Gjykata ka refuzuar kërkesën e prokurores speciale për të dëgjuar dëshminë e zyrtarëve policorë që i kishin intervistuar dëshmitarët e rastit të fajdeve në Prizren.

Prokurorja Merita Bina-Rugova e bëri këtë kërkesë me arsyetimin se dëshmitarët kanë ndryshuar dëshmitë e tyre nga frika e hakmarrjes nga të akuzuarit.

“Konsideroj se deklarimi i këtyre dëshmitarëve është i domosdoshëm për sqarimin e gjendjes faktike në këtë rast penal dhe për sqarimin e faktit se përse shumica e dëshmitarëve në tërësi i kanë ndërruar deklaratat të cilat i kanë dhënë më herët”, tha prokurorja speciale.

Prokurorja e bëri kërkesën pasi që në seancën e sotme gjyqësore në rastin e 14 të akuzuarve për fajde e vepra të tjera penale munguan sërish dëshmitarët e ftuar nga Gjykata.

Trupi gjykues njoftoi të pranishmit se për shumicën e dëshmitarëve ka marrë informacion se gjenden jashtë vendit.

Po ashtu, trupi gjykues mori vendim që të mos lexohen dëshmitë e dëshmitarëve të cilët nuk kanë dhënë dëshmitë e tyre para gjykatës.

I vetmi dëshmitar që prezantoi në Gjykatë ishte Avdi Zukaj. Ai para trupit gjykues deklaroi se e njeh vetëm të akuzuarin Gëzim Kqira, ndërsa tha se kishte pasur një herë një takim edhe me të akuzuarin Kastriot Kqira.

Dëshmitari Zukaj tha se të akuzuarit Gëzim Kqira i kishte shitur një parcelë, e cila më pas nuk kishte dal[ në rregull me dokumentacion dhe më pas Gëzimi i kishte kërkuar kthimin e të hollave.

Mirëpo, në këtë rast reagoi prokurorja duke i cituar dëshminë e tij të dhënë në procedurë hetimore.

“Isha në vështirësi financiare dhe e kam thirrë Gëzimin në telefon, i thash se jam keq për do pare dhe ai më tha a ke diçka që mundesh me lënë garancë, unë i thash e kam një pllac në Kolovicë, në Prishtinë, me tre ari, ai më tha ani mirë eja sonte me ma nënshkru te avokati e po t’i jepi 10 mijë euro”, lexoi prokurorja dëshminë e dëshmitarit dhënë në procedurën hetimore.

Pas këtij ballafaqimi dëshmitari e pranoi këtë pohim. “Po është e vërtetë kjo që kam deklaruar”, tha ai.

Në kontratën e nënshkruar te avokati në Pejë, prokurorja tha se dëshmitari ka deklaruar se parcela ka vlerën 30 mijë euro dhe kinse ka pranuar 12 mijë euro nga Gëzimi.

Këtë pohim dëshmitari e arsyetoi para Gjykatës duke deklaruar se nga i akuzuari Gëzim Kqira kishte marrë 12 mijë euro dhe jo 10 mijë siç kishte deklaruar më herët për t’i kthyer edhe 2,000 të tjera në formë të kamatës.

Ai tha se 2 mijë euro i kishte marrë nga Gëzimi paraprakisht për nevoja të shkollimit të fëmijëve mirëpo që nuk i kujtohej data kur i kishte marrë ato të holla dhe 10 mijë të tjera në këtë rast kur kishte lënë garancë parcelën e tij në Prishtinë.

Dëshmitari tha se paratë borxh ia kishte kërkuar vetëm Gëzimi dhe atë pa kurrfarë presioni, ndërsa tha se askush tjetër nuk e kishte thirrur për këtë punë.

Në ballafaqimin me dëshminë e tij, prokurorja i rikujtoi se kishte deklaruar se kishte pasur thirrje edhe nga Kastriot Kqira, gjë për të cilën dëshmitari në gjykatë tha se nuk i kujtohej.

Po ashtu, trupi gjykues refuzoi kërkesën e avokatit Azem Vllasi që në cilësinë e dëshmitarit të dëgjohet babai i të akuzuarit Tunë Kqira, Gjergji, për të dëshmuar mbi mënyrën e fitimit të pasurisë së familjes Kqira.

Gjykata refuzoi edhe kërkesat për ndërprerjen e masës së paraburgimit për Marian e Kastriot Kqirën si dhe për Besfort Omajn e Benson Buzën dhe masën e arrestit shtëpiak ndaj Tunë e Gjon Kqirës.

Në seancën e radhës do të dëgjohen ekspertët financiarë Riza Blakaj e Vehbi Imeri.

Sipas Prokurorisë Speciale, gjatë disa viteve të kaluara, të pandehurit Tunë, Kastriot, Gjon, Marjan, Gjekson e Gëzim Kqira dhe Benson Buza kanë vepruar si grup i organizuar kriminal më qëllim të përfitimit të drejtpërdrejtë të dobisë financiare, duke kryer vepra të rënda penale.

Sipas aktakuzës, Tunë Kqira i ka mbikëqyrur dhe i ka drejtuar veprimet e këtij grupi kriminal.

Grupi ka shfrytëzuar gjendjen e rëndë financiare ose papërvojën e të dëmtuarve dhe u ka dhënë para me fajde.

Pastaj, duke përdorur kërcënimet e rënda, i kanë detyruar të paguajnë kamata dukshëm joproporcionale ose të kryejnë ndonjë veprim tjetër në dëm të pasurisë së tyre. / KALLXO.com

Nisma për Kosovën mbetet optimiste se në ditët në vijim do të arrijë t’i mbledhë 40 nënshkrime të deputetëve për mocionin e mosbesimit ndaj Qeverisë së Kosovës.

Shefja e grupit parlamentar e Nismës, Valdete Bajrami, beson se këtë iniciativë do ta mbështesin edhe deputetët e pozitës.

“Ne jemi në kontakt të vazhdueshëm me të gjithë deputetët, pavarësisht se të dy partnerët e koalicionit po bëjnë presione të ndryshme mbi deputetët e tyre për të mos e nënshkruar këtë mocion. Shpresoj se deputetët e pozitës, të cilët e kanë kundërshtuar këtë Qeveri, madje edhe ata që nuk e kanë votuar këtë Qeveri, do t’u qëndrojnë besnikë bindjeve të tyre për ndërrim të Qeverisë. Ne jemi këmbëngulës në iniciativën tonë dhe do të vazhdojmë deri në fund derisa t’ia arrijmë qëllimit për rrëzimin e kësaj Qeverie”, ka thënë Bajrami për gazetën “Epoka e re”.

Ajo ka treguar se tashmë i kanë mbledhur nënshkrimet e deputetëve të subjekteve politike opozitare dhe atyre të pavarur.

“Nënshkrimet e deputetëve të opozitës i kemi qysh në fillim të takimeve tona dhe këto dy ditët e fundit kemi pasur nënshkrime të deputetëve të pozitës, të deputetit të PDK-së, Nait Hasanit dhe të deputetit të pavarur, Gëzim Kelmendi. Ne vazhdimisht jemi në kontakt me deputetët të cilëve ua kërkojmë votën e tyre në momentin që do ta procedojmë më tutje. Prandaj, puna e mocionit është duke shkuar mirë dhe shpresojmë se brenda javës së ardhshme t’i japim kah drejt procedimit, në mënyrë që sa më parë ta mbajmë seancën e jashtëzakonshme dhe ta kemi votën pro të pozitës për rrëzim të kësaj Qeverie”, ka thënë Bajrami, duke shtuar se edhe me deputetin Ilir Deda janë marrë veshë. “Z. Deda ka marrë miratimin e partisë së tij dhe shumë shpejt do ta takojmë edhe atë për ta marrë nënshkrimin. Ai edhe publikisht është deklaruar se e përkrah iniciativën e z. Limaj”, është shprehur Bajrami.

Madje, sipas shefes së grupit parlamentar të Nismës, rrëzimin e Qeverisë aktuale do ta lehtësojë edhe fakti se ky koalicion është i panatyrshëm.

“Po të ishte ky koalicion i mirëfilltë dhe po të ishte ndërtuar mbi bazën e interesave të qytetarëve as opozita nuk do ta kërkonte dorëheqjen e kësaj Qeverie. Por, dihet se ky koalicion është ndërtuar mbi pazare të PDK-së, të LDK-së dhe të të Listës Serbe, pazare këto që i kanë dëmtuar interesat e vendit dhe kanë shkelur Kushtetutën e Kosovës”, ka thënë deputetja e Nismës.

Qeveria tashmë ka rënë

Shefja e grupit parlamentar e Nismës, Valdete Bajrami, ka thënë se Qeveria ka rënë me refuzimin që Brukseli i ka bërë kërkesës së kryeministrit për prolongim të demarkacionit me Malin e Zi. Sipas saj, opozita do të bëjë çfarë është e mundur për ta çuar vendin në zgjedhje të reja.

“Ky koalicion nuk po mund t’i përmbush më detyrat për të cilat është zotuar se do t’i kryej. Kjo u dëshmua me shkuarjen e z. Mustafa në Bruksel. Prandaj nuk e di se çka presin më PDK-ja dhe LDK-ja dhe pse akuzojnë opozitën për dështimet e tyre. Mendoj se është momenti që këto dy subjekte politike të japin llogari për të gjitha të këqijat që ua kanë bërë qytetarëve dhe shtetit të Kosovës. Nisma për Kosovën, së bashku me subjektet opozitare dhe deputetët e pozitës, do të insistojnë që sa më parë t’ua japin të drejtën qytetarëve për të vendosur për zgjedhje të parakohshme”, ka thënë ajo.

Bajrami ka vlerësuar se mocioni i mosbesimit do të jetë vetëm vulë formale për rrëzimin e kësaj Qeverie.

“Kjo Qeveri vetëm ka rënë të martën kur z. Mustafa dështoi ta shtyjë më tutje në Bruksel kërkesën e tij për prolongimin e demarkacionit, e cila ishte një përpjekje e tij qesharake, ngaqë para dy vjetëve ka shkuar në Bruksel për të kërkuar që demarkacioni të jetë kusht për viza, ndërsa tash kërkon prolongimin e tij. Ne mendojmë se kjo Qeveri ka rënë tashmë, por për t’ia dhënë vulën përfundimtare do ta dërgojmë mocionin në Kuvend dhe në një seancë të jashtëzakonshme deputetët ta shfrytëzojnë të drejtën e tyre për të votuar pro rrëzimit të Qeverisë”, ka thënë deputetja e Nismës, Valdete Bajrami. / Epoka e re

Komuna e Malishevës po vazhdon me logjikën e njëjtë te qeverisjes se kaluar, duke realizuar projekte pa përfillur procedurat ligjore dhe pa respektuar standardet elementare dhe të domosdoshme para dhe gjatë kryerjes së punimeve në projekte të ndryshme infrastrukturore dhe urbanistike, vlerëson Lëvizja Vetëvendosje në Malishevë.

“Rast konkret i këtyre shkeljeve ligjore dhe procedurale nga ana e komunës, është fillimi i punimeve për rindërtimin e këndit të lojërave për fëmijë në “Sheshin e Dëshmorëve” në Malishevë. Por, ky nuk është rasti i vetëm sepse qytetarët po e shohin cilësinë e dobët të projekteve çdo ditë e më shumë dhe shumë prej tyre po shkatërrohen ende pa përfunduar”.

“Këto punime si shumë të tjera po realizohen pa asnjë debat publik me qytetarë e madje pa pasur as edhe një njoftim publik në ueb faqen zyrtare të komunës, as në tabelën e shpalljeve dhe as në media”.

“ Pra, kjo është mungesë e transparencës dhe e llogaridhënies nga ana e qeverisjes Begaj edhe pse ky ishte një nga premtimet kryesore të tij gjatë fushatës”.

“Në këtë mënyrë Komuna e Malishevës po merre vendime për projekte duke mos respektuar kështu asnjë normë ndërtimore dhe pa ndërmarr masat elementare dhe të domosdoshme për të siguruar hapësirën përreth vendit ku kryhen punimet”.

“Mungesa për ndërmarrjen e këtyre masave paraprake edhe në këtë projekt ashtu si edhe në projektet tjera, ka vënë në pah edhe njëherë mos profesionalizmin dhe ndërtimet shkel e shko që Komuna e Malishevës po vazhdon t’i bëjë”.

“Po ashtu, mungesa e vendosjes së një tabele informuese dhe mungesa e shenjave tjera sinjalizuese dhe mbrojtëse pranë vendit ku po zhvillohen punimet, tregon më së miri për mos kujdesin ndaj sigurisë së qytetarëve, mos profesionalizmin në realizimin e projekteve dhe jo transparencën ndaj parasë publike që Komuna e Malishevës vazhdon ta ketë”.

“Prandaj, nëpërmjet këtij aktiviteti simbolik, që ne aktivistët e Lëvizjes VETËVENDOSJE! Qendra në Malishevë, sot po e realizojmë edhe njëherë po ja përkujtojmë Komunës së Malishevës, gjegjësisht kryetarit dhe drejtorëve të tij, disa nga parakushtet dhe standardet të cilat ata duhet t’i ndërmarrin gjatë realizimit të projekteve. Qëllimi ynë është që nëpërmjet këtij aktiviteti të vëmë në pah rrezikshmërinë dhe pasojat që mund të vijnë si pasojë e mungesës së respektimit të standardeve elementar gjatë realizimit të projekteve ndërtimore, si dhe papërgjegjshmërinë e komunës në realizimin e këtyre punimeve”.

“Po ashtu, të tregojmë se ne dimë të japim alternativë ashtu siç dimë të angazhohemi pareshtur për t’i dhënë zgjidhje problemeve dhe mangësive të qeverisjes aktuale. Përmes këtij aktiviteti ne po vendosim një tabelë pranë vendit ku kompania ndërtimore e kontraktuar nga komuna po vazhdon ti kryej punimet, në këtë tabelë informuese kemi listuar informatat lidhur me projektin që po realizohet, e që një praktikë e tillë do duhej të bëhej model i përhershëm në çdo rast në vendet ku realizohen punimet”/PrizrenPress.com/

Prona publike në komunën e Prizrenit nuk është shfrytëzuar si duhet për të bërë sa më shumë hapësira gjelbëruese në Prizren. Kështu së paku mendojnë përfaqësues të shoqërisë civile, por edhe të opozitës. Ismet Kryeziu, drejtor i KDI-së, organizatë e shoqërisë civile, shprehet për “Kosova Sot” se Prizreni me disa qëndrime dhe propozime për pronën komunale, e cila ka qenë e shfrytëzuar nga operatorë ekonomikë, nuk e ka menaxhuar mirë atë pronë për të shndërruar në hapësira gjelbëruese, të cilat i mungojnë Prizrenit. Ai me këtë rast tha se një hapësirë gjelbëruese i duhet këtij qyteti tek lagjja “Bazhdarhanë”, që do të mund të shfrytëzohej edhe nga lagjja”Dardania”.

“Duke mos dashur të vlerësoj procedurat e zgjatjes së kontratave me operatorët ekonomikë, meqë për raste të caktuara ka të ngritura edhe hetime nga organet kompetente dhe duke parë gjendjen ekzistuese të këtyre pronave komunale, duke parë tendencat që këto prona komunale të kthehen në ndërtim dhe betonim, Instituti Demokratik i Kosovës (KDI) kërkon që prona e tillë komunale t’u kthehet qytetarëve në hapësirë gjelbëruese dhe rekreacion”, është shprehur ai,shkruan gazeta Kosova Sot.

Të ndalen tendencat e uzurpimit të hapësirave publike

Mungesa e hapësirave publike dhe uzurpimi i saj paraqesin ndër problemet me të theksuara për banorët e lagjeve të qytetit të Prizrenit.”Në qytetin e Prizrenit, brenda zonës së banimit, aktualisht ekziston vetëm një hapësirë gjelbëruese (park) me përmasa më të gjëra, që mund të cilësohet si hapësirë që i plotëson nevojat për rekreacion dhe shëtitje të qytetarëve. Jeta dinamike, mungesa e hapësirave rekreative brenda lagjeve të Prizrenit dhe mungesa e parqeve brenda zonave të banimit, shtojnë domosdoshmërinë që qasja në planifikimet urbane të ndryshojë. Planet rregulluese të dy lagjeve, të cilat tanimë janë kthyer në ndërtesa kolektive dhe të betonuara tej mase, janë pa hapësira gjelbëruese dhe rekreacioni.

Tanimë Prizreni dhe banorët e disa lagjeve, por edhe të gjithë qytetarëve mund të kenë hapësirën gjelbëruese (parkun). Kthimi i pronës komunale 85.93 ari dhe integrimi i parcelave të tjera përcjellëse të pronës komunale në hapësirë gjelbëruese dhe rekreacioni janë zgjidhja adekuate”, është shprehur Kryeziu. Sipas tij, Instituti Demokratik i Kosovës (KDI), duke parë si të nevojshme hapësirat gjelbëruese dhe rekreative për qytetarët e Prizrenit, rekomandon institucionet lokale që sa më parë të ndalojnë tendencat e uzurpimit të kësaj prone komunale dhe të ndërmarrin hapat e nevojshëm që kjo pjesë të mbetet si hapësirë gjelbëruese dhe rekreacioni (park) për qytetarët prizrenas dhe nëse është nevoja të fillohet edhe me ndryshimin e dy planeve rregullative ekzistuese.

Berisha: Ne kemi vendim që secili projekt inxhinierie të ketë hapësirat gjelbëruese

Me këto konstatime nuk pajtohet zëdhënësi i komunës së Prizrenit, Ymer Berisha:”Të thuash se Prizreni ka më së paku gjelbërim këtë nuk e beson askush, sepse fakti është i dukshëm. Ne kemi vendim që secili projekt inxhinierie të ketë hapësirat gjelbëruese. Kemi parkun e madh, kemi parqe brenda qytetit dhe kemi parqe në secilën lagje. Komuna e Prizrenit nuk ka marrë asnjë vendim deri më sot që të realizojë një projekt ku plani inxhinierik të mos ketë parësor problemin e gjelbërimit”, është shprehur ai. Shton se secili vizitor që vjen në Prizren këtë mund ta vërtetojnë edhe shoqëria civile dhe opozita”, është shprehur ai për “Kosova Sot”.

Berisha pohon ne nuk e dimë se cila ka qenë formula që ata e kanë llogaritur për hapësirat gjelbëruese. Ai përmend edhe parkun e qytetit, pastaj kompleksin “Marash”, kompleksin “Andrra”, e sa e sa parqe që i ka Prizreni.

“Jemi komuna e vetme që ndajmë mjete të konsideruara për gjelbërim dhe për drurë dekorativë”, theksoi ai. Kryetari i degës së LDK-së në Prizren, Haxhi Avdyli, pohon se LDK-ja, duke marrë parasysh nevojën e madhe të qytetarëve të Prizrenit për hapësira të gjelbra dhe parqe, del në përkrahje të iniciativës së shoqërisë civile për më shumë hapësira të gjelbra edhe brenda lagjeve të banuara. Avdyli tha se Dega e LDK-së në Prizren do të përkrahë mundësinë për hapësira publike të gjelbëruara.

(Kosova Sot)