Ish-nënkryetari i LDK-së Eqrem Kryeziu ka “publikuar” votën e tij, për zgjedhjet e ardhshme. Ai thotë se vota e tij do të jetë çkapjen e pushtetit.
“Votën time do ta ketë ajo forcë politike që zotohet se nuk do të pranojë asnjë parashkrim të lëndëve për korrupsion për insektet e majme të skenës politike”, shkruan Kryeziu në Facebook,transmeton PrizrenPress.
“Besa edhe rishqyrtim të proceve herë të kapura, herë të çkapura nga pushteti”.
“Kaq mund të bëj me votën time të vetme”./PrizrenPress.com/
Institucionet e Kosovës nuk kanë reaguar për vandalizmin e Shtëpisë së Kongresit të Manastirit. Nga këto institucione nuk është dërguar as urim për këtë përvjetor
Alfabeti shqip ka shënuar 108-vjetorin e formimit. Por, ky përvjetor ka kaluar në heshtje në Kosovë. Institucionet qendrore të shtetit si dhe as ato kulturore e arsimore nuk kanë shënuar ditën e Alfabetit. Më 22 nëntor të vitit 1908 në qytetin e Manastirit, intelektualët shqiptarë vendosën alfabetin latin me 36 shkronja, me të cilin shkruhet sot shqipja.
Para Kongresit të Manastirit, gjuha shqipe ishte shkruar me shkronja arabe, greke, sllave, apo përshtatje të tyre. Kongresi i Manastirit, madje njihet se i paraprinë shpalljes kulturore të pavarësisë së Shqipërisë, që do të ndodhë më 1912.
Por, të martën Shtëpia e Alfabetit në Manastir është vandalizuar.
“Është thyer dera e shtëpisë, ndërsa në të është ngjitur edhe një grafit ku shkruhej “Vdekje për shqiptarët”, kanë raportuar gjatë ditës së martë mediet shqiptare në Maqedoni. Ndonëse, ende nuk dihen autorët e këtij akti vandal, nuk ka pasur reagime as nga institucionet e Shqipërisë, as ato të Kosovës që të identifikohen kryerësit e kësaj vepre, apo të kërkohet nga qeveria maqedonase zbardhja e rastit. ./zeri/
49790455Dy rivalët tradicionalë po mundohen të djegin njëri-tjetrin në mënyra të ndryshme. Nga kjo krijohet bindja se i kemi dy qeveri, njërën të udhëhequr nga LDK-ja dhe tjetrën nga PDK-ja, prandaj nuk mund të kemi rezultate të dëshiruara, përveç dështimeve të njëpasnjëshme”, deklaroi analisti Hidajet Ahmeti për “Kosova Sot” Deklarimet e fundit të kryeministrit të vendit, se nuk mund ta bëjë procedimin e Demarkacionit në Kuvend për mungesë të votave të mjaftueshme të deputetëve dhe heqja e përkohshme dorë nga hartimi i Statutit e dekretit për themelimin e Asociacionit të Komunave me Shumicë Serbe, nga analistët politikë po shihet si një sinjal serioz që flet se më në fund edhe Qeveria i ka ngritur duart lart dhe po e pranon se këto dy marrëveshje ishin një dështim.
“Tani nga vetë fakti se Qeveria ka lëvizur nga pozicioni i saj i dëmshëm në lidhje me Demarkacionin me Malin e Zi mund të vlerësohet si qasje pozitive dhe domosdo mund të konsiderohet se kjo është një fitore e madhe për Kosovën dhe jo vetëm për 8.200 hektarët, që mund t’i humbte Kosova me këtë Demarkacion, i cili nuk mund të ndalej pa reagimin e opozitës dhe përkrahjes së madhe të qytetarëve. Qeveria ka hezituar t’i kalojë ‘Zajednicën’ dhe Demarkacionin, për shkak të frikës nga reagimi i furishëm qytetar bashkë me opozitën, shkaku i dëmeve që këto marrëveshje do t’ia sillnin vendit po të kalonin në formën si i ka nënshkruar kjo Qeveri e papërgjegjshme “, tha deputeti Ismail Kurteshi nga lëvizja “Vetëvendosje”.
Marrëveshjet jodetyruese
Profesor Riza Smaka, njohës i së drejtës kushtetuese, thotë se këto dy marrëveshje nuk janë fare të obligueshme për institucionet e shtetit të Kosovës, përderisa janë vlerësuar edhe kundërkushtetuese, prandaj është interes nacional që Qeveria e vendit përfundimisht të marrë guximin dhe t’i zhvlerësojë të dyja marrëveshjet. “Marrëveshja për Asociacionin e Komunave me Shumicë Serbe në Kosovë dhe Marrëveshja për Demarkacionin ndërmjet Kosovës dhe Malit të Zi virtualisht nuk e obligojnë vendin tonë, ngase janë vetëm të përafruara nga përfaqësues të Kosovës, por gjithnjë nuk janë ratifikuar në mënyrën e përcaktuar me nenin 18 të Kushtetutës së Republikës së Kosovës! Këto dy marrëveshje virtualisht janë projektmarrëveshje, përderisa nuk janë të ratifikuara në një anë dhe të dyja janë në kundërshtim me Kushtetutën e vendit, në anën tjetër”, theksoi ai.
“Përderisa me aktin e përafrimit të Marrëveshjes për Asociacionin janë shkaktuar plot 20 shkelje kushtetuese, me përafrimin e Marrëveshjes për Demarkacionin po ashtu janë shkaktuar shkelje të dispozitave kushtetuese referuar cenimit serioz të integritetit territorial të vendit tonë”, tha profesor Smaka. Ai ka pohuar se, pavarësisht faktit që këto marrëveshje po kundërshtohen akoma nga deputetë jo vetëm të opozitës, por edhe të koalicionit qeverisës, për çka kreu i Qeverisë e ka pranuar mungesën e votave. Tendenca është akoma e dëmshme nga kryeministri, i cili nuk po pajtohet të deklarojë se ka hequr dorë nga të dyja këto marrëveshje.
“Për të qenë e keqja edhe më e madhe, kryeministri i vendit gjithnjë po insiston të ratifikohet Marrëveshja për Demarkacionin, duke e ndërlidhur atë me kërkesën për liberalizimin e vizave. Komisioni shtetëror i vendit tonë ka gabuar rëndë, kur në vend të Demarkacionit në përputhje me delimitacionin kufitar kosovar- malazez që nga viti 1945 e deri sot, asnjëherë të ndryshuar as për një cm2, ka aplikuar delimitacion të ri dhe atë prapëgabimisht e ka bazuar vetëm në të dhë- nat kadastrale, të cilat janë të karakterit sekondar, subsidiar, komplementar, por asnjëherë dhe askund të karakterit primar, as bazik”, tha Smaka për “Kosova Sot”. Ai thotë se tani edhe Qeveria duhet të dorëzohet pa pikë hezitimi para konstatimeve të Gjykatës Kushtetuese dhe ta pranojë gabimin e madh që është bërë në procesin e negocimit.
Jo rrallëherë ndodh që drejtësia e inkriminuar të sajojë edhe raste të paqena për të persekutuar kësisoj njerëzit e pafajshëm, vetëm e vetëm për të justifikuar mosefikasitetin e tyre në luftimin e dukurive negative. Kështu të paktën kanë vlerësuar analistët dhe specialistët e kësaj fushe të cilët thonë se kjo është e sigurt që ka raste të tilla kur ato sajohen. Ndaj është shtuar edhe çështja se si dhe përse po sajohen rastet e ndryshme të paqena për të persekutuar rrjedhimisht njerëzit e pafajshëm në Kosovë nga drejtësia e porositur dhe e inkriminuar kosovare? Analisti Florim Zeqa, në një prononcim për gazetën “Kosova Sot”, ka thënë se jo rrallëherë ndodh që drejtësia e inkriminuar të sajojë raste të paqena për të persekutuar kësisoj njerëzit e pafajshëm, vetëm e vetëm për të justifikuar mosefikasitetin e tyre në luftimin e dukurive negative.
Së këndejmi, Zeqa thotë se drejtësia me porosi të politikës, në mungesë të rezultateve në fushën e luftimit të krimit të organizuar dhe korrupsionit endemik, me (pa) dashjen e tyre i sajojnë rastet e paqena duke përdorur dëshmitarë të rrejshëm për persekutimin e njerëzve krejtësisht të pafajshëm dhe degradimin e vlerave të rivalëve politikë, derisa, sipas tij, gjithë këtë lojë të pasinqertë, drejtësia e inkriminuar e bën me porosi të bosëve politikë, për hesape politike dhe hakmarrje ndaj rivalëve politikë.
” Mirëpo, ndodh në disa raste të tjera, kur sajimi i rasteve bëhet sa për të “arsyetuar” të ardhurat e majme mujore, kinse po “bëjnë” diçka, duke mos llogaritur asnjëherë pasojat që shkaktojnë në shoqëri dhe dëmin financiar që i shkaktojnë shtetit në gjykimin e rasteve të sajuara. Deri në këtë nivel ka rënë drejtësia kosovare, reformimi i së cilës është bërë imperativ kohor për largimin e prokurorëve dhe gjyqtarëve të inkriminuar dhe të korruptuar nga sistemi i drejtësisë kosovare”, u shpreh ai.
Qeveria dirigjon prokurorinë
Profesori universitar, Muhamet Kelmendi thotë se çdo shtet, që i ka mekanizmat e luftimit të krimit të organizuar e korrupsionit, sikurse tek ne, është policia, prokuroria dhe gjykatat, por në qoftë se, sipas tij, në këtë aspekt politika është zotëruese dhe i ka nën kontroll mekanizmat e tillë, atëherë kur të vihen nën kritikë të rreptë institucionet më të larta të shtetit, si kryetari, Kuvendi, Qeveria, etj., për rrjedhojë është e kuptueshme se këta të fundit do të përpiqen të gjejnë raste inekzistente, ku qëllimi i tyre është kryesisht për të bindur dikë e në këtë rast, siç tha, faktorin ndërkombëtar, se është duke u punuar diçka në luftën ndaj krimit e korrupsionit. Sipas tij, ky fakt është parë edhe ditëve të fundit në Kosovë, pasi, siç tha, jemi dëshmitarë që nga Raporti i sivjetmë i Progresit për Kosovën, por edhe duke filluar nga viti 2008 e tutje, kur rrjedhimisht gjykatat dhe prokuroritë janë akuzuar për moskryerjen e detyrave të tyre në luftën kundër krimit dhe korrupsionit.
“Është e kuptueshme se Qeveria ka dhënë urdhër për mendimin tim që prokuroria edhe më tutje të zhvillojë veprimtari të tilla në drejtim të rasteve inekzistente për të bindur faktorin ndërkombëtar se është duke u luftuar krimi dhe korrupsioni dhe duke pasur për qëllim në të njëjtën kohë që fajtorët kryesorë dhe ata të cilët janë organizatorë të krimit e korrupsionit, pra ata të cilët e mbajnë përgjegjësinë e tillë të mos prekën dhe të mos kapen”, ka vijuar Kelmendi
Parku i qytetit të Prizrenit dikur ishte një nga oazat e freskimit dhe bukurisë së këtij qyteti dhe turqit kishin bërë një financim të konsideruar, duke e bërë parkun e qytetit një nga parqet me standarde të larta për relaksim dhe pushim. Deri para një viti gjithçka dukej mirë, por kohët e fundit ky park ka pësuar degradime të mëdha. Janë prishur pothuajse të gjitha ulëset, janë thyer lojërat e fëmijëve dhe ai park i dikurshëm ka marrë pamjen e trishtuar të një deponie publike, kështu pohuan studentët Elmedina Hoxha dhe Armir Hoti, shkruan gazeta Kosova Sot.
”S’ka njeriu ku ulet e ku pushon”
Studentja Elmedina Hoxha është shprehur për “Kosova Sot” se dikur dilte për të marrë ajër të pastër, por tani këtu ka trishtim. Por, me këtë rast, pos organeve përgjegjëse, ajo fajëson edhe qytetarët që e shkatërruan atë. “Edhe ne si studentë mirë është të marrim ndonjë iniciativë që këtë park të bukur ta shndërrojë në oazë mrekullie. Plaku Mustafë Berisha thotë se parku është bërë strehë e narkomanëve e ndoshta edhe më keq.”Tani këtu natën nuk mund të kalohet assesi”, tregon ai. “Po të zë nata këtu, as që guxon të hysh e mazomakeq”, shprehet ai. Ndërsa Armir Hoti, student, tregon se para një viti e më tepër këtu shumë ishte një vend për kënaqësi, sidomos gjatë dimrit. Tash po e shihni këtu ka vetëm trishtim. S’ka njeriu ku ulet e ku pushon. Tashmë këtu ka gjithçka, por nuk ka mundësi të relaksohesh”, është shprehur ai.
Së shpejti tenderi
Drejtori i Shërbimeve Publike, Sulltan Badallaj, për gazetën pohon përmes telefonit se janë duke u munduar ta sanojnë gjendjen.”Para disa ditësh kemi bërë pastrimin e mbeturinave, kemi caktuar edhe një roje, i cili e ka për detyrë të mbikëqyrë gjendjen. Tashmë i kemi përgatit të gjitha dokumentet dhe së shpejti do të dalë tenderi për parkun e qytetit me financim dhe shërbim publiko-privat dhe afati do të jetë për një dekadë. Ne me këtë besojmë që atë park ta rikthejmë ashtu, siç ka qenë një vend pushimi për prizrenasit”, shprehet ai.
Edhe asamblisti i komunës së Prizrenit, Naser Berisha, që është ekspert i ambientit pohon se Qeveria turke ka investuar shuma të mëdha në këtë park. “Por, tashmë, siç dihet, i tëri ai investim është dëmtuar. Prandaj duhet të ngutemi ne si prizrenas për të mbrojtur parkun e qytetit. Kemi rastin që Prizreni së pari të ruajë këtë ambient të bukur e pastaj pse mos të mendojmë që këtij qyteti t’i falim edhe një park botanik. Por, duke parë këtë park disi nuk mund të jemi shumë optimistë se ne e duam ambientin”, është shprehur ai.
(Kosova Sot)
Turneu i filmit “Mbledhësit e puplave” në kuadër të Javës së Filmit të Bekim Fehmiut në Kosovë 2016 do të organizohet në periudhën kohore prej 6 deri më 10 dhjetor, shkruan KultPlus.
Festivali “Mirëdita, dobar dan!” vjen me edicionin e tretë në Kosovë me Turneun e Filmit “Mbledhësit e puplave” në kuadër të Javës së Filmit të Bekim Fehmiut në Kosovë 2016 . Ky film, i shpërblyer me Grand Prinë në Festivalin e Kanës më 1967 dhe njëri ndër filmat me të famshëm të aktorit Bekim Fehmiu, vjen kësaj radhe në pesë qytete të ndryshme të Kosovës, shkruan KultPlus. Turneu i filmit “Mbledhësit e puplave” në kuadër të Javës së Filmit të Bekim Fehmiut në Kosovë 2016 do të organizohet në periudhën kohore prej 6 deri më 10 dhjetor, dhe do të filloj në qytetin e Kamenicës më 6 dhjetor në Shtëpinë e Kulturës “Isa Kastrati”, më 7 dhjetor në Pejë në Kinemanë “Jusuf Gërvalla”, më 8 dhjetor në Mitrovicë në Qendrën e Kulturës “Rexhep Mitrovica”, më 9 dhjetor në Ferizaj në Teatrin “Adriana Abdullahu” dhe më 10 dhjetor në Gjakovë në “Teatrin Kombëtar”. Orari i shfaqjes së filmit në pesë qytetet është nga ora 19.00. Hyrja për të gjitha shfaqjet e filmave do të jetë falas.
Festivali “Mirëdita, dobar dan!” është iniciative unike që kontribuon në dialogun dhe shkëmbimin kulturor në mes Kosovës dhe Serbisë, më qëllim të përmirësimit të marrëdhënieve sociale, politike dhe kulturore në mes dy shoqërive. Bekim Fehmiu, aktor shqiptar, kosovar, beogradas, jugosllav dhe botëror, që është simbol i të kaluarës së përbashkët, përmes të cilës, me të gjitha sfidat, të arriturat dhe keqkuptimet, ka shërbyer si frymëzim për themelimin dhe realizimin e këtij eventi. Synimi i organizatorëve është që ky festival të vazhdojë të organizohet në mënyrë tradicionale, duke kontribuar në vazhdimësi në vendosjen e paqes së përhershme dhe normalizimin e marrëdhënieve mes Kosovës dhe Serbisë.
Projekti “Mirëdita, dobar dan!” implementohet nga Integra në partneritet me KFOS, Iniciativat Qytetare, dhe Qendra për Politikë. Java e Filmit të Bekim Fehmiut në Kosovë organizohet në bashkëpunim me Qendrën e Kulturës – Kamenicë, Anibar – Pejë, Qendën e Kulturës – Mitrovicë, Teatrin “Adriana Abdullahu” – Ferizaj dhe Teatrin e Qytetit – Gjakovë. Ky projekt përkrahet nga Ambasada Norvegjeze në Prishtinë, Rockefeller Brothers Fund, Charles Steëart Mott Foundation, Ambasada Zvicerane në Prishtinë dhe Ministria e Kulturës në Kosovë./KultPlus.com
Shoqëria Civile ka organizuar marsh në Prizren ku ka kërkuar drejtësi për Astrit Deharin.
Këtë e ka bërë të ditur Lëvizja Vetëvendosje me anë të një njoftimi në llogarinë e saj ën Facebook.
“Janë mbushur 17 ditë nga vdekja e dhunshme e Astritit, kurse ministrja Dhurata Hoxha dhe ministri Skënder Hyseni vazhdojnë të mos japin përgjegjësi. Familja ka kërkuar dorëheqjen e tyre, që më pas t’i hapet rrugë hetimit të pavarur”, thuhet mes tjerash në njoftim
Një person është shtypë me traktor në Mamushë. Viktima ka përsuar lëndime të rënda trupore.
“Një person gjersa ishte duke punuar arën, dyshohet që aksidentalisht është shtypur nga traktori me të cilin ishte duke punuar”, njofton Policia e Kosovës.
Viktima ka pësuar lëndime të rënda trupore dhe është dërguar për trajtim mjekësor në QKUK.
Në lidhje me rastin është konsultuar edhe prokurori i cili ka udhëzuar që rasti të hetohet në procedurë të rregullt./PrizrenPress.com/
Përfaqësuesja e OJQ-së “Femra vizionare e shekullit XXI”, Marte Prenkpalaj, vdekjen e aktivistit të Lëvizjes Vetëvendosje! Astrit Dehari, e krahason me atë të ortopedit të njohur të Spitalit të Përgjithshëm të Prizrenit, dr. Halil Berisha në vitin 1989.
“Në Prizren kemi dy vdekje enigmatike. Vdekja e parë është ajo e dr. Halil Berishës, i cili pasi nuk pranoi të nënshkruajë vdekjen e profesorit Xhemajli Berisha, u vra nga UDB-ja, kurse vdekja e dytë është kjo e Astrit Deharit”, tha Pernkpalaj, shkruan PrizrenPress.
Ortopedi i njohur i Spitalit të Përgjithshëm të Prizrenit, dr. Halil Berisha, në qershor të vitit 1989, ka vdekur në mënyrë enigmatike.
Asokohe të gjithë dyshonin për këtë vdekje. Megjithatë, ndonëse të gjithë dyshonin për këtë vdekje mjaft misterioze, askush nuk guxonte të fliste haptazi nga rreziku kanosej nga çdo anë, dhe dera e burgjeve ishte prore e hapur për shqiptarët.
Vdekja e tij misterioze ishte një humbje e pakompensueshme për spitalin e Prizrenit në veçanti dhe për shëndetësinë kosovare në përgjithësi.
Pushteti Serbë kishte kërkuar nga Halili, një dokument në të cilën thuhej se profesori Xhemajli Berisha, kishte gjetur vdekjen pas kërcimit nga burgu.
Doktori kur e kishte parë se kriminelët e kishin mbytur në torturë profesorin kishte refuzuar nënshkrimin. Kriminelët serb 1 muaj e gjysmë pas vrasjes në torturë të prof.Xhemajli Berishës, e helmojnë mjekun Halil Berisha.
Marte Prenkpalaj nga regjioni i Hasit në Kosovë, e cila në vitin 2006, mori çmimin për Kreativitetin e Grave në Jetën Rurale, çmim shumë prestigjioz që ndahet nga Women’s World Summit Foundation (WWSF), thotë se vdekja e Astrit Deharit nuk duhet të mbetet enigmatike si ajo e dr. Halil Berishës.
“Astriti ka vdekur në burg. Mua nuk më intereson si vdiq, unë pyetem si vdiq një i ri i yni në një institucion të sigurisë së lartë” thotë Prekpalaj./PrizrenPess.com/
Ministrja e Drejtësisë, Dhurata Hoxha ka shkarkuar nga detyra stafin menaxhues të Qendrës së Paraburgimit në Prizren si dhe drejtorin e përgjithshëm të Shërbimit Korrektues, Sokol Zogaj, gati tri javë pas vdekjes së Astrit Deharit.
Ministrja Hoxha vendimin për shkarkimin e personave përgjegjës të Qendrës së Paraburgimit në Prizren dhe drejtorit të Shërbimit Korrektues e ka marrë sot gjatë ditës.
Ndryshe, edhe shoqëria civile ditë më parë kërkoi shkarkimin e personave që janë përgjegjës për Qendrën e paraburgimit në Prizren.
Astrit Dehari, student i mjekësisë dhe aktivist në Lëvizjen Vetëvendosje më 5 nëntor 2016, u gjet i vdekur në Qendrën e paraburgimit në Prizren.