Një kamion është rrokullisur në rrugën “Tranzit” në Prizren.
Ngjarja ka ndodhur në mëngjesin e sotëm, në orën 8:00.
Policia ka dalë në vendngjarje.
Përveç vozitësit, mësohet se nuk ka të lënduar të tjerë./PrizrenPress.com/
Me aktakuza në lista zgjedhore!
Iniciativën e presidentit Hashim Thaçi për dekriminalizimin e skenës politike nuk e përkrahin ish-bashkëpartiakët e tij. Deputeti i PDK-së, Shukri Buja, thotë se nisma e presidentit është në kundërshtim me Kushtetutën dhe kjo e fundit, siç thotë ai, nuk ia ndalon të rikandidojë për deputet, pavarësisht se Prokuroria Speciale ka ngritur aktakuzë ndaj tij
Garës për kryetarë të komunave, por edhe për deputetë, nëse vendi sivjet do të shkojë në zgjedhje të parakohshme parlamentare pritet t’i hyjnë edhe politikanë ndaj të cilëve rëndojnë aktakuzat e ngritura nga Prokuroria.
Iniciativën për dekriminalizimin e skenës politike në vend e ka nisur presidenti Hashim Thaçi, të cilën e ka përkrahur edhe ambasadori i SHBA-së në Prishtinë, Greg Delawie. Ky i fundit pati deklaruar se do ta mbështesë çfarëdo nisme që në listat zgjedhore të mos ketë njerëz të akuzuar. Ai madje ka deklaruar se nuk dëshiron t’i shohë politikanët në listë zgjedhore nëse janë me aktakuza.
Por një iniciativë e tillë kundërshtohet nga ish-bashkëpartiaku i Thaçit.
Deputeti i PDK-së, Shukri Buja, i cili akuzohet nga Prokuroria Speciale e Kosovës për marrje e dhënie ryshfeti si dhe për keqpërdorim të detyrës zyrtare, thotë për “Zërin” se asnjë ligj i Kosovës nuk ia ndalon rikandidimin për deputet.
“Është kushtetuta e Kosovës e cila duhet të respektohet dhe janë ligjet në fuqi, askush nuk është mbi ligjin”, ka thënë Buja.
Buja: Siç thotë Thaçi, nuk thotë Kushtetuta
Sipas Bujës nisma e presidentit bie në kundërshtim me përmbajtjen e Kushtetutës.
“Kushtetuta nuk thotë siç thotë presidenti Thaçi. Në kushtetutë Neni 3 ose 1, pika 5, tregon qartë se çka thotë Kushtetua për këtë çështje, ceken të drejtat e njeriut, çfarë thotë ligji”, ka deklaruar Buja.
Ai thekson se ligji zgjedhor i paraparë në Kushtetutë i jep një përgjigje çdo individi që synon postin e deputetit.
“Përderisa Kushtetua në fuqi dhe ligjet në fuqi, Neni 81 i Kushtetutës na pret ligji zgjedhor. Është përgjigje që i jepet secilit individ, i cili dëshiron për të parën herë ta marrë kompetencën e individit”, ka përfunduar Buja.
Përpos Bujës janë edhe disa deputetë të tjerë, por edhe kryetarë të komunave të Kosovës që vazhdojnë funksionin, ndonëse ndaj tyre rëndojnë aktakuzat për korrupsion.
Miftaraj: S’ka vullnet për pastrim të listave
Ehat Miftaraj nga Instituti i Kosovës për Drejtësi (IKD) ka thënë për gazetën “Zëri” se bartësve kryesorë të institucioneve i mungon vullneti për t’i pastruar listat nga individë mbi të cilët rëndojnë aktakuzat.
“Fatkeqësisht praktika e deritanishme ka dëshmuar se mungon vullneti politik i bartësve kryesorë të institucioneve shtetërore dhe i shumicës së kryetarëve të partive politike për ta pastruar skenën politike në Kosovë nga individë që udhëheqin komuna apo janë funksione tjera qeveritare dhe publike me aktakuza apo edhe në raste të caktuara me aktgjykime dënuese për vepra penale të korrupsionit”, ka thënë Miftaraj.
Sipas tij, në institucionet e vendit ende ka numër të madh të funksionarëve që janë të akuzuar.
“Sot në Kosovë ka numër të madh të kryetarëve të komunave apo funksionarë të lartë shtetërorë që janë të akuzuar, ku një pjesë e ditës iu kalon nëpër salla të Gjykatës duke u gjykuar për korrupsion, kurse pjesën tjetër të ditës e kalojnë duke qeverisur me komunën ku ata janë të zgjedhur apo në pozitat ku janë emëruar”, ka shtuar Miftaraj.
Ai beson se pastrimi i listave nga personat e akuzuar mund të bëhet vetëm nga krerët e partive politike.
“Dekriminalizimi i skenës politike në Kosovë do të mund të konkretizohej nëse vetë partitë e politike nuk do të lejonin që personat të cilët janë nën hetime të jenë pjesë e listave zgjedhore apo personat ndaj të cilëve janë ngritur aktakuza, apo janë dënuar për vepra penale të korrupsionit, të ushtronin funksione publike apo shtetërore”, ka thënë Miftaraj.
Haxhiu: Nisma e presidentit, hipokrizi
Në anën tjetër deputetja e lëvizjes “Vetëvendosje”, Albulena Haxhiu, thotë se deklaratat e presidentit Thaçi për dekriminalizimin e skenës politike janë hipokrizi.
“Është goxha hipokrizi kur të korruptuarit flasin për dekriminalizim. Shumica e këtyre që po flasin kanë krijuar pasuri të pajustifikueshme. Llogari do të duhej të kërkohej nga ata”, ka potencuar ajo.
Haxhiu pranon se disa bashkëpartiakë të saj kanë aktakuza nga Prokuroria por, siç thotë ajo, ato janë për shkak të veprimeve politike.
“Sa na përket neve ju e dini që shumica e deputetëve dhe aktivistëve kanë të ngritura aktakuza për veprimet politike dhe natyrisht qe këta do të jenë të përfshirë në lista, sepse janë përfaqësimi më i denjë i interesave të qytetarëve dhe të Republikës”, ka thënë Haxhiu.
Ndërsa në Aleancën për Ardhmërinë e Kosovës (AAK) shprehen të bindur se do t’i mbyllin dyert për personat me aktakuza.
“Aleanca ka deklaruar qe shumë kohë se nuk pranon të ketë as në listë e as në Qeverinë e saj të ardhshme njerëz me precedentë penalë. Por nuk do të pranojmë të na mbajnë moral politik për qeverisje me duar të pastra ata që janë thellë vetë të zhytur”, ka thënë Time Kadriaj, deputete në këtë subjekt.
Kurse politologu Ramush Tahiri mendon se pastrimi i listave nga personat me aktakuzë është çështje morale.
“Është çështje morale sepse me ligj qytetari është i pafajshëm deri në vendimin përfundimtar të Gjykatës. Qytetari edhe mund të akuzohet, por më vonë të dalë i pafajshëm”, ka thënë Tahiri, duke shtuar se duhet mirëkuptim dhe marrëveshje paraprake ose rezolutë e Kuvendit për ta arritur një qëllim të tillë. /ZERI/
Kryesisë i kthehet mbrapsht kërkesa e Hasanit për ndryshim të Ligjit për Specialen
Kërkesa e Kryesisë së Kuvendit që Komisioni për Legjislacion të shqyrtojë dhe të vendosë për kërkesën e deputetit të PDK-së, Nait Hasani, për të organizuar një “debat parlamentar për plotësim-ndryshimin e Ligjit për dhomat e specializuara dhe Zyrën e prokurorit të specializuar” është kthyer mbrapsht, shkruan sot Koha Ditore.
Anëtarët e Komisionit për Legjislacion, në mbledhjen e mbajtur të martën, kanë marrë vendim që kjo kërkesë të kthehet në Kryesi të Kuvendit.
Ata kanë vlerësuar se në bazë të Rregullores së Kuvendit Kryesia ka të drejtë ta procedojë në seancë kërkesën e gjashtë deputetëve për debat parlamentar lidhur me çfarëdo teme.
Dhurohet arkivi personal i Lasgush Poradecit
Kanë qenë dy vajzat e poetit Marie dhe Kostandina Gusho, të cilat në prani dhe të Ministres së Kulturës së Shqipërisë, Mirela Kumbaro i kanë dorëzuar arkivin personal të babait të tyre, drejtorit të Arkivave Ardit Bido.
19.308 fletë dorëshkrime, 8.562 fletë shtypshkrime dhe 3.662 fletë gazetash nga arkivi personal i poetit Lasgush Poradeci i janë dhuruar Drejtorisë së Përgjithshme të Arkivave. Ceremonia e dorëzimit të kësaj pjese të vyer nga trashëgimia e lënë pas nga poeti, u realizua dje në ambientet Drejtorisë së Përgjithshme të Arkivave. Kanë qenë dy vajzat e poetit Marie dhe Kostandina Gusho, të cilat në prani dhe të Ministres së Kulturës Mirela Kumbaro i kanë dorëzuar arkivin personale të babait të tyre, drejtorit të Arkivave Ardit Bido.
Në arkivin personal të Lasgushit, ndodhen dhe 26 revista, 1.606 copë fotografi dhe kartolina 1.606 copë,315 fletë ftesa dhe telegrame, 296 fletë partitura, 14 fletë harta, 11 dekorata, 7 certifikata, 12 pulla postare dhe 8 copë kartëmonedha të grisura./Gazeta Shqip
Rahovecianët që i frikësohen një tragjedie
Ka disa ditë që ky mural i kësaj ndërtese në qendër të Rahovecit ka marrë këtë pamje, por pamje krejt ndryshe ka në anën tjetër të kësaj ndërtese, raporton KTV.
Dhjetëra familje që jetojnë në këtë ndërtesë, i frikësohen ndonjë tragjedie të mundshme, pasi kulmi i ndërtesës është i shkatërruar.
Në mënyrë të organizuar, ata që disa vite janë ankuar në organet komunale së fundi, kanë dorëzuar edhe një peticion me nënshkrimet e banorëve, duke kërkuar realizimin e kërkesave të tyre.
Drejtori i Urbanizmit në Rahovec, Fehmi Hoxha, ka thënë se do t’u bëhet zgjidhje banorëve, por për këtë gjendje ai e ka bërë fajtor qeverisjen e kaluar.
Ndërkaq, projekti i kalaveshit të rrushit, që është simbol i qytetit të Rahovecit, i ka kushtuar mbi 8 mijë euro komunës.
Berisha: Demarkacionin do ta kundërshtojmë vetëm me mjete demokratike
Asnjë presje nuk kanë ndryshuar deputetët e NISMA-s nga rezistenca kundër demarkacionit me Malin e Zi ka thënë deputeti i këtij subjekti politik Zafir Berisha.
Ai ka thënë se kundërshtimi do të vazhdojë edhe në seancën e ardhshme, nëse mbahet këtë të enjte dhe vendos qeveria ta procedojë.
“Ne e kemi kundërshtuar shumë arsyeshëm dhe asnjë presje nuk e kemi hequr nga rezistenca jonë për mbrojtjen e sovranitetit dhe integritetit të vendit i cili është vu në pikëpyetje me marrëveshjen e dëmshme të demarkacionit”, ka thënë Berisha për lajmi.net të martën pasdite.
Berisha mendon se kjo qeveri është krijuar për interesin e dy personave dhe i ka zgjat mandati më shumë se sa do të duhej.
“Bile shumë e ka zgjat, prej kur është krijuar kjo qeveri ka qenë për interesat e dy personave, Hashim Thaçi të bëhet president dhe Isa Mustafa kryeministër, normal edhe pakurrizorët përrreth tyre”.
Deputeti i NISMA-s ka thënë se janë të bindur që demarkacioni ka vetëdijesuar pjesën më të madhe të deputetëve dhe për këtë arsye nuk do të përdorin metoda jo demokratike për ta kundërshtuar në Kuvend.
“Me mjete demokratike, sepse jemi shumë të bindur se ka vetëdijesim shumë të lartë dhe të deputetëve të mazhorancës, kështu që metodat jo parlamentare nuk do të ketë nevojë të përdorën”.
Berisha shpreson se një pjesë e deputetëve të pozitës do të votojnë kundër, e edhe ata që votojnë pro, sipas tij, janë të shantazhuar.
“Jam i bindur se kundër do të votojnë edhe një pjesë e deputetëve të pozitës, sepse e kanë thënë me vetëdije, e edhe ata që mund ta votojnë këtë version të gabuar janë nën presionin e shantazhin e shefave të tyre, përndryshe edhe ata janë të vetëdijshëm që nuk bën ky version i demarkacionit të votohet”, ka thënë Berisha për lajmi.net.
Deri më tani qeveria nuk ka dhënë ndonjë sinjal se kur do të mund të procedohet demarkacioni me Malin e Zi në Kuvend./Lajmi.net/
Sabahajdin Cena publikon pjesë nga ditari “Kronikë nëpër stuhi”
Ish- drejtori i Drejtorisë politike të UÇK-së për Zonën e Pashtrakut, prof.dr. Sabahajdin Cena, ka filluar të publikojë pjesë nga ditari “ Kronikë nëpër stuhi”.
Ai, në rrjetin social “Facebook”, ka postuar emrat e dëshmorëve të rënë në luftën e UÇK-së.
“Duke i përshëndetur të gjitha familjet e dëshmorëve, dëshirojmë të informojmë se prej 1 majit të këtij viti, do t i publikojmë pjesët nga ditari ynë “Kronikë nëpër stuhi”, prandaj i mirëpresim korrigjimet eventuale të datave të rubrikës sonë “Ndodhi në ditën e sotme…”, shkruan Cena në “Facebook”,transmeton PrizrenPress.
Postimi në “Facebook”
Me 1 maj, të vitit 1998, në Vojnik të Skenderajt, përjetësohet dëshmori Asllan Sylë Gashi, ndërsa me 1999 gjatë luftimeve në Budakovë, përjetësohen dëshmorët: Jemin Murat Musliu e Alush Faik Mustsfa.
Po në këtë ditë, në Bjeshkët e Belegut, përjetësohet Fehmi Nazif Demiqi, në luftimet afër Kamenicës së Vranocit edhe Fetah Adem Selca, në Ratish të Deçanit përjetësohet dëshmori Agim Ali Selmanaj, në Gurishtë të Therandës, Emrush Bislim Buzhala, në Mullapolc të Shtimes, Abdylsalem Ahmeti, Agron Qerim Veliqi, ndërsa në këtë ditë të vitit 2000 në shtëpi të vet ndërroi jetë luftetari i lirisë Hajdar Syle Agaj, i plagosur rëndë gjatë bombardimeve mbi Gramacelin e Rekës me 23 maj të vitit 1998.
Me 2 maj, të vitit 1999, përjetësohen dëshmorët:
Fetah Gega, Xhavit Bajraktari, Besim Rexhepi, Bekim Kadolli, Hasan Hasni, Adnan Bunjaku,Agim Sadiku, Basri Hyseni, Beqir Hyseni, Mehdi Musliu, Ali Zeneli, Elmaz Peci, Xhevdet Ahmeti, Nysret Musa, Faruk Beqiri, Bajram Musa dhe Halil Gashi.
Të gjithë ranë në altarin e lirisë gjatë luftimeve të përgjakshme në Shirokë, Koshare, Kolovice, Martiras të Vushtrrisë, Vidishiq, Skrome, Dumnicë, Mazhik, Rahovec, Vesikofc, Ceceli dhe Bajgore.
Lavdi të gjithë dëshmorëve!
Vjen libri me poezi “Ylli i Çabratit“ i Rexhep Hoxhës
Këto ditë nga Shtëpia Botuese ‘Lugjet e Verdha’, Prishtinë, doli nga shtypi ‘Ylli i Çabratit’, përmbledhja me vjersha për të rritur e shkrimtarit Rexhep Hoxha, të cilat janë përmbledhur nga disa botime përmbledhjesh të botuara gjatë kohës dhe të parat nga ato të shkruara në vitin 1947.
Në parathënien e librit, me titullin, Bardi i letërsisë shqipe, shkrimtari Jusuf Buxhovi shkruan se Rexhep Hoxha është ndër shkrimtarët e pakt me vend të garantuar në letërsinë shqipe. “Madje, këtë vend nuk e ka “diku” e dosido, por në majat e saj. Romani “Lugjet e verdha” si dhe përmbledhja me poezi “Picimuli” janë antologjike edhe për faktin se ato si vlera letrare janë të paarritshme, ndërsa si prosede të papërsëritshme”, ka shkruar Buxhovi, në lidhje me botimin e këtij libri.
Buxhovi më pas ka thënë se në librin Ylli i Çabratit, autori Rexhep Hoxha sikur ndjen përgjegjësi që të nderojë dëshmoret e luftës nacionalçlirimtare, por edhe ata të luftës së fundit, me ç ‘rast ballafaqon heronjtë e së djeshmes me ata të të sotmes, duke i parë njëjtë në rrugën e idealit të lirisë, që nuk përfundon kurrë. “Këta të fundit, i identifikon me “Yllin e Çabratit”, një metaforë e një drite të amshueshme, e cila frymëzon me patriotizëm të gjitha gjeneratat. Ndër këta yje ai sheh Yll Morinën, Elton Zherkën, Permet Vulën dhe të tjerët, të cilëve ai u kërkon dritë. Kështu, shkrimtari, heronjtë e Gjakovës, i sheh edhe heronj të Kosovës”, ka shkruar më tej Buxhovi.
Kështu ka mbetur Prevalla pas festës së 1 majit (Foto)
Prevalla ka qenë një nga destinacionet ku qytetarët kanë zgjedhur për të festuar 1 majin.
Por shprehija e keqe e qytetarëve edhe këtë vit ka lën prapa shumë mbeturina, duke e ndotur një nga ambientet më turistike në Kosovë, shkruan Magazina.al
Iniciativa ‘Ta pastrojmë Kosovën”, ka publikuar disa fotografi nga Prevalla e cila shihet e mbuluar nga mbeturinat pas festës së djeshme, ndërsa ka kritikuar edhe institucionet për mungesë kujdesi.
Për më shumë pamjet flasin vetë
Dymbëdhjetë të burgosur u falen nga Presidenti Thaçi – bëhen të ditura arsyet se pse ata ishin dënuar!
Tetë nga dymbëdhjetë personat e falur nga Presidenti kanë qenë në burg për vrasje apo vrasje në tentativë.
Dymbëdhjetë të burgosur kanë pasur fatin të lirohen nga dënimi i tyre për të cilin po e vuajnë në burgjet e Dubravës e Smrekonicës për veprat që i kanë kryer, kryesisht për vjedhje dhe vrasje.
Kjo falje për të burgosurit e cila pritej të bëhej me datën 17 shkurt, erdhi 2 muaj më pas.
Këtë vit, 694 të burgosur kanë kërkuar nga Presidenti i Kosovës, Hashim Thaçi, që në përvjetorin e shpalljes së pavarësisë t’i falet dënimi i mbetur. Me dy muaj vonesë, Thaçi ka vendosur që t’i falë vetëm 12 të burgosur.
Në një dokument të siguruar nga Gazeta Jeta në Kosovë, shihet se tetë nga të liruarit kanë qenë në burg për vrasje apo vrasje në tentativë. Tre nga të burgosurit që janë falur nga Presidenti kanë qenë në burg për vepra penale “rrezikim të trafikut publik”. Njëri nga të burgosurit të falur nga Presidenti Thaçi ka qenë në burg për veprën penale “vjedhje të rëndë”.
Ali Rugova është falur nga Presidenti Thaçi. Rugova ka qenë i dënuar me 1 vit e 1 muaj burgim për vjedhje të rëndë. Atij i janë falur më pak 3 muaj, pasi dënimi i rregullt ka qenë deri më datën 20 korrik.
Armend Hamiti, një i falur tjetër nga Presidenti, ka qenë i dënuar me dy vjet burg për rrezikim të trafikut publik. Edhe Hamitit i janë falur vetëm 3 muaj e gjysmë.
Me të njëjtën vepër, rrezikim të trafikut publik, ka qenë edhe Hajdar Dili. Atij i janë falur më shumë, pasi nga 3 vjet sa ka qenë i dënuar, Dili i ka mbajtur 9 muaj dhe Thaçi ia ka falur dy vjet e 1 muaj.
Daut Sadriu ka qenë i dënuar me tre vjet burg për vrasje në tentativë dhe armëmbajtje pa leje. Atij i janë falur 1 vjet e 4 muaj burg.
Ejup Muharremi është dënuar me 1 vit e 3 muaj burg për vrasje në tentativë. Muharremit i janë falur vetëm 1 muaj e gjysmë burg.
Demokrat Ahmeti është dënuar me 4 vite e 6 muaj burg për vrasje nga pakujdesia. Atij Presidenti Thaçi ia ka falur 1 vjet e gjashtë muaj burg.
Fehmi Kukiqi është dënuar me 2 vjet e gjashtë muaj burg për vrasje në tentativë, ndërsa i janë falur 7 muaj burg.
Hajdar Muqiqi është dënuar me 14 vjet për vrasje. Ai i ka mbajtur tashmë më shumë se 11 vjet burg. Me vendim të Presidentit Thaçi, Muqiqit i janë falur 2 vjet e 7 muaj burg.
Jaha Hasani ka qenë i dënuar me 9 vjet e 6 muaj burg për vrasje. Hasanit i janë falur 3 vjet e katër muaj burg.
Zymber Osmani është një i dënuar tjetër për vrasje që është falur nga Presidenti Thaçi. Osmani ka qenë i dënuar me 11 vjet e 6 muaj burg për dy vepra penale vrasje dhe vrasje në tentativë. Atij i janë falur 1 vit e gjashtë muaj burg nga Presidenti Thaçi.
Dalibor Trifunoviq është dënuar me 1 vit për rrezikim të trafikut publik. Presidenti atij ia ka falur vetëm 3 muaj burg.
Sahadete Elezi është e vetmja grua që është falur nga Presidenti Thaçi. Ajo ka qenë e dënuar me 9 vjet burg për vrasje të rëndë në tentativë. Asaj, Presidenti Thaçi ia ka falur 5 vjet e 3 muaj burg.
Ministria e Drejtësisë është kompetente për zbatimin e Dekretit të Presidentit të Republikës së Kosovës. Presidenti i shqyrton vetëm kërkesat për falje që kanë ardhur nga të burgosurit.
Ministrisë së Drejtësisë i kërkohet që të ndërmarrë të gjitha veprimet e nevojshme për zbatimin e këtij dekreti, ndërsa Shërbimi Korrektues i Kosovës që të njoftojë personat e dënuar që kanë bërë kërkesë për falje, duke u bazuar në këtë dekret.
Presidenti i vendit sipas Kushtetutës e ka në kompetencë faljen e të dënuarve në raste të veçanta.
Zakonisht falja bëhet në ditët e shënuara siç është 17 Shkurti- Dita e Shpalljes së Pavarësisë së Kosovës.
Të drejtë të falen sipas Kodit Penal të Kosovës nuk kanë ata që ndonjëherë kanë përfituar nga falja presidenciale dhe personat të cilëve nuk u janë bërë të plotfuqishme dënimet.
Falja e të burgosurve nisi në vitin 2009 nga ish-Presidenti Sejdiu në njëvjetorin e pavarësisë së Kosovës.
Ish-Presidentja Atifete Jahjaga nuk fali asnjë të burgosur në vitet 2015 dhe 2016. Faljen e fundit të të burgosurve ajo e bëri në vitin 2014.