizrenPress.
Ajo është dërguar në Spitalin e Prizrenit për tretman mjekësor.
Policia thotë se me vendim të prokurorit rasti shkon në procedurë të rregullt. /PrizrenPress.com/
Dita Ndërkombëtare për Avancim të Shkrim-leximit e cila shënohet çdo vit më 8 shtator ka për qëllim që të ngritë vëmendjen e opinionit ndërkombëtar në lidhje me problemin e analfabetizmit i cili fatkeqësisht si proces është prezent në shumë shoqëri.
Iniciativa e shënimit të Ditës Ndërkombëtare për Avancim të Shkrim-leximit rrjedh nga Konferenca botërore e ministrave të arsimit e organizuar në shtatorin e vitit 1965 në Tehranë e cila temë boshte kishte zhdukjen e analfabetizmit, ndërsa UNESCO si ditë ndërkombëtare e shënon nga viti 1966 me qëllim të promovimit të rëndësisë së arsimimit të fëmijëve dhe të rriturve.
Sipas të dhënave të UNESCO, rreth 775 milionë persona të rritur në planet nuk kanë as minimumin e nivelit të shkollimit, 1 në 5 persona të rritur janë analfabet nga të cilët 2/3 janë femra.
Rreth 75 milionë fëmijë nuk vijojnë shkollimin, nuk ndjekin rregullisht shkollimin ose e kanë braktisur tërësisht atë.
Në Kosovë, sipas regjistrimit të popullsisë 2011, janë evidentuar gjithësie 55001 persona që nuk dinë shkrim-lexim që përbënë 3.2% të numrit të përgjithshëm të popullsisë dhe 3.9% të grupmoshave mbi 10 vjet.
Arsimi në Kosovë nuk është i nivelit cilësor ku arsimi fillor ka pjesëmarrjen më të lartë sa i përket përgatitjes shkollore të popullsisë dhe përbën 38.2%, ai i mesëm 24.3% dhe ai i lart 9.3% (vetëm 0.8% me magjistratur- master dhe doktorata).
Shqetësuese janë edhe të dhënat nga braktisja e shkollimit dhe mos regjistrimi i nxënësve në shkollën e mesme duke e vështirësuar kështu edhe më tepër situatën sa i përket nivelit të shkollimit.
Lideri i PDK-së është zgjedhur edhe për një mandat në krye të Kuvendit të Kosovës.
Në pesë vjetët e tij zyrtare në politikë deri më sot Veseli ka pasur arritjet dhe dështimet e tij, shkruan sot Gazeta “Zëri”.
Këto të fundit ishin më të mëdha. Në vitin 2012 ai aderoi zyrtarisht në PDK, kurse dy vjet më pas, respektivisht më 2014-n, Veseli sprovohet në postin e parë si kryetar i Kuvendit.
Pas një mandati me plot skandale brenda sallës së Kuvendit, në vitin 2016 pason edhe një tjetër detyrë për të – zgjedhja si kryetar i PDK-së, duke pasuar Hashim Thaçin.
Mirëpo edhe sfida e tij e radhës nuk i doli siç e priti, shkruan tutje “Zëri”.
Në zgjedhjet e para si lider i PDK-së, Veseli dështoi duke e zvogëluar fuqinë e partisë në vetëm 23 deputetë.
Dje Veseli u rizgjodh në krye të legjislativit edhe për një mandat, kurse më poshtë mund të shihni një pjesë zyrtare të biografisë së tij.
Drejtuesit e Qendrës Rajonale të Trashëgimisë Kulturore në Prizren, të enjten, kanë njoftuar se kanë filluar realizimin e projektit për restaurimin e nënstacioneve elektrike në qytetin e Prizrenit.
Sipas tyre, ky projekt realizohet në kuadër të programit “Masat preventive – Intervenimet Emergjente” për ndërhyrje në asetet e trashëgimisë kulturore, që po zbatohet nga QRTK-ja me mbështetjen financiare të Ministrisë së Kulturës. “Gjendja e dy nënstacioneve (trafove të vjetra) ishte mjaft e vështirë, sidomos e asaj që gjendet pranë Kishës Katolike, andaj këto dy ndërtesa janë bërë objekt i intervenimit në këtë fazë.
Dëmtimet e përgjithshme të tyre kanë të bëjnë kryesisht me destrukturimin dhe humbjen e pjesëve të tullave dhe disa çarjeve dhe humbjes së pjesshme të strukturës ndërtimore”, ka thënë Samir Hoxha, drejtor i QRTK-së në Prizren.
Trafostacionet elektrike nga shekulli XX në Prizren janë pjesë e Listës së trashëgimisë Kulturore, nën mbrojtje të përkohshme në kategorinë e trashëgimisë arkitekturore. /Koha Ditore/
Pesëdhjetë e shtatë policë të Trafikut Urban dhe të Njësisë së Kontrollit të Autostradave nuk do ta veshin më uniformën e policit. Atyre u është ndërprerë marrëdhënia e punës nga Policia e Kosovës, pas përballjes me drejtësinë për korrupsion.
Procedura disiplinore, siç i është konfirmuar “Kohës Ditore”, është duke vazhduar edhe kundër dy policëve të tjerë, ndaj të cilëve Komisioni i Brendshëm Disiplinor i PK-së ka kërkuar hetim shtesë.
Të 59 policët u patën arrestuar në fund të vitit të kaluar gjatë një aksioni të gjerë policor. Ata u patën ftuar për t’u marrë në pyetje në Inspektoratin Policor të Kosovës (IPK). Nga aty patën dalë të prangosur dhe me urdhër të prokurorit u patën dërguar në qendra të mbajtjes në polici.
Prej këtij grupi, 20 janë policë të Njësisë për Kontrollin e Autostradave, 20 nga Njësiti Rajonal i Trafikut të Mitrovicës së Veriut, 15 nga Njësiti Rajonal i Trafikut të Mitrovicës së Jugut, dhe 4 zyrtarë nga Njësiti Rajonal i Trafikut të Prizrenit.
Në prani të shumë zyrtarëve të nivelit qendror, lokal dhe atyre ndërkombëtar, ka filluar sot edicioni i 16’të i festivalit tani më tradicional, gjithëkombëtar dhe ndërkombëtar i vjeljes së rrushit i cili për të tretin vit me radhë është duke u njohur me emrin “HardhFest”, ndërsa këtë vit ky festival është duke u organizuar nën sloganin “Mbas verës, vjen vera”.
Kryetari i Komunës së Rahovecit, Idriz Vehapi, në fjalën e tij ka thënë se po shënojmë sot një ngjarje të rëndësishme të jetës së tyre në Rahovec, fillimin e vjeljes së rrushit.
“Ky akt, vit pas viti po bëhet edhe më madhështor, sepse po e nisim me festivalin “HardhFest”, me të cilin po e ndajmë gëzimin për tokën dhe vreshtat tona bashkë me ju, me qytetarët e gjithë Kosovës e më gjerë. Qyteti ynë sot ka hapur dyert e konakut për të gjithë qytetarët e Kosovës, Shqipërisë, Maqedonisë e më gjerë dhe sofrën do ta mbaj shtruar për katër ditë me radhë për t’ju pritur siç ka qenë zakon të pritën miqtë gjithmonë. Ju do të mund të shijoni rrushin, verën, rakinë dhe shumë produkte tjera të rrushit. Do të mund të argëtoheni me muzikë të zgjedhur, me gara e aktivitete tjera të shumta që janë paraparë për këtë festë”, ka thënë ai.
Ndërsa në emër të këshillit organizativ ka folur nikoqirja e festivalit, Djellza Jaha, e cila me këtë rast ka falënderuar të gjithë pjesëmarrësit dhe ata të cilët kanë bërë të mundur realizimin e këtij festivali.
Me mirënjohje sot janë shpërblyer fermerët dhe verëtarët më të mirë, mirënjohje këto të cilat janë shpërndarë nga Kryetari i Komunës Idriz Vehapi.
Organizimi i festivalit ka për qëllim promovimin e kulturave bujqësore, respektivisht vreshtave, rrushit si dhe produkteve të rrushit, festivali do të zgjat nga data 7 deri me 10 shtator. /PrizrenPress.com/
Mjeku nga Dragashi, Nevzat Bajrami, i cili akuzohej për keqpërdorim të detyrës zyrtare, të enjten, është dënuar me pesë muaj burgim me kusht, dënim ky i caktuar në marrëveshjen për pranimin e fajësisë, të arritur në mes tij dhe prokurorisë.
Prokurori i rastit, Genc Nixha, ka thënë se pas negociatave me të akuzuarin dhe mbrojtësin e tij, kanë arritur marrëveshje, që i njëjti të dënohet me burgim prej pesë muajsh, i cili dënim nuk do të ekzekutohet nëse i akuzuari brenda një viti nuk kryen vepër të re penale.
Po ashtu edhe avokati Bestar Kolgeci, i cili mbron të akuzuarin, ka deklaruar se negociatat për të arritur marrëveshjen për pranimin e fajësisë janë bërë duke u mbështetur në Kodin e Procedurës Penale dhe ka kërkuar që e njëjta marrëveshje të pranohet nga gjykata.
Me mbrojtësin e tij, është pajtuar edhe i akuzuari Bajrami, i cili ka deklaruar se me vullnet të plotë dhe pa presion nga askush ka hyrë në negociata për pranimin e fajësisë dhe se më nuk do ta përsërisë asnjëherë gabimin e bërë.
Kryetarja e trupit gjykues, Raime Elezi ka pranuar marrëveshjen në fjalë dhe i ka shqiptuar dënimin e paraparë si në marrëveshje, po ashtu e ka obliguar të akuzuarin që të paguajë shpenzimet procedurale në shumë prej 100 euro.
Nevzat Bajrami, akuzohej nga Prokuroria Themelore në Prizren për keqpërdorim të pozitës apo autoritetit zyrtar të tij, në cilësinë e mjekut në Qendrën Kryesore të Mjekësisë Familjare në Dragash.
Sipas aktakuzës, i akuzuari ka lëshuar dokumente mjekësore të zbrazura, të cilat i ka nënshkruar dhe vulosur me vulën e institucionit, e të cilat dokumente janë përdorur nga persona të ndryshëm, të cilët kanë kërkuar azil në Francë.
Bajrami, për këto shërbime, kishte pranuar nga palët dhurata, dreka dhe shuma të parave prej pesë eurosh.
Prof.dr. Abdullah Zymberit i është dhënë lamtumira e fundit sot në Prizren.
Në Universitetin ” Ukshin Hoti” në Prizren është mbajtur akademi komemorative, në të cilën morën pjesë familjarë, miq, bashkëpunëtorë e qytetarë të shumtë për t’i dhënë lamtumiren e fundit profesorit të nderuar.
Në emër të organizatorit të kësaj akademie, ka folur dekani i Fakultetit të Edukimit në Prizren, Ismet Temaj.
“Profesor Zymberi gjatë tërë jetës së tij, ka dhënë kontribut të jashtëzakonshëm në përgatitjen e kuadrove dhe në fushën e albanologjisë”, tha Temaj.
Miku dhe bashkëpunëtori i të ndjerit, Hasan Muja, tha ndërkaq se profesor Abdullah Zymberi, gjatë jetës së tij, shkencore është marrë kryesisht me leksikun dhe dialektet e gjuhës shqipe ku ka botuar një numër të madh fjalorësh leksikologjikë dhe dialektologjikë.
Profesor dr. Xhafer Beqiraj, tha se ndarja nga jeta e profesor Zymberit është një humbje e madhe, jo vetëm për familjen e tij
“ Për 40 vjet të veprimtarisë shkencore ai mori pjesë nëpër shumë sesione të albanologjisë në Prishtinë dhe Tiranë, duke dhënë një kontribut të madh në ruajtjen dhe kultivimin gjuhës së pastër shqipe”, tha Beqiraj.
Abdullah Zymberi, është varrosur të enjten në varrezat e qytetit të Prizrenit/TV Prizreni/
“Diçka po zihet” është mbishkrimi i fotografisë së postuar nga deputeti i Nismës Zafir Berisha. Ai dhe disa bashkëpartiakë të tij janë shfaqur në një ambient shtëpiak pas përfundimit të seancës konstituive të Kuvendit.
Ende nuk dihet se çka po “zihet”, mirëpo ata janë shfaqur me fytyra të buzëqeshura në fotografi. /Express
Lexo më shumë në: http://www.gazetaexpress.com/lajme/zafir-berisha-poston-dicka-nga-kuzhina-foto-430808/?utm_source=referral&utm_medium=web&utm_campaign=copyright
E plotësuar: Deputetët e Kuvendit të Kosovës me 62 vota për, 52 kundër dhe asnjë abstenime e zgjodhën Kadri Veselin, kryetar të Kuvendit të Kosovës.
Ky është mandati i dytë i Veselit si kryetar i legjislativit.
Deputetët po ashtu zgjodhën nënkryetarët e Kuvendit. Nënkryetarë u zgjodhën: Xhavit Haliti nga PDK-ja, Aida Dërguti nga Vetëvendosje, Kujtim Shala nga LDK-Alternativa.
Ndryshe, Kuvendi shkoi në pauzë 15 minutëshe pasi nuk u votuan nënkryetarët nga radhët e minoriteteve.
Deputetët pas 15 minutave sërish do të jenë në seancë për të zgjedhur edhe nënkryetarët nga radhët e pakicave.
E plotësuar: Ka filluar të mbahet seanca konstituive e Kuvendit të Kosovës, ndërsa në këtë seancë pritet të zgjidhet kryetari dhe nënkryetari. Të pranishëm në sallë janë 102 deputetë.
Hoxhaj: Kandidati jonë për kryetar të Kuvendit është Kadri Veseli
E plotësuar: Përfaqësuesi i koalicionit PAN, Enver Hoxhaj para deputetëve të Kuvendit prezantoi kandidatin e tyre për kryetar të Kuvendit, Kadri Veselin.
Hoxhaj kërkoi falje për mospjesëmarrjen e tyre në seancën e orës 11:00, pasi sipas tij, disa deputetë të koalicionit nuk kishin arritur në Kuvend.
“Ju lus në mirëkuptim”, tha ai.
Hoxhaj falënderoi Mikullovcin, duke thënë se ka menaxhuar një proces politik për disa javë dhe i shprehin mirënjohje.
Së shpejti fillon seanca konstituive
Deputetët tashmë kanë filluar të hyjnë në Kuvend, ku pritet të votohet kryetari i Kuvendit dhe nënkryetarët.
Kjo është tentativa e dytë për sot, ndërsa e teta me radhë për konstituimin e Kuvendit.
Ndryshe, seanca konstituive e orës 11:00 u ndërpre nga kryesuesi Adem Mikullovci në mungesë të deputetëve nga koalicioni PANA.
Zyrtarë të PDK-së thanë për Telegrafin se nuk kanë marrë pjesë në seancën e orës 11:00 në mungesë të katër deputetëve. /Telegrafi/