Drejtori i Spitalit të Prizrenit, Afrim Avdaj, ka mohuar se është gjobitur nga Gjykata e tenderëve me 5 mijë.

“ E vërteta është se spitali i Prizrenit nuk është dënuar me 5 mijë euro, por vetëm është urdhëruar të zbatoj vendimet e OSHP-së dhe se ky vendim është zbatuar në afatin kohor ashtu siç është kërkuar në urdhëresën e OSHP-së”, ka thënë Avdaj.

“E vërteta është se spitali i Prizrenit, gjegjësisht Zyra e Prokurimit më datën 23.08.2017 nga OSHP-ja ka pranuar urdhëresën me numër 234/17 me të cilën spitali i Prizrenit urdhërohet për zbatimin e “vendimit të Panelit Shqyrtues të 12 qershorit 2017, lidhur me aktivitetin e prokurimit: “Furnizim me aparat analajzer biokimik-automatik”.

“ Në këtë Urdhëresë kërkohet që brenda afatit kohor prej 5 ditësh të njoftohet paneli shqyrtues i OSHP-së për veprimet e marra në lidhje me aktivitetin e prokurimit konform vendimit të panelit shqyrtues nr.117/17, që kërkon anulimin për dhënien e kontratës dhe lënda të kthehet në rivlerësim.

“Me të pranuar këtë urdhëresë spitali i Prizrenit, gjegjësisht Zyra e Prokurimit ka zbatuar urdhëresën konform vendimit 117/17, të datës 16.06.2017”.

I pari i PDK-së, Kadri Veseli ka publikuar një letër të hapur drejtuar shoqatave të Luftës Çlirimtare të Kosovës, për pastrimin e listave.

Veseli ka filluar këtë letër me përkujtimin se edhe pak ditë i ndajnë nga përvjetori i 18-të i përmbylljes së demilitarizimit të UÇK-së.

Madje Veseli ka theksuar se transformimi i UÇK-së nga një organizatë ushtarake në një vlerë shpirtërore kombëtare, ka ndryshuar edhe natyrën e sulmeve kundër saj, transmeton Indesonline.

Veseli ka vazhduar duke thënë se dikush përmes devalvimit të UÇK-së synon t’i krijojë vetes vend të pamerituar në rrëfimin për lirinë e Kosovës, dikush tjetër në emër të saj, përpiqet të përmbushë egon personale për pushtet dhe favore të tjera personale.

Sipas liderit të PDK-së, meritat e të kaluarës nuk mund të shërbejnë kurrë për të ndërtuar imunitet personal apo grupor nga ligjet e shtetit.

Kjo është letra e plotë:

Letër shoqatave të Luftës Çlirimtare

Të nderuar veteranë të Ushtrisë Çlirimtare të Kosovës,

Të dashur bashkëluftëtarë të Ushtrisë Çlirimtare të Kosovës,

Edhe pak ditë na ndajnë nga përvjetori i 18-të i përmbylljes së demilitarizimit të UÇK-së. Ishte shtatori i vitit 1999 kur njësitë e Ushtrisë Çlirimtare të Kosovës, në një paradë madhështore, shënuan përfundimin e një epoke të lavdishme dhe fillimin e një epoke të re.

Ishin ditë krenarie të papërsëritshme, për secilin nga ne dhe çdo qytetar të Kosovës. Misioni për të cilin kishte lindur UÇK-ja ishte përmbushur, si asnjëherë më parë në histori. Pas shumë dekadash robërie dhe shtypjeje, Kosova ishte çliruar përfundimisht.

Krahas krenarisë edhe dhimbja ishte e madhe – kishim humbur mijëra bashkëluftëtarë. Mijëra civilë kishin humbur jetën dhe vendi ishte shkatërruar krejtësisht. Si çdo herë tjetër në histori, liria kishte ardhur përmes sakrificash të mëdha njerëzore dhe materiale.

Ato ditë shtatori, UÇK-ja po pushonte se ekzistuari fizikisht për t’u kthyer në vlerë shpirtërore të kombit tonë, në shenjë identifikuese të shtetit të ri që po bëhej gati të themelohej- Republikës së Kosovës.

Transformimi i UÇK-së nga një organizatë ushtarake në një vlerë shpirtërore kombëtare, ndryshoi edhe natyrën e sulmeve kundër saj. Në vend të tankseve dhe artilerisë, tani kundër saj filluan të përdoreshin mjete të tjera, propaganda sistematike e Beogradit zyrtar dhe qarqeve antishqiptare, shpifjet sistematike mediale, të brendshme dhe të jashtme, inskenimet gjyqësore, arrestimet e njëpasnjëshme të ish pjesëtarëve të saj me akuza të cilat njëra pas tjetrës provoheshin se ishin të pavërteta, qoftë nga drejtësia ndërkombëtare në Hagë, qoftë nga ajo në Kosovë.

Kërkohej me çdo kusht që rrëfimi madhështor për UÇK-në të përbaltej, të njollosej, të nxihej, me të vetmin qëllim -minimin e avancimit të lirisë së Kosovës dhe formimin e shtetit të pavarur dhe sovran të saj.

E gjithë kjo fushatë, nuk kaloi pa pasoja. Ato tanimë dihen fare mirë. Në fakt, kjo fushatë vazhdon edhe sot e kësaj dite. Me vetëdije, ose pa të, qëllimeve të saj janë duke i ndihmuar edhe interesat e politikës ditore dhe interesat e ndryshme klienteliste.

Derisa dikush, përmes devalvimit të UÇK-së, synon t’i krijoj vetes vend të pamerituar në rrëfimin për lirinë e Kosovës, dikush tjetër, në emër të saj, përpiqet të përmbushë egon personale për pushtet dhe favore të tjera materiale. Për të parët UÇK-ja, si institucion moral, është pengesë, për të dytët është instrument personal.

Të dy palët, në fakt, operojnë me mjetet e falsifikimit e historisë së UÇK-së dhe për efekt kanë rrënimin e statusit të saj – si vlerë sublime e kombit shqiptar.

Të dashur bashkëluftëtarë,

Në veçanti ju që sot drejtoni shoqatat e veteranëve, të invalidëve të luftës dhe familjeve të dëshmorëve,

A duhet që ta lejojmë këtë?

Me siguri se të gjithë e dimë përgjigjen e duhur dhe të vetme në këtë pyetje! Jo nuk duhet ta lejojmë!

Faktet themelore flasin se Ushtria Çlirimtare e Kosovës ishte produkt ekskluziv i popullit të Kosovës. Ajo ishte “Made in Kosova”. Ajo lindi nga vullneti i popullit për t’i dhënë fund shtypjes dhe nga besimi i tij në mundësinë për ta bërë realitet lirinë.

Duke qenë e tillë në origjinë, natyrshëm, çdo qytetar liridashës i Kosovës ishte, në një formë apo tjetër, pjesë e UÇK-së.

Ne që ishim në strukturat drejtuese dhe organizative, gjatë gjithë luftës, jemi përballur me faktin e mijëra e mijëra djemve dhe vajzave, burrave dhe grave, që donin të vishnin uniformën e UÇK-së, por kjo pamundësohej nga armatimi i limituar dhe rrethanat reale të gjendjes së luftës.

Vullneti ishte i plotë, por mundësitë reale për një mobilizim total ishin tejet të kufizuara. Ne e dimë nivelin dhe shifrat reale të këtij mobilizimi.

Ne e dimë, gjithashtu, se këto shifra nuk përputhen me evidentimin zyrtar të veteranëve që është bërë së fundi. Shifrat zyrtare janë shumë më të mëdha se shifrat reale. Ky është fakt dhe kjo nuk është dashur të ndodhë, në asnjë mënyrë dhe me asnjë çmim, sepse me këtë është cenuar, në moralin e saj, vlera sublime e UÇK-së.

Falsifikimet në listat e veteranëve, përbëjnë një turp të madh, të cilin nuk mund ta heqin hetimet e prokurorisë, por vetëm ndërgjegjja dhe guximi i secilit veteran për të treguar publikisht të vërtetën, pa marrë parasysh asnjë konsideratë apo lojalitet tjetër, përveç të vërtetës.

E vërteta dhe vetëm e vërteta është instanca që garanton mos cenimin e UÇK-së si vlerë sublime kombëtare.

Beteja kundër falsifikatorëve të brendshëm dhe atyre të jashtëm të së vërtetës së UÇK-së, është betejë për vet shtetin e Kosovës, prandaj, ne duhet ta fitojmë pa mëdyshje atë.

Siç e thash më lart, në shtator të vitit 1999, UÇK-ja ka pushuar se ekzistuari fizikisht, për të filluar ekzistencën e saj si vlerë shpirtërore dhe morale.

Nga ajo ditë, për secilin pjesëtarë të saj, UÇK-ja është vetëm një kapital honorifik. Çdo përpjekje, që është bërë, për ta shndërruar nderin në fuqi financiare apo politike, në esencën e saj, e ka dëmtuar statusin shpirtëror e moral të UÇK-së.

Këto përpjekje janë shfrytëzuar maksimalisht nga armiqtë e lirisë së Kosovës për t’i dhënë jetë propagandës së tyre se çlirimtarët e djeshëm të Kosovës sot janë zhvatësit e saj.

Sot, sfida jonë e përbashkët është të dëshmohet se e kundërta është e vërtetë. Kjo sfidë kapërcehet vetëm duke respektuar parimin e njohur se meritat e të kaluarës nuk mund të shërbejnë kurrë si alibi për gabimet e të sotmes.

Është në moralin e secili komb që të nderojë ata që kanë bërë sakrifica për lirinë e tij, por, ky nderim kurrë nuk mund të kuptohet si mundësi për të drejta speciale për ta. Kur nderi vihet në shërbim të interesit material, ai pushon se qenuri i tillë.

Meritat e të kaluarës nuk mund të shërbejnë kurrë për të ndërtuar imunitet personal apo grupor nga ligjet e shtetit. Shteti është mbi të gjithë dhe i barabartë për të gjithë. Këto janë parime mbi të cilat duhet të mbështetet ndërgjegjja e secilit veteran të Ushtrisë Çlirimtare të Kosovës.

Kjo është mënyra më e mirë për ta mbrojtur dinjitetin e UÇK-së, e bashkë me të, edhe dinjitetin e shtetit të pavarur dhe sovran të Kosovës.

Kandidati i Nismës për kryetar të Prizrenit, Zafir Berisha, akuzon kryetarin e Komunës, Ramadan Mujën, se po tallet me familjet e dëshmorëve.

Sipas tij, Muja është duke e keqpërdorë pozitën zyrtare si dhe familjet e dëshmorëve për vota të PDK-së.

Ai, thotë se ndihma e dhënë për këto familje nuk është asgjë tjetër përvec tallje.

“Familjet e dëshmorëve kanë nevojë për shtet ligjorë, ku nuk vidhet paraja publike dhe nuk keqpërdoret pasuria e shtetit për llogari të parapolitikës”, thotë Berisha, shkruan PrizrenPress.

“Ata kanë nevojë shpirtërore që gjaku i bijve të tyre mos të nëpërkëmbët”.

Sipas tij, keqpërdorimi i pozitës zyrtare në raport me familjet e shenjta për llogari të votës është poshtërsi.

“Prandaj ndaleni turrin e ligështirave se më nuk po ju shiten”.

“101 euro ndihma për familjet e dëshmorëve në këtë kohë, është më shumë se tallje”.

“Ata kanë nevojë që fëmijët e dëshmorëve të shkollohen e të punësohen dhe jo të vijnë në situata që ta lëshojnë Kosovën siç edhe ka ndodhur”.

Berisha thotë se Ramadan Muja dhe “një pjesë e Klanit që e rrethon të ngarkuar nga hipoteka jo e mirë, gjatë gjithë kohës së qeverisjes e kanë pasur gojën plotë UÇK”.

“Jam rezervuar deri tash të them për shumë arsye, por këtë që e kuptova sot, se këto fundërrina edhe në ditët e fundit luajnë me vlerat e këtij vendi për llogari të votës, dua të them se ka vite që unë dhe një pjesë e shokëve nuk kemi shkuar pranë varreve të bashkëluftëtarëve tanë në Landovic në ditët e caktuara vetëm e vetëm që Petriti, Xhevati, Drini, Sala, Agimi, Hyseni, Ismajli, Bekimi e shumë bashkëluftëtarë tjerë, mos të më shtirren në ëndërr e të më thonë ‘ Zafë si ke ardhë në vizitë te ne me rankoviqistë, titistë bashkëpunëtorë të Sllobës, me hajdutë e matrapazë që po e vjedhin shtetin për të cilin ne kemi dhënë jetën; me njerëz që më shumë rrinë nëpër gjykata e prokurori se në vendet e punës për me ndërtuar Kosovën”.

“Fundi i juaj po numërohet me ditë. Mundë edhe të veni ndonjë gurthemele për luftën këtyre ditëve, por të zezat që i keni bërë nuk mundë ti lani…”/PrizrenPress.com/

Lëvizja Vetëvendosje në Prizren ka bërë publike listën zyrtare me emrat e 45 kandidatëve për Kuvendin Komunal të Prizrenit, të cilën e quan listë fituese.

Musa Bushrani zyrtar i Sekretariatit për Media dhe Komunikim i LV në Prizren tha për Gazetaere se “bashkimi i shumë aktivistëve, figurave e profesionistëve në listën e Lëvizjes Vetëvendosje! në Prizren, për Zgjedhjet Lokale 2017, është garanci që fitorja për këtë komunë e Lëvizjes Vetëvendosje! të jetë e sigurt”.

“Bartësi i listës është Artan Abrashi, njëherësh edhe kryetar i Qendrës në Prizren, i pasuar me emrat e kandidatëve, me të cilët Prizreni do ta ketë qeverisjen e mirë, transparencën dhe zhvillimin ekonomik. Duke pasur parasysh specifikat e Prizrenit, Vetëvendosje! në Prizren ka përpiluar një program qeverisës në të cilin Prizreni do të jetë pikë referuese e rëndësishme e Ballkanit” u shpreh Bushrani.

Sipas Qendrës së Lëvizjes në Prizren “Qytetarët e Prizrenit programin në tërësi do të kenë mundësi ta mësojnë nga kandidati i LV për kryetar të Prizrenit, Mytaher Haskuka me ekipin e tij”.